នៅព្រឹកថ្ងៃស្អែកនេះ អភិបាលក្រុងតាខ្មៅនឹងដឹកនាំក្រុមការងារចុះទៅពិនិត្យ វាស់វែង ចិញ្ចើមផ្លូវ ទ្រូងផ្លូវ២០៥ ដែលកំពុងត្រូវបានរំលោភយកពីក្រុមអ្នកលក់មាសហើយ!

(កណ្ដាល)៖ មានសង្ឃឹមហើយ បន្ទាប់ពីមានការផ្សព្វផ្សាយពីអង្គភាព The Mirror News ថា «ក្រុមអ្នកលក់មាសផ្សារតាខ្មៅចាស់ជាច្រើននាក់បានកំពុងរំលោភយកដីចំណីផ្លូវរដ្ឋធ្វើអាជីវកម្ម ខណៈអាជ្ញាធរមូលដ្ឋានសង្កាត់-ក្រុងតាខ្មៅមិនមានវិធានផ្លូវច្បាប់ឲ្យបានតឹងរ៉ឹងនៅឡើយ» លោក ឃឹម សំភារ អភិបាលក្រុងតាខ្មៅបានបញ្ជាក់ឲ្យអង្គភាព The Mirror News ដឹងនៅមុននេះថា នៅព្រឹកថ្ងៃស្អែកនេះ លោកនឹងនឹងដឹកនាំក្រុមការងារនឹងចុះទៅពិនិត្យនិងវាស់វែងផ្លូវ២០៥ ដែលកំពុងត្រូវបានរំលោភយកពីក្រុមអ្នកលក់មាសហើយ។

លោកអភិបាលក្រុងបានបញ្ជាក់បន្ថែមថា នៅវេលាម៉ោងប្រមាណជា៨ទៅ៩ព្រឹកស្អែកនេះ លោកនឹងដឹកនាំកម្លាំងចុះទៅវាស់ចិញ្ចើមផ្លូវ ទ្រូងផ្លូវ២០៥ ទាំងអស់ជាមួយអ្នកពាក់ព័ន្ធ ហើយលោកក៏នឹងហៅប្រធានផ្សារផងដែរ ដោយលោកកំពុងតែផ្ទៀងផ្ទាត់មើល។

លោក ឃឹម សំភារ បានបញ្ជាក់ឲ្យដឹងច្បាស់ៗថា ស្អែកនេះ បន្ទាប់ពីវាស់វែង លោកនឹងឲ្យកម្លាំងបាញ់គំនូសដើម្បីឲ្យគេរុះរើ ដោយជំហានដំបូងលោកផ្សព្វផ្សាយដល់ពួកគាត់សិន ហើយនឹងទុកពេលប៉ុន្មានដើម្បីឲ្យគាត់រុះរើ។ លោកសង្កត់ធ្ងន់ថា បើគាត់មិនរុះរើទេ លោកនឹងចាត់ការតាមនីតិវិធី។

លោកអភិបាលក្រុងតាខ្មៅបានប្រាប់ឲ្យដឹងទៀតថា នៅថ្ងៃស្អែកនេះ លោក ណុប តារា អភិបាលរងខេត្តកណ្ដាលទំនេរ លោកក៏នឹងចុះពិនិត្យមើលផងដែរ។

ជាមួយនោះ លោក ឃឹម សំភារ អភិបាលក្រុងតាខ្មៅបានបញ្ជាក់ឲ្យ The Mirror News ដឹងទៀតថា បន្ទាប់ពីលោកចុះពិនិត្យវាស់ចិញ្ចើមផ្លូវ ទ្រូងផ្លូវ២០៥ រួចរាល់ លោកក៏នឹងដឹកនាំកម្លាំងជំនាញទៅរំដោះយកចិញ្ចើមផ្លូវ ដីចំណីផ្លូវសាធារណៈនៅផ្សារកាច់ជ្រុងយកមកគ្រប់គ្រងវិញផងដែរ។

គួរជម្រាបថា នៅចំណុចជុំវិញនិងនៅក្នុងផ្សារកាច់ជ្រុង ស្ថិតនៅក្នុងសង្កាត់តាខ្មៅ ក្រុងតាខ្មៅ ដែលមានសកម្មភាពជួញដូរយ៉ាងសកម្មមួយនៅក្នុងតំបន់ពិតជាបានកំពុងតែបង្ហាញភាពគ្មានសណ្ដាប់ធ្នាប់ កង្វះអនាម័យ និងភាពអាណាធិបតេយ្យជាពិសេសបញ្ហានៃការលក់ដូរដោយអស្ថេរភាព និងអត់មានសណ្ដាប់ធ្នាប់ ផ្លូវសាធារណៈកាន់តែរួមតូចទៅៗ។ ព្រោះមានកន្លែងជាច្រើននៅជុំវិញផ្សារត្រូវបានគេយកមកប្រើសម្រាប់ដាក់តូបលក់ដោយខ្វះស្មើភាព និងគ្មានស្ថានភាពថេរ។ ភាគច្រើនអ្នកលក់យកផ្លូវសាធារណៈជាផ្នែកនៃអាជីវកម្មរបស់ខ្លួន ដោយសាងសង់ជាបណ្តោះអាសន្នបិទផ្លូវចរាចរណ៍ និងបង្កឱ្យមានការចរចារលំបាកសម្រាប់ប្រជាពលរដ្ឋទូទៅ៕