លោក ណុប តារា បានជួយបញ្ចប់ករណីវិវាទរវាងពលរដ្ឋ១គ្រួសារ ជាមួយក្រុមហ៊ុនសាងសង់ផ្លូវក្រោមដំណោះស្រាយ ឈ្នះ ឈ្នះ ទាំងអស់គ្នា

(កណ្ដាល)៖ លោក ណុប តារា អភិបាលរងខេត្តកណ្ដាលនិងជាមន្រ្តីមានសមត្ថភាព និងស្មោះត្រង់ម្នាក់ ដែលតែងតែឆ្លើយតបនឹងបញ្ហានានារបស់ពលរដ្ឋក្នុងខេត្តកណ្ដាលដោយការខិតខំប្រឹងប្រែង និងមានទឹកចិត្តចង់អភិវឌ្ឍសង្គម។ លោកមានឆន្ទៈខ្ពង់ខ្ពស់ក្នុងការបម្រើជាតិ និងជួយដល់ប្រជាជនដែលកំពុងប្រឈមមុខនឹងបញ្ហាជីវភាព។ ជាការពិត លោកគឺជាមន្រ្តីឧស្សាហ៍ព្យាយាមដោះស្រាយបញ្ហាដោយភាពយកចិត្តទុកដាក់ និងឆ្លាតវៃ ដែលបានបង្កើតការជឿទុកចិត្តយ៉ាងខ្លាំងពីសំណាក់សាធារណជន។

ដោយសារបទពិសោធន៍ និងការយល់ដឹងជ្រៅជ្រះអំពីបញ្ហាសង្គម ព្រមទាំងមានទំនាក់ទំនងល្អជាមួយប្រជាពលរដ្ឋ លោកតែងតែចង់ឃើញសង្គមមានសុខសាន្ត និងប្រជាពលរដ្ឋរស់នៅក្នុងភាពសុវត្ថិភាព និងស្មើភាពក្នុងការទទួលបានសេវាផ្លូវរដ្ឋ។

ជាក់ស្ដែងនៅរសៀលថ្ងៃទី២៣ ខែមេសា ឆ្នាំ២០២៥នេះ ក្នុងនាមជាអ្នកតំណាងឱ្យលោកអភិបាលខេត្តកណ្តាល លោក ណុប ដារ៉ា អភិបាលរងខេត្តបានដឹកនាំកិច្ចប្រជុំដើម្បីសម្របសម្រួលករណីវិវាទរវាងប្រជាពលរដ្ឋចំនួន០១គ្រួសារ ជាមួយក្រុមហ៊ុនសាងសង់ផ្លូវ ស្ថិតនៅភូមិអន្លង់ស្លែង ឃុំសំបួរមាស ស្រុកមុខកំពូល។

ជាលទ្ធផលចំពោះករណីវិវាទនេះ លោកអភិបាលរងខេត្តបានព្យាយាម ខិតខំសម្របសម្រួលរហូតត្រូវបានបញ្ចប់ក្រោមដំណោះស្រាយ ឈ្នះ ឈ្នះ ទាំងអស់ ដោយភាគីទាំងសងខាង បានឯកភាពព្រមព្រៀងគ្នាគោរព និងអនុវត្តតាមលក្ខខណ្ឌមួយចំនួន ប្រកបដោយភាពស្និទ្ធស្នាល និងសម្បាយរីករាយបំផុត៕