ទីបំផុត អតីតអ្នកឧកញ៉ា ហេង សិទ្ធី ត្រូវបានតុលាការសម្រេចឃុំខ្លួននៅពន្ធនាគារព្រៃសហើយ!

(ភ្នំពេញ)៖ នៅថ្ងៃទី២៥ ខែឧសភា ឆ្នាំ២០២៥នេះ អតីតអ្នកឧកញ៉ា ហេង សិទ្ធី ត្រូវវបានសាលាដំបូងរាជធានីភ្នំពេញសម្រេចឃុំខ្លួនជាបណ្តោះអាសន្នហើយពីបទ«គំរាមកំហែងហែកកេរ្តិ៍ស្ថានទម្ងន់ទោស» តាមបញ្ញត្តិមាត្រា៣៧២ និងមាត្រា៣៧៤ នៃ ក្រមព្រហ្មទណ្ឌ។

ចៅក្រមស៊ើបសួរ យី សុខវួច បានបង្គាប់ឱ្យឃុំខ្លួនឈ្មោះ ហេង សិទ្ធី នៅក្នុងមណ្ឌលអប់រំកែប្រែទី១ (ម១) (ពន្ធនាគារព្រៃស)។យោងតាម មាត្រា ៣៧៤ នៃក្រមព្រហ្មទណ្ឌ បទ៖ «គំរាមកំហែងហែកកេរ្តិ៍ស្ថានទម្ងន់ទោស» ឈ្មោះ ហេង សិទ្ធី កើតថ្ងៃទី២៦ ខែមករា ឆ្នាំ១៩៨៩ អាចប្រឈមមុខនឹងការជាប់ពន្ធនាគារ ពី ៥ឆ្នាំទៅ១០ឆ្នាំ។

អតីតអ្នកឧកញ៉ារូបនេះត្រូវបានចាប់ខ្លួន នៅប្រទេសរុស្ស៉ី និងត្រូវបានបញ្ជូនមកដល់កម្ពុជានៅយប់ថ្ងៃទី២៤ ខែឧសភា ឆ្នាំ២០២៥ ក្រោមការធ្វើបត្យាប័នរវាងរដ្ឋាភិបាលប្រទេសទាំងពីរ។ អតីតអ្នកឧកញ៉ានេះត្រូវបានសមត្ថកិច្ចរុស្ស៉ីចាប់ខ្លួន នៅទីក្រុងម៉ូស្គូ កាលពីថ្ងៃ១៣ ខែមករា ឆ្នាំ២០២៥ តាមសំណើរបស់កម្ពុជា៕