ជនជាតិបរទេសមួយក្រុមបើកឡានសេរីទំនើប២គ្រឿងដឹកសាកសពយកទៅកប់ចោល ត្រូវកម្លាំងប៉ូលិសខេត្តបន្ទាយមានជ័យបង្ក្រាបបាន!

(បន្ទាយមានជ័យ)៖  កម្លាំងប៉ូលិសឃាត់ខ្លួនជនសង្ស័យ៣នាក់ជាជនជាតិបរទេសនិងរថយន្តសេរីទំនើប២គ្រឿង ពាក់ព័ន្ធករណីដឹកសាកសពយកទៅកប់ចោលក្នុងព្រៃកាលពីថ្ងៃទី២០ ខែឧសភា ឆ្នាំ២០២៥ នៅចំណុចការដ្ឋានចិន ស្ថិតនៅភូមិប្រាសាទនឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។

ជនសង្ស័យទាំង៣នាក់៖ ១.ឈ្មោះ អាហួរ ភេទប្រុសអាយុ ៣៤ឆ្នាំ(ជនជាតិម៉ីយ៉ាន់ម៉ា)២.ឈ្មោះ អាយកូម ភេទប្រុសអាយុ ២៦ឆ្នាំ(ជនជាតិម៉ីយ៉ាន់ម៉ា)៣.ឈ្មោះ ស៊ូហ៊ានដុង ភេទប្រុសអាយុ ២៨ឆ្នាំ(ជនជាតិចិន)ស្នាក់នៅការដ្ឋានចិន ស្ថិតនៅភូមិប្រាសាទ ឃុំអូរបីជាន់ស្រុកអូរជ្រៅ។

កាលពីព្រឹកថ្ងៃទី២០ ខែឧសភា ឆ្នាំ២០២៥ នៅក្បែរដំបូកព្រៃព្រិចស្ថិតនៅភូមិបឹងស្នោ ឃុំស្លក្រាម ស្រុកស្វាយចេក មានប្រជាពលរដ្ឋទៅឃ្វាលគោបានប្រទះឃើញរថយន្តសេរីទំនើប២គ្រឿងបានឈប់កណ្តាលព្រៃហើយជីកកប់សាកសពក្បែរដំបូកក្នុងព្រៃព្រិចហើយបានបើករថយន្តចេញទៅបាត់ ដោយមានការសង្ស័យបានរាយការណ៍ជូនអាជ្ញាធរមូលដ្ឋានប្រាប់ទៅសមត្តកិច្ច ឃើញប្រមាណជាង២០នាក់ មានកម្លាំងនគរបាល កងរាជអាវុធហត្ថ យោធាការពារព្រំដែន នគរបាលការពារព្រំដែន និងមន្ត្រីជំនាញចុះមកពិនិត្យជីកកាយប្រទះឃើញសាកសពជាបុរសដែលមានសម្បុរសអាចជនជាតិបរទេស។

ក្រោយកម្លាំងជំនាញពិនិត្យនិងធ្វើកោសលវិច្ឆ័យហើយសាកសពជនរងគ្រោះដែលមិនបានដឹងពីអត្តសញ្ញាណ ដឹកសាកសពទៅតម្កល់ទុកក្នុងវត្តអូរបីជាន់ហើយកម្លាំងនគរបាលព្រហ្មទ័ណ្ឌកម្រិតធ្ងន់ខេត្តនិងកម្លាំងអធិការដ្ឋាននគរបាលស្រុកស្វាយចេកបានស្រាវជ្រាវឃាត់ខ្លួនជនសង្ស័យ៣នាក់ ជាជនបរទេសនិងរថយន្ត២គ្រឿងជារថយន្តសេរីទំនើបម៉ាក់Lexus.LMទាំង២គ្រឿង១គ្រឿងពាក់ផ្លាក់លេខកម្ពុជាS.T-1001និង១គ្រឿងទៀតពាក់ផ្លាក់លេខភ្នំពេញ2CA-6968ដែលឃាត់នៅការដ្ឋានចិនស្ថិតនៅភូមិប្រាសាទ ឃុំអូរបីជាន់ ស្រុកអូរជ្រៅ។

ក្រោយកម្លាំងជំនាញបានឃាត់ខ្លួនជនសង្ស័យទាំង៣នាក់ កម្លាំងការិយាល័យព្រហ្មទ័ណ្ឌកម្រិតធ្ងន់ខេត្តបន្ទាយមានជ័យ បានយកជនជនសង្ស័យ៣នាក់និងរថយន្តសេរីទំនើប២គ្រឿងមកស្នងការដ្ឋាននគរបាលខេត្តបន្ទាយមានជ័យដើម្បីអនុវត្តន៍តាមនីតិវិធីបន្ត៕