ច្បាស់ការណ៍ហើយ, មានក្រុមអាជីវករលក់មាសនៅផ្សារតាខ្មៅចំនួន៥តូបលក់លើចិញ្ចើមផ្លូវ និងមានក្រុមអាជីវករលក់មាសជាច្រើនទៀតធ្វើស្លាក់យីហោ និងសំយ៉ាបរំលោភផ្លូវរំលោភលើដីចំណីផ្លូវ

(កណ្ដាល)៖ បន្ទាប់ពីមានការចុះផ្សាយពាក់ព័ន្ធ«ក្រុមអ្នកលក់មាសផ្សារតាខ្មៅចាស់ជាច្រើននាក់បានកំពុងរំលោភយកដីចំណីផ្លូវរដ្ឋធ្វើអាជីវកម្ម» លោក ណុប ដារ៉ា អភិបាលរងខេត្តកណ្តាល លោក ឃឹម សំភារ អភិបាលក្រុងតាខ្មៅ កាលពីព្រឹកថ្ងៃទី២១ ខែមេសា ឆ្នាំ ២០២៥នេះ បានដឹកនាំក្រុមការងាររដ្ឋបាលក្រុងតាខ្មៅ អាជ្ញាធរសង្កាត់តាខ្មៅ មន្ត្រីជំនាញពាក់ព័ន្ធ សមត្ថកិច្ចចរាចរណ៍នៃអធិដ្ឋាននគរបាលក្រុងតាខ្មៅចុះពិនិត្យ និងជម្រាបដំណឹងដល់បងប្អូនអាជីវករ លក់ដូរ ដែលមានលំនៅដ្ឋានតាមសងខាងផ្លូវ២០៥ នៅខាងកើតផ្សារតាខ្មៅចាស់ ស្តីពីការរៀបចំសណ្តាប់ធ្នាប់ឲ្យបានល្អក្នងក្រុងតាខ្មៅ និងសូមឲ្យបងប្អូនសហការក្នុងការងារនេះ ជាមួយអាជ្ញាធរ។

ប្រភពច្បាស់ការណ៍បានឲ្យដឹងថា ការចុះស្រង់ស្ថិតិ ប្រជាពលរដ្ឋរំលោភលើដីចំណីផ្លូវលេខ២០៥ ភូមិតាខ្មៅ១ សង្កាត់តាខ្មៅ ក្រុងតាខ្មៅ ខេត្តកណ្តាល បន្ទាប់ពីទទួលបានការណែនាំពីលោកអភិបាល នៃគណៈអភិបាលក្រុងតាខ្មៅ រដ្ឋបាលសង្កាត់តាខ្មៅទទួលបានលទ្ធផលថា៖ ក្រុមការងារបច្ចេកទេសរបស់រដ្ឋបាលក្រុងបានកំណត់យកផ្លូវថ្មើរជើង ដែលជាចំណីផ្លូវម្ខាង២ម៉ែត្រ)។ប្រជាពលរដ្ឋរស់នៅអមសងខាងផ្លូវមានចំនួន៦៣គ្រួសារ។ក្នុងចំណោម៦៣គ្រួសារ មានចំនួន៣៤គ្រួសារ បានលក់ដូរ និងសង់សំយ៉ាបរំលោភលើដីចំណីផ្លូវ។

ប្រភពបានបន្តថា ចំពោះសកម្មភាពរំលោភលើដីចំណីផ្លូវគឺមានតូបលក់ដូរ និងដាក់តាំងលក់ដូរចំនួន២៣កន្លែង។ បានរំលោភលើដីចំណីផ្លូវ ដោយសាងសង់សំយ៉ាបមានចំនួន២៥សំយ៉ាប។

ប្រភពបានបញ្ជាក់ឲ្យច្បាស់ថា ចំពោះអាជីវករលក់មាសនៅផ្សារតាខ្មៅ ជាផ្សារសង់ថ្មី មានចំនួន៥តូប ដែលបានលក់លើចិញ្ចើមផ្លូវ។ ក្រៅពីនោះទូរតាំងមាសផុតពីចំណីផ្លូវ ប៉ុន្តែស្លាក់យីហោ និងសំយ៉ាបគឺរំលោភផ្លូវ និងរំលោភលើដីចំណីផ្លូវតែម្ដង។

ពាក់ព័ន្ធករណីនេះ ក៏មានអាជីវករមួយចំនួនខ្សឹបប្រាប់ឲ្យដឹងថា ការសាងសង់របស់គាត់គឺគាត់បានសុំច្បាប់ត្រឹមត្រូវពីអាជ្ញាធរមូលដ្ឋាន។ ប៉ុន្តែលោក ឃឹម សំភារ អភិបាលក្រុងតាខ្មៅបានបដិសេធថា រដ្ឋបាលក្រុងតាខ្មៅមិនដែលអនុញ្ញាតច្បាប់ឲ្យសាងសង់នោះទេ។ លោកនឹងស្រាវជ្រាវករណីនេះថាតើអាជ្ញាធរមូលដ្ឋានណាដែលអនុញ្ញាតឲ្យអាជីវករសាងសង់ទាំងបំពានច្បាប់បែបនេះ។

ទាក់ទិនករណីនេះ សាធារណជននៅតែទន្ទឹងរង់ចាំមើលពីការអនុវត្តន៍របស់អាជ្ញាធរសង្កាត់តាខ្មៅ ក្រុងតាខ្មៅ និងរដ្ឋបាលខេត្តកណ្ដាលថាតើមានប្រសិទ្ធភាពកម្រិតណា ដើម្បីរំដោះចំណីផ្លូវ និងចិញ្ចើមផ្លូវ២០៥ពីការរំលោភយកយ៉ាងអាណាធិបតេយ្យពីសំណាក់ក្រុមអាជីវករខាងលើនោះ៕