លោក គួច ចំរើន៖ កម្ពុជានឹងមានឯករាជ្យភាពលើការដឹកជញ្ជូនតាមផ្លូវទឹកដោយខ្លួនឯងនៅថ្ងៃខាងមុខ
(កណ្តាល)៖ លោក គួច ចំរើន បានគូសបញ្ជាក់ថា កម្ពុជារបស់យើងនៅថ្ងៃខាងមុខនេះ នឹងមានឯករាជ្យភាពលើការដឹកជញ្ជូនតាមផ្លូវទឹកដោយខ្លួនឯង ដូច្នេះរាជរដ្ឋាភិបាលរបស់យើងខិតខំធ្វើយ៉ាងណាឱ្យគម្រោងព្រែកជីកហ្វូណនតេជោនេះទទួលបានជោគជ័យ។
ការគូសបញ្ជាក់យ៉ាងដូច្នេះរបស់លោក គួច ចំរើន អភិបាលខេត្តកណ្ដាលក្នុងកិច្ចប្រជុំបកស្រាយជូនប្រជាពលរដ្ឋពីការរងផលប៉ះពាល់ នៃគម្រោងព្រែកជីកហ្វូណនតេជោ កំណាត់ទី១ ដោយមានការចូលរួមពីលោក ហេង សុធី អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែនិងលោកអគ្គនាយករង នៃអគ្គនាយកដ្ឋានដោះស្រាយផលប៉ះពាល់ដោយសារគម្រោងអភិវឌ្ឍន៍របស់ក្រសួងសេដ្ឋកិច្ច និងហិរញ្ញវត្ថុ រួមជាមួយក្រុមការងារអន្តរក្រសួង នៅបរិវេណវត្តពោធិអណ្តែត ស្ថិតក្នុងភូមិពោធិកណ្តាល ឃុំត្រើយស្លា ស្រុកស្អាង ខេត្តកណ្តាលនាព្រឹកថ្ងៃទី៣ ខែមិថុនា ឆ្នាំ២០២៥នេះ។
លោក គួច ចំរើន បានបន្តថា នៅពេលព្រែកជីកនេះនឹងសាងសង់រួចរាល់ វានឹងផ្ដល់អត្ថប្រយោជន៍យ៉ាងច្រេីនលេីសលប់ដល់ប្រទេសកម្ពុជាយើង ក្នុងការទាក់ទាញអ្នកវិនិយោគទាំងក្នុង និងក្រៅប្រទេស ដើម្បីរកស៊ីនៅក្នុងប្រទេសរបស់យើងហើយបង្កើតការងារជូនបងប្អូនប្រជាពលរដ្ឋយើង។ លោកបន្តថា មិនតែប៉ុណ្ណោះ ធានាដល់ការផ្គត់ផ្គង់ត្រីសាច់បាននៅក្នុងតំបន់ព្រែកជីកនេះ ជាពិសេសព្រែកជីកនេះ នៅពេលដែលសាងសង់រួច ហេដ្ឋារចនាសម្ព័ន្ធជាច្រើនត្រូវបានសាងសង់ ដែលអាចទាក់ទាញដល់ភ្ញៀវទេសចរណ៍មកកម្សាន្តសប្បាយ និងបង្កើតការងារកាន់តែច្រើនទៀតជូនបងប្អូនប្រជាពលរដ្ឋនិងលើកកម្ពស់ជីវភាពរបស់បងប្អូនប្រជាពលរដ្ឋនៅក្នុងតំបន់ឱ្យកាន់តែល្អប្រសើរឡើង។
បើតាមលោក ហេង សុធី អគ្គនាយកនៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែបានថ្លែងថា កិច្ចប្រជុំនេះ រៀបចំឡើងក្នុងគោលបំណងដើម្បីពន្យល់ និងបកស្រាយពីការរៀបចំតម្រាយផ្លូវព្រែកជីក និងលក្ខខណ្ឌបច្ចេកទេសការកំណត់ទំហំតម្រាយផ្លូវ គម្រោងអភិវឌ្ឍន៍ដែលនៅអមសងខាងព្រែកជីកហ្វូណនតេជោ ព្រមទាំងនីតិវិធីលម្អិតក្នុងការងារដោះស្រាយផលប៉ះពាល់ជូនប្រជាពលរដ្ឋ។
លោកអគ្គនាយកក៏បានធ្វើការពន្យល់លម្អិតអំពីលក្ខណៈបច្ចេកទេស និងការកំណត់តម្រាយផ្លូវ កំណាត់ទី១ នៃព្រែកជីកហ្វូណនតេជោ ដែលភ្ជាប់ពីព្រែកតាកែវ ទៅព្រែកពោធិផងដែរ។ លោកបានបន្តថា ការសិក្សាកន្លងមកមានជម្រើសមួយចំនួន រួមមាន៖ ព្រែកតាឯក ព្រែកពោធិ និងជម្រើសផ្សេងៗទៀត។ ដោយឡែក ផ្អែកតាមលក្ខណៈបច្ចេកទេសផ្លូវទឹក និងស្ថានភាពព្រែក ព្រែកពោធិគឺមានភាពអំណោយផលជាងជម្រើសដទៃទៀត ដោយមានសភាពត្រង់ និងមានភាពងាយស្រួលក្នុងការតភ្ជាប់ទៅព្រែកតាកែវ។
ទន្ទឹមនោះ លោក គួច ចំរើន បានថ្លែងអំណរគុណបំផុត ចំពោះទឹកចិត្តរបស់ប្រជាពលរដ្ឋទាំងអស់ដែលបានចូលរួមគាំទ្រជាមួយរាជរដ្ឋាភិបាលក្នុងការកសាងគម្រោងព្រែកជីកហ្វូណនតេជោ ដែលជាសមិទ្ធផលប្រវត្តិសាស្ត្ររបស់កម្ពុជា។ ដោយឡែកពាក់ព័ន្ធប្រជាជនដែលរងនូវផលប៉ះពាល់លោកបានណែនាំឲ្យខិតខំដោះស្រាយតាមគ្រួសារនីមួយៗ ដោយអាចជជែកដោយឡែកៗ ព្រោះដីម្នាក់ៗអត់ដូចគ្នាទេ ដំណាំអត់ដូចគ្នាទេ មិនមែនន័យថា អត់តម្លាភាពទេ តម្លាភាពតែគ្រាន់តែដោយឡែក ហើយក្រុមការងារនឹងចុះជាក់ស្ដែងដើម្បីដោះស្រាយ។
គួរជម្រាបជូនថា ក្រុមការងារអន្តរក្រសួងបានពន្យល់ពីលក្ខខណ្ឌបច្ចេកទេស ការសាងសង់ព្រែកជីកហ្វូណនតេជោ រួមមានជម្រៅ ទំហំព្រែកជាក់ស្ដែង និងការពង្រីកនៅតំបន់នៃការបទនាវាផងដែរ។ ព្រមទាំងបានធ្វើការពន្យល់ពីលក្ខខណ្ឌផ្នែកលើទិដ្ឋភាពច្បាប់ ស្ថានភាពជាក់ស្តែង និងផ្តល់សំណងសមរម្យពីរាជរដ្ឋាភិបាល ក្នុងការសងថ្លៃផលប៉ះពាល់ជូនដល់ប្រជាពលរដ្ឋទាំងអស់ដែលរងផលប៉ះពាល់កក្នុងគម្រោងសាងសង់នេះ បន្ទាប់ពីក្រុមការងារបានចុះពិនិត្យ និងវាយតម្លៃជាក់ស្ដែងនៅលើទីតាំងផ្ទាល់៕
