កីឡាករបាល់ទាត់ម្នាក់របស់ក្រុមយុវជនខណ្ឌមានជ័យ KMN-FC បានស្លាប់ចោលប្រពន្ធនិងកូនតូចទើបនឹងកើត បន្ទាប់ពីជួបគ្រោះថ្នាក់ចរាចរណ៍ នៅក្រុងតាខ្មៅ
(កណ្ដាល)៖ ខណៈភ្លៀងកំពុងធ្លាក់ ក៏កើតមានគ្រោះថ្នាក់ចរាចរណ៍ដ៏រន្ធត់មួយ ដោយបុរសម្នាក់ដែលគេស្គាល់ថា ជាកីឡាករបាល់ទាត់ (ពាក់លេខ២២) របស់ក្រុមយុវជនខណ្ឌមានជ័យ KMN-FC បានជិះម៉ូតូ HONDA SCOOPY ពណ៍ខ្មៅ ស្លាកលេខកណ្ដាល 1AA-4124 ក្នុងល្បឿនលឿន មិនប្រយ័ត្នក៏ជ្រុលទៅបុកពីក្រោយរថយន្តដឹកសំរាម ក្រុមហ៊ុនសុិនទ្រី (មិនមានស្លាកលេខ) បណ្តាលឲ្យបុរសម្នាក់ជាអ្នកបើកម៉ូតូរងរបួសធ្ងន់ធ្ងរ និងស្លាប់នៅឯមន្ទីរពេទ្យ។
ហេតុការណ៍នេះស្ថិតនៅផ្លូវលេខ២១ ជិតហាង ZANDO ក្នុងសង្កាត់តាខ្មៅ ក្រុងតាខ្មៅ ខេត្តកណ្ដាល កាលពីវេលាម៉ោង១១:៤៥នាទីយប់ ថ្ងៃទី១ ខែឧសភា ឆ្នាំ២០២៥នេះ។
ភ្លាមៗលោកវរសេនីយ៍ឯក យី វណ្ណដាអធិការក្រុងតាខ្មៅបានចាត់ឲ្យកម្លាំងជំនាញផ្នែកចរាចរណ៍ផ្លូវគោកក្រុងតាខ្មៅ ចុះអន្តរាគមន៍ ធ្វេីការវាស់វែងរួចយកទៅរក្សាទុករង់ចាំដោះស្រាយពេលក្រោយ និងទាក់ទងរថយន្តសង្គ្រោះមន្ទីរពេទ្យបង្អែកជ័យជំនះ មកដឹកជនរងគ្រោះយកទៅសង្គ្រោះ ដោយស្ថានភាពរបួសធ្ងន់ធ្ងរពេកជនរងគ្រោះបានស្លាប់ហើយ៕
