ក្រុមហ៊ុនទឹកស្អាតក្រុងកំពង់ឆ្នាំងបានចាក់ដីចូលទន្លេសាប ត្រូវបានអាជ្ញាធរទន្លេសាប បញ្ជាឲ្យកាយចេញវិញឲ្យអស់

(កំពង់ឆ្នាំង)៖ បន្ទាបពីទទួលបានការណែនាំដ៏ពី លោក ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប នាព្រឹកថ្ងៃសៅរ៍ ទី១៩ ខែមេសា ឆ្នាំ២០២៥ ក្រុមអាជ្ញាធរទន្លេសាបថ្នាក់ជាតិ និងថ្នាក់ខេត្តដឹកនាំដោយលោក ហ៊ែល តូនី អនុប្រធានក្តាប់រួមអាជ្ញាធរទន្លេសាប និងលោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងចុះពិនិត្យករណីចាក់ដីចូលក្នុងទន្លេសាប ស្ថិតក្នុងភូមិសាស្រ្តភូមិទី១ សង្កាត់ខ្សាម និងភូមិចុងកោះ សង្កាត់ផ្សារឆ្នាំង ក្រុងកំពង់ឆ្នាំង ខេត្តកំពង់ឆ្នាំង និងបានបញ្ជាឲ្យក្រុមហ៊ុនទឹកស្អាតក្រុងកំពង់ឆ្នាំងកាយដីចេញវិញឲ្យអស់។

គួរបញ្ជាក់ថា ក្រុមការងារថ្នាក់ជាតិ និងថ្នាក់ខេត្ត បានចុះពិនិត្យដល់ទីតាំងជាក់ស្តែង និងប្រជុំពិភាក្សាដោះស្រាយចំពោះករណីក្រុមហ៊ុនទឹកស្អាតបានចាក់ដីបំពានចូលទន្លេសាប ដែលបង្កផលប៉ះពាល់ជាអវិជ្ជមានដល់លំហូរទឹកធម្មជាតិរបស់ទន្លេសាប ហើយជាបទល្មើស បានចែងក្នុងបទបញ្ញត្តិនៅក្នុងមាត្រាទី ១២ និងមាត្រាទី ៣៦ នៃច្បាប់ ស្តីពីការគ្រប់គ្រងធនធានទឹកនៅក្នុងព្រះរាជាណាចក្រកម្ពុជា។

អង្គប្រជុំក៏បានសម្រេច នឹងរៀបចំកិច្ចប្រជុំពិភាក្សាលម្អិតជាលក្ខណៈបច្ចេកទេសនៅសប្តាហ៍ក្រោយជាមួយក្រសួង ស្ថាប័នជំនាញ ដើម្បីឱ្យក្រុមហ៊ុន មានលទ្ធភាពធ្វើការផ្គត់ផ្គង់ទឹកស្អាតបម្រើសេចក្តីត្រូវការប្រចាំថ្ងៃរបស់ប្រជាជនក្នុងខេត្តកំពង់ឆ្នាំង ដោយបញ្ចៀសហេតុផលប៉ះពាល់ជាអវិជ្ជមានដល់លំហូរទឹកធម្មជាតិ និងប្រព័ន្ធអេកូឡូស៊ីរបស់ទន្លេសាប៕