ឯកឧត្តម ហាក់ សុខមករា ដឹកនាំកម្លាំងចម្រុះបង្ក្រាបបទល្មើសនេសាទនៅតំបន់អតីតឡូតិ៍ រឹបអូសស្បៃមុងជាង ២០គីឡូម៉ែត្រ និងលែងត្រី ៦៧០គីឡូក្រាម

(កណ្តាល)៖ កម្លាំងចម្រុះដឹកនាំដោយឯកឧត្តម ហាក់ សុខមករា អភិបាលរងខេត្តកណ្តាល នៅព្រឹកថ្ងៃទី២៣ ខែតុលា ឆ្នាំ២០២៦ បានចុះប្រតិបត្តិការបង្ក្រាបបទល្មើសជលផលនៅតំបន់អតីតឡូតិ៍នេសាទ ក្នុងភូមិសាស្ត្រស្រុកកោះធំ ក្រុងសំពៅពូន និងស្រុកលើកដែក ដោយប្រមូលឧបករណ៍នេសាទខុសច្បាប់ជាច្រើន និងលែងត្រីចម្រុះចូលក្នុងទឹកធម្មជាតិវិញចំនួន ៦៧០គីឡូក្រាម។

ប្រតិបត្តិការនេះធ្វើឡើងក្រោមការចង្អុលបង្ហាញរបស់ឯកឧត្តម គួច ចំរើន អភិបាលខេត្តកណ្តាល ដោយមានការចូលរួមពីកងរាជអាវុធហត្ថ នគរបាលជាតិ មន្ត្រីជំនាញរដ្ឋបាលជលផល និងអាជ្ញាធរមូលដ្ឋាន ដើម្បីទប់ស្កាត់ការនេសាទខុសច្បាប់ និងការពារធនធានមច្ឆជាតិ។

លទ្ធផលបង្ក្រាបនៅតាមតំបន់ទាំង៣ រួមមាន៖
ក្រុងសំពៅពូន៖ រុះរើស្បៃមុងមាត់លូចំនួន ៤៥មាត់ របាំងស្បៃមុងប្រវែង ២.៥០០ម៉ែត្រ បង្គោល ៨៣៣ដើម និងលែងត្រី ២៥០គីឡូក្រាម។

ស្រុកកោះធំ៖ រុះរើស្បៃមុងមាត់លូចំនួន ៤៤មាត់ របាំងស្បៃមុងប្រវែង ៥.៤៥០ម៉ែត្រ បង្គោល ១.៩៥០ដើម និងលែងត្រី ១៥០គីឡូក្រាម។

ស្រុកលើកដែក៖ រុះរើស្បៃមុងមាត់លូចំនួន ៦៧មាត់ របាំងស្បៃមុងប្រវែង ១២.៨៥០ម៉ែត្រ បង្គោល ៤.៤០០ដើម និងលែងត្រី ២៧០គីឡូក្រាម។ ក្នុងនោះ ប្រជានេសាទចំនួន ១២គ្រួសារ បានរុះរើឧបករណ៍នេសាទដោយខ្លួនឯង។

សរុបលទ្ធផល កម្លាំងចម្រុះបានប្រមូលស្បៃមុងមាត់លូចំនួន ១៥៦មាត់ របាំងស្បៃមុងប្រវែង ២០.៨០០ម៉ែត្រ និងបង្គោលចំនួន ៧.១៨៣ដើម ព្រមទាំងលែងត្រីចម្រុះចំនួន ៦៧០គីឡូក្រាម។ ឧបករណ៍នេសាទខុសច្បាប់ដែលប្រមូលបាន ត្រូវបានដុតបំផ្លាញនៅនឹងកន្លែង។

ឯកឧត្តម ហាក់ សុខមករា បានបញ្ជាក់ថា អាជ្ញាធរនឹងបន្តចុះត្រួតពិនិត្យ និងបង្ក្រាបបទល្មើសនេសាទជាប្រចាំ ដោយមិនបញ្ចប់ត្រឹមប្រតិបត្តិការមួយលើកនេះឡើយ។ ជាមួយគ្នានេះ សមត្ថកិច្ចកំពុងស្រាវជ្រាវកំណត់អត្តសញ្ញាណអ្នកពាក់ព័ន្ធ ដើម្បីចាត់ការតាមច្បាប់។

អាជ្ញាធរបានអំពាវនាវដល់ប្រជានេសាទទាំងអស់ ឱ្យបញ្ឈប់ការប្រើប្រាស់ឧបករណ៍នេសាទខុសច្បាប់ និងចូលរួមការពារធនធានមច្ឆជាតិ ដើម្បីធានានិរន្តរភាពធនធានជលផលសម្រាប់ប្រជាពលរដ្ឋ និងកូនចៅជំនាន់ក្រោយ។

ជាមួយគ្នានេះ ក្រុមការងារនឹងបន្តប្រមូល និងបំផ្លាញឧបករណ៍នេសាទខុសច្បាប់ដែលនៅសេសសល់ ដើម្បីទប់ស្កាត់បទល្មើស និងការពារធនធានជលផលក្នុងមូលដ្ឋានឱ្យមានប្រសិទ្ធភាព៕