មិនធម្មតាមែន លោកស្រី ហង្ស ចន្ថា អតីតអភិបាលរងស្រុកកៀនស្វាយត្រូវបានទាំងប្រធានក្រុមប្រឹក្សាខេត្ត និងអភិបាលខេត្តកណ្ដាលទៅប្រកាសជាអភិបាលរងស្រុកខ្សាច់កណ្តាល

(កណ្តាល)៖ ពិតជាមិនធម្មតា និងកិត្តិយសយ៉ាងក្រៃលែង ហើយជាលើកទី១ផងដែរសម្រាប់ខេត្តកណ្ដាលក្នុងឆ្នាំ២០២៥នេះ ដែលអតីតអតីតអភិបាលរងស្រុកកៀនស្វាយ លោកស្រី ហង្ស ចន្ថា ត្រូវបានលោក នូ សាខន ប្រធានក្រុមប្រឹក្សាខេត្ត និងលោក គួច ចំរើន អភិបាល នៃគណៈអភិបាលខេត្តកណ្តាលអញ្ជើញទៅប្រកាសដើម្បីផ្លាស់ប្ដូរទៅកាន់តួនាទីជាអភិបាលនៃគណៈអភិបាលរងស្រុកខ្សាច់កណ្តាលវិញនៅថ្ងៃចន្ទ័ ទី០២ ខែមិថុនា ឆ្នាំ២០២៥នេះ។

នាឱកាសដ៏កម្រនោះ លោក គួច ចំរើន អភិបាលខេត្តកណ្ដាលបានបញ្ជាក់ឲ្យដឹងថា ការតែងតាំងផ្លាស់ប្តូរ គឺជារឿងធម្មតារបស់មន្ត្រីរាជការ ហើយវាក៏ជាការឆ្លើយតបទៅនឹងកំណែទម្រង់កាន់តែស៊ីជម្រៅរបស់រាជ រដ្ឋាភិបាលអាណត្តិទី៧ នៃនីតិកាលរដ្ឋសភា។

លោកបន្តថា ការផ្លាស់ប្ដូរមុខតំណែងតួនាគឺជាការផ្ដល់ឱកាសឱ្យយើងពង្រឹងសមត្ថភាពឲ្យបានកាន់តែល្អប្រសើរ មានបទពិសោធន៍ការងារច្រើន មានទំនាក់ទំនង និងមានសហការីច្រើនជួយជំរុញដល់ការបំពេញតួនាទីភារកិច្ចរបស់យើងកាន់តែមានប្រសិទ្ធភាព និងប្រសិទ្ធផលខ្ពស់។

លោកអភិបាលខេត្តក៏បានស្នើដល់ក្រុមប្រឹក្សានិងគណៈអភិបាលស្រុកត្រូវគាំទ្រដល់លោកស្រីអភិបាលរងស្រុកថ្មីនេះ និងបានជំរុញដល់លោកស្រីអភិបាលរងស្រុកទើបចូលកាន់មុខតំណែងត្រូវមានភាពស្មោះត្រង់ជាមួយមន្ត្រីក្រោមឱវាទ និងថ្នាក់លើជាពិសេសជាមួយរាជរដ្ឋាភិបាល ហើយត្រូវស្វែងយល់អំពីច្បាប់នានា ពីការងារជាក់ស្ដែង រៀនសូត្រពីចាស់ៗ ដើម្បីអនុវត្តន៍ការងារទទួលបានជោគជ័យកាន់តែប្រសើឡើង។

លោក ចំរើន បានក្រើនរំលឹកទៅដល់អាជ្ញាធរស្រុកគ្រប់លំដាប់ថ្នាក់ ត្រូវយកចិត្តទុកដាក់ខ្ពស់លើការងារភូមិឃុំមានសុវត្ថិភាព ជាពិសេសចំពោះបញ្ហាក្មេងទំនើងត្រូវមានវិធានការទប់ស្កាត់លុបបំបាត់ឱ្យអស់ពីក្នុងមូលដ្ឋាន ត្រូវប្រើទាំងវិធានការច្បាប់ និងអប់រំផ្សព្វផ្សាយដល់យុវជន អាណាព្យាបាល ឱ្យយល់ដឹង កុំបង្កអំពើហិង្សាក្នុងមូលដ្ឋាន។ ត្រូវខិតខំស្រាវជ្រាវរកជនបង្កយកមកដាក់ទោសតាមច្បាប់ដោយគ្មានការលើកលែង។

លោកចៅហ្វាយខេត្តបានបន្តទៀតថា អាជ្ញាធរស្រុក ត្រូវតែរៀបចំផែនការជួយសង្គ្រោះ និងដោះស្រាយបញ្ហាទឹកជំនន់ ខ្យល់កន្ត្រាក់ ជូនប្រជាពលរដ្ឋឱ្យបានល្អប្រសើរ មន្ទីរកសិកម្ម រុក្ខាប្រមាញ់ និងនេសាទខេត្ត សូមត្រៀមផែនការជួយដោះស្រាយបញ្ហាជំងឺសត្វពាណៈ ជៀសវាងបង្កឱ្យមានផលប៉ះពាល់ដល់ការចិញ្ចឹមការថែទាំរបស់ប្រជាពលរដ្ឋ ត្រូវរាយការណ៍មកដល់ថ្នាក់លើដើម្បីជួយអន្តរាគមន៍ ករណីដោះស្រាយមិនបាន។

ទន្ទឹមនោះ លោក គួច ចំរើន បានបន្តណែនាំដល់អាជ្ញាធរស្រុក និងឃុំត្រូវយកចិត្តទុកដាក់ក្នុងការធ្វើនីតិវិធីលទ្ធកម្ម ក្នុងការអនុវត្តគម្រោងឱ្យបានត្រឹមត្រូវ មានគុណភាព ធានាការប្រើប្រាស់បានយូរអង្វែង ចំពោះក្រុមហ៊ុនដែលទទួលបានការដេញថ្លៃគម្រោង ត្រូវអនុវត្តគម្រោងឱ្យបានត្រឹមត្រូវមានគុណភាព ធ្វើឱ្យបានឆាប់រហ័សទាន់ពេលវេលា។

នៅក្នុងពិធីខាងលើនេះ លោកអភិបាលខេត្តបានផ្ដាំផ្ញើឲ្យអាជ្ញាធរស្រុកខិតខំបំពេញការងារ និងត្រូវមានសាមគ្គីភាពល្អ ហើយរដ្ឋបាលស្រុក ឃុំ ត្រូវខិតខំថែរក្សាការពារ សន្តិសុខសណ្តាប់ធ្នាប់សាធារណៈ និងបម្រើសេវាសាធារណៈ ព្រមទាំងយកចិត្តទុកដាក់លើបញ្ហាប្រឈមនានា ដើម្បីឆ្លើយតប និងដោះស្រាយទាន់ពេលវេលាជូនប្រជាពលរដ្ឋ៕