ខ្លាំងមែន, លោកស្រី ជៀម សំរិតសោភា នៅតែអាចឈរជើងធ្វើការនៅក្នុងសង្កាត់តាខ្មៅជាធម្មតា ទោះបីមានការណែនាំពីរដ្ឋមន្ត្រីមហាផ្ទៃឲ្យរដ្ឋបាលខេត្តកណ្ដាលបញ្ចប់មុខងារពីជំនួយការរដ្ឋបាលសង្កាត់តាខ្មៅហើយក៏ដោយ!

(កណ្ដាល) មនុស្សក្នុងសង្គមបានលើជាចម្ងល់ថា តើមកទល់ពេលនេះ រដ្ឋបាលខេត្តកណ្តាលបានធ្វើលិខិតណែនាំទៅរដ្ឋបាលសង្កាត់តាខ្មៅឱ្យបញ្ចប់មុខងារលោកស្រី ជៀម សំរិតសោភា ពីជំនួយការរដ្ឋបាលសង្កាត់តាខ្មៅហើយឬនៅ ហេតុអ្វីបុគ្គលរូបនៅតែអាចឈរជើងធ្វើនៅក្នុងសង្កាត់បាន?

រហូតមកដល់ពេលបច្ចុប្បន្ននេះ គេនៅមិនទាន់មានព័ត៌មានច្បាស់លាស់អំពីការចេញលិខិតណែនាំពីរដ្ឋបាលខេត្តកណ្តាលនៅឡើយនោះទេ ទោះបីជាមានឯកសារផ្លូវការណែនាំឲ្យបញ្ចប់មុខងាររបស់លោកស្រី ជៀម សំរិតសោភា ពីតំណែងជាជំនួយការរដ្ឋបាលសង្កាត់តាខ្មៅរួចហើយក៏ដោយ។ ការដែលបុគ្គលរូបនេះនៅតែអាចបន្តធ្វើការនៅក្នុងស្ថាប័នបែបនេះបាន ធ្វើឲ្យមានសំណួរលើកឡើងពីភាពសមរម្យ និងតម្លាភាពក្នុងការគ្រប់គ្រងបុគ្គលិករដ្ឋបាល។

បើយោងតាមសេចក្ដីជូនដំណឹងលេខ ៦៨៩ ស.ជ.ណ ចុះថ្ងៃទី០៥ ខេមីនា ឆ្នាំ២០២៥ ស្តីពីលទ្ធផល នៃការធ្វើអធិការកិច្ច ពាក់ព័ន្ធនឹងពាក្យបណ្ដឹង ចុះថ្ងៃទី១៩ ខែកក្កដា ឆ្នាំ២០២១ របស់លោកវរសេនីយ៍ត្រី ហោ សំអុល អតីតនាយប៉ុស្តិ៍នគរបាលរដ្ឋបាលតាខ្មៅ។ និងពាក្យបណ្តឹង ចុះថ្ងៃទី១៩ ខែកក្កដា ឆ្នាំ២០២១ របស់លោកវរសេនីយ៍ត្រី ហោ សំអុល អតីត នាយប៉ុស្តិ៍នគរបាលរដ្ឋបាលតាខ្មៅ មានទីលំនៅផ្ទះលេខ៦៥ ផ្លូវលេខ២ ភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាលបានបានប្ដឹងមនុស្ស៤នាក់ទៅក្រសួងមហាផ្ទៃថា ១.លោក ជៀម សំរិតធី មន្ត្រីនគរបាល គ្រឿងញៀន នៃអធិការដ្ឋាននគរបាលក្រុងតាខ្មៅ ស្នងការដ្ឋាននគរបាលខេត្តកណ្តាល ២.លោក ជៀម ខូយ ចៅសង្កាត់តាខ្មៅ ៣.លោក សុខ សុផា ស្មៀនសង្កាត់តាខ្មៅ, ៤.លោកស្រី ជៀម សំរិតសោភា ជាអ្នកសរសេរលើសំបុត្រកំណើត(កាន់ឯកសាររត់ការ)ពី «រំលោភអំណាច និងប្រព្រឹត្តអំពើពុករលួយ»។

នៅក្នុង ស.ជ.ណ ក្រសួងមហាផ្ទៃបានប្រគល់ភារកិច្ចជូនរដ្ឋបាលខេត្តកណ្តាលធ្វើលិខិតណែនាំទៅរដ្ឋបាលសង្កាត់តាខ្មៅឱ្យបញ្ចប់មុខងារលោកស្រី ជៀម សំរិតសោភា ពីជំនួយការរដ្ឋបាលសង្កាត់តាខ្មៅ ក្រុងតាខ្មៅ ខេត្តកណ្តាលហើយ។

បើតាមប្រភពពច្បាស់ការណ៍បានឲ្យដឹងថា លោកស្រី ជៀម សំរិតសោភា ជាកូនស្រីបង្កើតរបស់លោក ជៀម ខូយ ចៅសង្កាត់តាខ្មៅនៅតែមកអង្គុយក្នុងរដ្ឋបាលសង្កាត់ធ្វើការជាធម្មតា ដូចមិនខ្វល់ខ្វាយពីស.ជ.ណដែលចេញដោយក្រសួងមហាផ្ទៃនោះទេ។

ប្រភពបានស្នើដល់លោក គួច ចំរើន អភិបាលខេត្តកណ្ដាលឲ្យជួយចាត់មន្ត្រីជំនាញពិនិត្យមើលលើករណីនេះផង។

សាធារណៈជនក៏បានស្មើសុំឲ្យលោកនាយឧត្តមសេនីយ៍ ស ថេត អគ្គស្នងការនៃអគ្គស្នងការដ្ឋាននគរបាលជាតិឆាប់ចាប់ផ្ដើមអនុវត្តនីតិវិធីច្បាប់ទៅលើលោក ជៀម ខូយ ចៅសង្កាត់តាខ្មៅ ក្រុងតាខ្មៅ ខេត្តកណ្តាល ដែលបានចេញសំបុត្របញ្ជាក់កំណើតឱ្យជនជាតិវៀតណាម ដែលជាជនបរទេសអន្តោប្រវេសន៍ផង៕