ប្រញាប់ទៅណា! មួយយប់មានរថយន្តបុករបាំងថ្មទ្រូងផ្លូវ ៣ករណីផ្សេងគ្នា!

(ភ្នំពេញ)៖ ខណៈមេឃបានកំពុងធ្លាក់ភ្លៀងមានរថយន្ត ៣គ្រឿងបើកលឿនជ្រុលទៅបុករបាំងថ្មក្បាលព្រួញពុះចែកទ្រូងផ្លូវ ៣ករណីផ្សេងគ្នា បណ្តាលឲ្យរថយន្តទាំង៣គ្រឿង រងការខូចខាតយ៉ាងដំណំ តែសំណាងល្អមិនបណ្ដាលឲ្យមានអ្នករបួសនោះទេ។ នេះបើតាមសេចក្ដីរាយការណ៍របស់ភ្នាក់ងារសារព័ត៌មាន The Mirror News ឲ្យដឹងនៅព្រឹកនេះ។

សេចក្ដីរាយការណ៍បន្តថា ចំពោះករណីទី១ កើតឡើងកាលពីវេលាម៉ោង០៧៖៥៥នាទីយប់ ថ្ងៃអាទិត្យ ទី២៥ ខែឧសភា ឆ្នាំ២០២៥នេះ នៅក្នុងបរិវេណកោះនរា ក្នុងសង្កាត់និរោធ ខណ្ឌច្បារអំពៅ បុរសម្នាក់បេីករថយន្ត LAND CRUISER ពណ៌ស ស្លាកលេខកម្ពុជា SIVENG77 ក្នុងល្បឿនលឿន​ ទៅបុករបាំងថ្មទ្រូងផ្លូវ បណ្ដាលឲ្យ​របាំងថ្មមួយផ្ទាំងរងការខូចខាត ខ្ទាតចេញពីជួរ រីឯរថយន្ត​ខ្ទេចមួយចំហៀងមុខខាងឆ្វេង អូសជាប់របាំងថ្មទៅមុខជាច្រេីនម៉ែត្រអស់ល្បឿនទេីបឈប់ តែមិនបណ្ដាលឲ្យមានអ្នករបួសនោះទេ​។  ករណីទី២ កេីតឡេីងនៅវេលាម៉ោង១០៖៥៥នាទីយប់ ថ្ងៃអាទិត្យ ទី២៥ ខែឧសភានេះ នៅក្នុងបរិវេណកោះពេជ្រ ខាងកេីត​សាលមហោស្រពកោះពេជ្រ ក្នុងសង្កាត់ទន្លេបាសាក់ ខណ្ឌចំការមន ដោយបុរសម្នាក់បេីករថយន្ត Mazda CX-3 ពណ៍ប្រផេះ ពាក់ស្លាកលេខភ្នំពេញ 2BV-7455 ទៅបុករបាំងថ្មទ្រូងផ្លូវ បណ្ដាលឲ្យ​រថយន្តខ្ទាតវិលក្រឡាប់មួយជុំ ខូចខាតយ៉ាងដំណំ​ និងផ្ទុះពោងការពារសុវត្ថិភាពចេញពីដៃចង្កូតនិងក្នុងរថយន្តផងដែរ។ និងករណីទី៣ កេីតឡេីងនៅវេលាម៉ោង០៣៖០៥នាទីទៀបភ្លឺ​ ឈានចូលថ្ងៃចន្ទ ទី២៦ ខែឧសភា ឆ្នាំ២០២៥នេះ នៅចំណុចស្តុបវត្តលង្កា លេីផ្លូវព្រះសីហនុ កែងផ្លូវលេខ៥១ ក្នុងសង្កាត់បឹងកេងកងទី១ ខណ្ឌបឹងកេងកង រថយន្ត Ford Ranger Raptor ពាក់ស្លាកលេខភ្នំពេញ 2BG-4566 បេីកទៅបុករបាំងថ្មទ្រូងផ្លូវ បណ្ដាលឲ្យ​របាំងថ្មមួយផ្ទាំងរងការខូចខាត ខ្ទាតចេញពីជួរ រីឯរថយន្ត​វៀចកាឡេនិងបែកកង់មុខចំហៀងខាងឆ្វេង​ បេីកទៅមុខលែងរួច។

បច្ចុប្បន្ន​រថយន្តទាំង៣គ្រឿង​ត្រូវបានសមត្ថកិច្ចមូលដ្ឋានសហការជាមួយផ្នែកជំនាញ​ចរាចរណ៍ផ្លូវគោកចុះទៅស្ទូចយកទៅរក្សាទុកបណ្ដោះអាសន្ន​ នៅការិយាល័យចរាចរណ៍ជេីងគោក​ នៃស្នងការដ្ឋាននគរបាលរាជធានីភ្នំពេញ​ ដេីម្បីរង់ចាំការស្រាវជ្រាវរក​ម្ចាស់រថយន្តឲ្យចូលខ្លួនដោះស្រាយនៅពេលក្រោយ​៕