សំណុំរឿងរបស់ឈ្មោះ សម្បត្តិ កុសល ប្ដឹងឈ្មោះ ចិន ស្រីដា និងឈ្មោះ ទី ប្រាថ្នា ពីបទប៉ុនប៉ងសូកប៉ាន់ ត្រូវបានអយ្យការអមសាលាដំបូងខេត្តសៀមរាបផ្ទេរជូនទៅអង្គភាពប្រឆាំងអំពើពុករលួយវិញហើយ
(សៀមរាម)៖ អយ្យការអមសាលាដំបូងខេត្តសៀមរាបបានចេញសេចក្ដីប្រកាសព័ត៌មានស្ដីពីការផ្ទេរសំណុំរឿងរបស់ឈ្មោះ សម្បត្តិ កុសល មន្ត្រីនាយកដ្ឋានវិទ្យុទាក់ទង អគ្គស្នងការដ្ឋាននគរបាលជាតិ ប្ដឹងឈ្មោះ ចិន ស្រីដា និងឈ្មោះ ទី ប្រាថ្នា ពីបទ ប៉ុនប៉ងសូកប៉ាន់ ជូនទៅអង្គភាពប្រឆាំងអំពើពុករលួយ។ នេះបើតាមសេចក្ដីប្រកាសព័ត៌មានរបស់អយ្យការអមសាលាដំបូងខេត្តសៀមរាបដែលអង្គភាព The Mirror News ទទួលបាននៅថ្ងៃទី២១ ខែមេសា ឆ្នាំ២០២៥នេះ។
អ្នកនាំពាក្យនៃអយ្យការអមសាលាដំបូងខេត្តសៀមរាបបានបញ្ជាក់ថា បន្ទាប់ពីអយ្យការអមសាលាដំបូងខេត្តសៀមរាបបានទទួលបណ្តឹងព្រហ្មទណ្ឌពីឈ្មោះ សម្បត្តិ កុសល ភេទប្រុស កើតឆ្នាំ១៩៨៤ ប្តឹងលើ ១.ឈ្មោះ ចិន ស្រីដា ភេទស្រី អាយុ៣០ឆ្នាំ ២.ឈ្មោះ ទី ប្រាថ្នា ភេទប្រុស អាយុ៣១ឆ្នាំ ពីបទ ប៉ុនប៉ងសូកប៉ាន់ ប្រព្រឹត្តនៅក្រុងសៀមរាប ខេត្តសៀមរាប កាលពី អំឡុងឆ្នាំ២០២៣។
ក្រោយពីបានពិនិត្យពាក្យបណ្ដឹង ចម្លើយដើមបណ្តឹងរដ្ឋប្បវេណី ឃើញថា បទល្មើសដែលឈ្មោះ សម្បត្តិ កុសល ប្តឹងចូលមកអយ្យការអមសាលាដំបូងខេត្តសៀមរាប គឺជាប្រភេទនៃបទល្មើសមួយ ក្នុង ចំណោមបទល្មើសពុករលួយដែលជាសមត្ថកិច្ចរបស់អង្គភាពប្រឆាំងអំពើពុករលួយក្នុងការស៊ើបអង្កេត។ ដូច្នេះ អយ្យការអមសាលាដំបូងខេត្តសៀមរាប បានសម្រេចផ្ទេរសំណុំរឿងជូនអង្គភាពប្រឆាំងអំពើ ពុករលួយ ជាសមត្ថកិច្ចតាមនីតិវិធីរួចហើយ។
បើតាមប្រភពបានឲ្យដឹងដែរថា លោកឧត្ដមសេនីយ៍ត្រី សម្បត្តិ កុសល និងប្រពន្ធបានជំពាក់លុយចុងបណ្ដឹងចំនួនជាង២ម៉ឺនដុល្លារ តែ គ្មានលទ្ធភាពរកលុយសងម្ចាស់បំណុល ក៏បានលួងលោមម្ចាស់បំណុលអោយកាត់កងរត់ការចូលក្របខ័ណ្ឌនគរបាលជាតិ។
ប្រភពបានបន្តថា តាមរយៈសារសម្លេងដែលបានផ្សព្វផ្សាយនៅលេីបណ្ដាញសង្គមហ្វេសប៊ុក ទាំងឧត្ដមសេនីយ៍ត្រី សម្បត្តិ កុសល ទាំងប្រពន្ធបានអួតអាងលួងលោម អូសទាញ ម្ចាស់បំណុល ចូលក្របខ័ណ្ឌនគរបាលជាតិ។ តែម្ចាស់បំណុលមិនព្រម។ បន្ទាប់មកបែជាលោកឧត្ដមសេនីយ៍ត្រី សម្បត្តិ កុសល ប្ដឹងម្ចាស់បំណុលពីបទ ប៉ុនប៉ងសូកប៉ាន់ទៅវិញ ។
ប្រភពបន្ថែមថា អ្នកច្បាប់មួយរូបបង្ហេីបថាករណី សម្បត្តិ កុសល ប្ដឹងម្ចាស់បំណុល តាមច្បាប់ ឈ្មោះ សម្បត្តិ កុសល ពិបាកគេចផុតពីសំណាញ់ច្បាប់ណាស់ ព្រោះទង្វើសម្បត្តិ កុសល ជាសកម្មភាព លួងលោមអូសទាញអោយមានការប្រព្រឹត្តអំពើពុករលួយ និង រំលោភអំណាច៕
