ប៉ូលិសពន្លត់អគ្គិភ័យខេត្តកណ្ដាលម្នាក់ត្រូវបានបុរសបើកម៉ូតូលឿនដូចហោះបុកបណ្ដាលឲ្យស្លាប់ ខណៈបញ្ជូនដល់មន្ទីរពេទ្យ

(កណ្ដាល)៖ មន្ត្រីនគរបាលពន្លត់អគ្គិភ័យខេត្តកណ្ដាលម្នាក់ត្រូវបានបុរសម្នាក់ជិះម៉ូតូឌ្រីមសង់ ស្លាកលេខក្រចេះ 1G-9417 ក្នុងល្បឿនលឿន​ ទិសដៅផ្ទុយគ្នា គេចម៉ូតូផ្សេងទៀត​បុកចំម៉ូតូធំរបស់គាត់យ៉ាងពេញទំហឹងបណ្ដាលឲ្យស្លាប់ ខណៈរថយន្តសង្គ្រោះដឹកយកទៅសង្គ្រោះបន្ទាន់នៅមន្ទីរពេទ្យបង្អែកជ័យជំនះខេត្តកណ្ដាល។

ហេតុការណ៍ខាងលើនេះ បានកេីតឡេីងនៅវេលាម៉ោងជាង១១យប់ ថ្ងៃទី៣១ ខែឧសភា ឆ្នាំ២០២៥ ស្ថិតនៅចំណុចស្តុបតាលន់ ផ្លូវលេខ២១ ភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្តាល។ 

ភ្លាមៗនោះ លោកវរសេនីយ៍ឯក យី វណ្ណដា អធិការក្រុងតាខ្មៅបានចាត់ឲ្យកម្លាំងជំនាញចរាចរណ៍ផ្លូវគោកនៃអធិការដ្ឋាននគរបាលក្រុងសហការជាមួយប៉ុស្តិ៍រដ្ឋបាលតាខ្មៅ ចុះអន្តរាគមន៍ហៅរថយន្តសង្គ្រោះ​បន្ទាន់​របស់មន្ទីរពេទ្យបង្អែកជ័យជំនះ មកដឹកយកទៅសង្គ្រោះភ្លាមៗផងដែរ​ តែជាអកុសល​ដោយស្ថានភាព​ធ្ងន់ធ្ងរពេក​ មន្ត្រីនគរបាលអគ្គិភ័យខាងលេី បានផុតដង្ហេីមស្លាប់ពេលបញ្ជូនទៅសង្គ្រោះនៅឯមន្ទីរពេទ្យ។ 

គួរជម្រាបថា មន្ត្រីនគរបាលពន្លត់អគ្គិភ័យខេត្តកណ្ដាលឈ្មោះ ប៊ុន ចាន់ថន អាយុ៤២ឆ្នាំ មានឋានន្តរសក្ដិ​អនុសេនីយ៍ឯក មានទីលំនៅភូមិជើងព្រៃ ឃុំអំពៅព្រៃ ស្រុកកណ្ដាលស្ទឹង ខេត្តកណ្ដាល បានជិះម៉ូតូធំ ម៉ាក FTR ស្លាកលេខកណ្ដាល 1P-4441 រីឯភាគីខាងម៉ូតូឌ្រីមសង់មិនទាន់ស្គាល់អត្តសញ្ញាណទេ​ រងរបួសធ្ងន់​កំពុងសម្រាកព្យាបាល​ នៅមន្ទីរពេទ្យ​បង្អែកជ័យជំនះ។

ដោយឡែកសពមន្ត្រីនគរបាលពន្លត់អគ្គិភ័យខាងលើត្រូវបានសមត្ថកិច្ចធ្វេីកំណត់ហេតុ ប្រគល់ជូនសាច់ញាតិក្រុមគ្រួសារចាត់ចែងយកទៅធ្វេីបុណ្យតាមប្រពៃណី។ ចំពោះមធ្យោបាយ​ទាំង០២គ្រឿង​ ត្រូវបានជំនាញចរាចរណ៍ផ្លូវគោក ធ្វេីការបាញ់គំនូសរងចាំវាស់វែងនិងយកទៅរក្សាទុកបណ្ដោះអាសន្ន នៅអធិការដ្ឋាននគរបាលក្រុងតាខ្មៅ​ ដេីម្បីរងចាំធ្វេីការដោះស្រាយតាមច្បាប់​៕