ខឹងគេមើលងាយខ្លួន បុរសម្នាក់ប្រើប្រាស់កាំភ្លើងកែឆ្នៃបាញ់បណ្តាលឱ្យជាប់លើដើមទ្រូង!

(បាត់ដំបង)៖ កាលពីវេលាម៉ោង១៦៖៤០នាទី ថ្ងៃទី២៤ ខែឧសភា ឆ្នាំ២០២៥ នៅចំណុចក្រុមទី០២ ភូមិរកា ឃុំរកា ស្រុកសង្កែ ខេត្តបាត់ដំបង មានករណីប្រើប្រាស់កាំភ្លើងកែឆ្នៃបាញ់ទៅលើជនរងគ្រោះឈ្មោះ តឿ ឆៃយ៉ា ភេទប្រុស អាយុ ២៨ឆ្នាំ មានទីលំនៅចំណុចកើតហេតុខាងលើ ត្រូវចំកណ្តាលដើមទ្រូង បណ្តាលឲ្យជាប់លើដើមទ្រូង។

ក្រោយពីបានទទួលបណ្តឹងជនរងគ្រោះ កម្លាំងផ្នែកជំនាញព្រហ្មទណ្ឌរួមជាមួយកម្លាំប៉ុស្តិ៍នគរបាលរដ្ឋបាលរកានៃអធិការដ្ឋាននគរបាលស្រុកសង្កែ ដឹកនាំដោយលោកវរសេនីយ៍ទោ យុត តុងហូ អធិការនគរបាលស្រុកសង្កែនៅវេលាម៉ោង១៧៖៣០នាទី នៅថ្ងៃខែឆ្នាំដដែល សមត្ថកិច្ចបានធ្វើការឃាត់ខ្លួនជនសង្ស័យម្នាក់ ឈ្មោះ ឃៅ វិន ភេទប្រុស អាយុ២៥ឆ្នាំ នៅចំណុចផ្ទះរបស់ជនសង្ស័យ នាំមកកាន់អធិការដ្ឋាននគរបាលស្រុកសង្កែដើម្បីធ្វើការសាកសួរ។

ជនសង្ស័យបានសារភាពថា ខ្លួនពិតជាបានប្រើប្រាស់កាំភ្លើងកែឆ្នៃ បាញ់ទៅលើជនរងគ្រោះ ពិតប្រាកដមែន។ មូលហេតុដោយសារ៖ ជនសង្ស័យខឹងជនរងគ្រោះមើលងាយខ្លួន។

បច្ចុប្បន្នជនសង្ស័យខាងលេី ត្រូវសមត្ថកិច្ចជំនាញ កំពុងកសាងសំណុំរឿង បញ្ជូនទៅការិយាល័យជំនាញខេត្តដើម្បីចាត់ការបន្តតាមនីតិវិធី៕