សំណុំរឿងរវាងឈ្មោះ ចិន ស្រីដា ឈ្មោះ សម្បត្តិ កុសល និងឈ្មោះ រាំង ភិរម្យ ត្រូវបានសាលាដំបូង និងអយ្យការអមសាលាដំបូងខេត្តសៀមរាប ប្រកាសព័ត៌មាន

(សៀមរាប)) អ្នកនាំពាក្យសាលាដំបូង និងអយ្យការអមសាលាដំបូងខេត្តសៀមរាបបានឲ្យដឹងថា នាពេលថ្មីៗនេះមានការចុះផ្សាយសារព័ត៌មាន ជាបន្តបន្ទាប់ពាក់ព័ន្ធនឹងករណីបណ្ដឹងរវាងឈ្មោះ ចិន ស្រីដា ឈ្មោះ សម្បត្តិ កុសល និងឈ្មោះ រ៉ាំង ភិរម្យ ហើយមានការលើកឡើងថា បណ្តឹងរបស់ឈ្មោះ ចិន ស្រីដា ដែលប្ដឹងមកកាន់តុលាការមិនត្រូវបានដោះស្រាយ។

សាលាដំបូង និងអយ្យការអមសាលាដំបូងខេត្តសៀមរាបបញ្ជាក់ថា ករណីសំណុំរឿងរដ្ឋប្បវេណីខាងលើ មកដល់ពេលនេះ សាលាដំបូងខេត្តសៀមរាប មិនដែលបានទទួលនូវបណ្ដឹង ដែលមាន ឈ្មោះ ចិន ស្រីដា ប្តឹងទាមទារប្រាក់ពីឈ្មោះ សម្បត្តិ កុសល ឬឈ្មោះ រ៉ាំង ភិរម្យ នោះឡើយ។

អយ្យការអមសាលាដំបូងខេត្តសៀមរាប បានទទួលចាត់ការសំណុំរឿងព្រហ្មទណ្ឌពាក់ព័ន្ធនឹង ឈ្មោះ ចិន ស្រីដា ឈ្មោះ សម្បត្តិ កុសល និងឈ្មោះ រាំង ភិរម្យ សរុបចំនួន ៥ សំណុំរឿង និងបានចាត់ការ ដូចខាងក្រោម៖

១-សំណុំរឿងព្រហ្មទណ្ឌលេខ ៨៨ ចុះថ្ងៃទី១៧ ខែមករា ឆ្នាំ២០២៤ មានអ្នកប្តឹងឈ្មោះ រ៉ាំង ភិរម្យ ប្តឹងឈ្មោះ ចិន ស្រីដា ពីបទ បរិហារកេរ្តិ៍ជាសាធារណៈ តំណាងអយ្យការបានចេញដីកាតម្កល់រឿងទុកឥត ចាត់ការរួចហើយ។ ឈ្មោះ វាំង ភិរម្យ បានប្តឹងតវ៉ានឹងដីកាតម្កល់រឿងទុកឥតចាត់ការខាងលើទៅ មហាអយ្យការអមសាលាឧទ្ធរណ៍បាត់ដំបង។

២-សំណុំរឿងព្រហ្មទណ្ឌលេខ ៤៧០ ចុះថ្ងៃទី២ ខែមេសា ឆ្នាំ២០២៤ មានអ្នកប្តឹងឈ្មោះ សម្បត្តិ កុសល ប្តឹងឈ្មោះ ចិន ស្រីដា ពីបទ បរិហារកេរ្តិ៍ជាសាធារណៈ តំណាងអយ្យការបានចេញដីកាតម្កល់រឿងទុក ឥតចាត់ការ និងជូនដំណឹងអំពីការសម្រេចនេះទៅឈ្មោះ សម្បត្តិ កុសល តាមនីតិវិធីរួចរាល់។

៣-សំណុំរឿងព្រហ្មទណ្ឌលេខ ៥៨៨ ចុះថ្ងៃទី២៦ ខែមេសា ឆ្នាំ២០២៤ មានអ្នកប្តឹងឈ្មោះ សម្បត្តិ កុសល ប្តឹងឈ្មោះ ចិន ស្រីដា ពីបទ គំរាមកំហែងហែកកេរ្តិ៍។ សំណុំរឿងនេះ តំណាងអយ្យការបានសម្រេច បើកការស៊ើបសួរតាមដីកាសន្និដ្ឋានបញ្ជូនរឿងឱ្យស៊ើបសួរ និងត្រូវបានចៅក្រមស៊ើបសួរបញ្ជូនទៅជំនុំជម្រះ តាមដីកាដំណោះស្រាយ ហើយត្រូវបានចៅក្រមជំនុំជម្រះចេញសាលក្រមលេខ ១៥ “ឃ/១៦១ ចុះថ្ងៃទី១៨ ខែកុម្ភៈ ឆ្នាំ២០២៥ ដោយសម្រេចផ្តន្ទាទោសលើឈ្មោះ ចិន ស្រីដា ដាក់ពន្ធនាគារកំណត់រយៈពេល ២ឆ្នាំ ពីបទគំរាមកំហែងហែកកេរ្តិ៍ និងបង្គាប់ឱ្យចាប់ខ្លួន-ឃុំខ្លួន។ ក្រោយមក ឈ្មោះ ចិន ស្រីដា ត្រូវបានចាប់ខ្លួនយ និងកំពុងឃុំខ្លួននៅពន្ធនាគារខេត្តសៀមរាប តាមអំណាចសាលក្រមខាងលើ ហើយបច្ចុប្បន្នសំណុំរឿង នេះបានបញ្ជូនទៅដល់សាលាឧទ្ធរណ៍បាត់ដំបង តាមបណ្ដឹងឧទ្ធរណ៍របស់មេធាវីរបស់ឈ្មោះ ចិន ស្រីដា។

៤-សំណុំរឿងព្រហ្មទណ្ឌលេខ ១៤៤៩ ចុះថ្ងៃទី៨ ខែវិច្ឆិកា ឆ្នាំ២០២៤ មានអ្នកប្តឹងឈ្មោះ ចិន ស្រីដា ប្តឹងទៅលើឈ្មោះ រ៉ាំង ភិរម្យ ពីបទ ប្តឹងបរិហារបង្កាច់កេរ្តិ៍ តំណាងអយ្យការបានចេញដីកាតម្កល់រឿងទុកឥត ចាត់ការ និងបានជូនដំណឹងអំពីការសម្រេចនេះទៅឈ្មោះ ចិន ស្រីដា តាមនីតិវិធីរួចរាល់។

៥-សំណុំរឿងព្រហ្មទណ្ឌលេខ ៣៧ ចុះថ្ងៃទី០៣ ខែមករា ឆ្នាំ២០២៥ មានអ្នកប្តឹងឈ្មោះ សម្បត្តិ កុសល ប្តឹងទៅលើ១.ឈ្មោះ ចិន ស្រីដា ២.ឈ្មោះ ទី ប្រាថ្នា ពីបទ ប៉ុនប៉ងសូកប៉ាន់។ បច្ចុប្បន្ន សំណុំរឿង កំពុងស្ថិតនៅក្នុងចំណាត់ការអង្កេតរបស់តំណាងអយ្យការ។

ក្រៅពីសំណុំរឿងព្រហ្មទណ្ឌទាំង ៥ ខាងលើនេះ ឈ្មោះ ចិន ស្រីដា ក៏មានសំណុំរឿងព្រហ្មទណ្ឌ ៤ សំណុំរឿងផ្សេងទៀត ជាមួយបុគ្គលដទៃ ហើយត្រូវបានសាលាដំបូង និងអយ្យការអមសាលាដំបូងខេត្ត សៀមរាប ចាត់ការតាមនីតិវិធីរួចរាល់អស់ហើយដែរ។

អ្នកនាំពាក្យសាលាដំបូង និងអយ្យការអមសាលាដំបូងខេត្តសៀមរាប សូមបញ្ជាក់ថា ចំពោះរឿងក្តីជំពាក់ប្រាក់ កូនបំណុលមានកាតព្វកិច្ចត្រូវសងប្រាក់ទៅម្ចាស់បំណុលវិញដោយ ស្ម័គ្រចិត្ត ក្នុងករណីកូនបំណុលមិនអនុវត្តកាតព្វកិច្ចខ្លួន ម្ចាស់បំណុលត្រូវប្តឹងទាមទារប្រាក់ទៅតុលាការតាម នីតិវិធីរដ្ឋប្បវេណី ដោយភ្ជាប់ជាមួយនឹងភស្តុតាងតាមផ្លូវច្បាប់នៃការខ្ចីប្រាក់នោះ។ ប្រសិនបើមានបណ្ដឹង ទាក់ទងនឹងប្រាក់ជំពាក់នេះ មានភស្តុតាងតាមផ្លូវច្បាប់គ្រប់គ្រាន់ត្រូវបានដាក់មកនោះ សាលាដំបូងខេត្ត សៀមរាបនឹងសម្រេចផ្តល់យុត្តិធម៌ ហើយធានាថាកូនបំណុលនឹងត្រូវសងប្រាក់ទៅឱ្យម្ចាស់បំណុលតាមផ្លូវ ច្បាប់ និងនីតិវិធីជាធរមាន។

ដោយឡែក ចំពោះរឿងក្តីព្រហ្មទណ្ឌ ត្រូវដោះស្រាយតាមនីតិវិធីព្រហ្មទណ្ឌ ប្រសិនបើបុគ្គលណាមួយ បានប្រព្រឹត្តកំហុសដែលបង្កើតជាបទល្មើសព្រហ្មទណ្ឌ បុគ្គលដែលរងគ្រោះដោយសារអំពើនោះ អាចប្តឹង មកកាន់អយ្យការអមសាលាដំបូងខេត្ត ដើម្បីចាត់ការតាមនីតិវិធីច្បាប់។ នៅក្នុងដំណើរការនៃរឿងក្តីព្រហ្មទណ្ឌ បុគ្គលដែលមិនចូលខ្លួនតាមនីតិវិធី តុលាការមានសិទ្ធិផ្នែកអាជ្ញាក្នុងការចេញដីកានានា ដោយរួមទាំងដីកា បង្គាប់ឱ្យនាំខ្លួន ឬ ចាប់ខ្លួន ឬ ឃុំខ្លួនជាបណ្តោះអាសន្ន ដើម្បីបម្រើឱ្យការអនុវត្តនីតិវិធី។

ដូច្នេះការលើកឡើងថា «ម្ចាស់បំណុលមិនបានទទួលការសងប្រាក់ពីកូនបំណុល ហើយបែរជាម្ចាស់ បំណុលត្រូវជាប់ពន្ធនាគារ» គឺជាការលើកឡើងមិនត្រឹមត្រូវនោះទេ ព្រោះថាការជាប់ពន្ធនាគាររបស់ ឈ្មោះ ចិន ស្រីដា គឺជាការទទួលខុសត្រូវក្នុងរឿងក្តីព្រហ្មទណ្ឌ និងការលើកឡើងថា «ការប្តឹងមកតុលាការមិន ទទួលបានដំណោះស្រាយនោះ» ក៏ពុំមែនជាការពិតដែរ ព្រោះសាលាដំបូងខេត្តសៀមរាប មិនដែលទទួល បានបណ្ដឹងទាមទារប្រាក់ ពីឈ្មោះ ចិន ស្រីដា ឡើយ៕