អាជ្ញាធរខេត្តកណ្តាលចុះណែនាំផ្ទាល់ កំណត់ឱ្យកាស៊ីណូដាយអឺមិនស្តូន បញ្ឈប់អាជីវកម្ម Online Betting ត្រឹមខែកញ្ញា ឆ្នាំ២០២៦

(កណ្តាល)៖ ដោយអនុវត្តតាមការណែនាំរបស់រដ្ឋបាលខេត្តកណ្តាល នៅព្រឹកថ្ងៃទី៧ ខែកញ្ញា ឆ្នាំ២០២៦ ឯកឧត្តម ហាក់ សុខមករា អភិបាលរងខេត្តកណ្តាល បានដឹកនាំមន្ទីរ-អង្គភាពពាក់ព័ន្ធ គណៈបញ្ជាការឯកភាពរដ្ឋបាលស្រុកលើកដែក ព្រះរាជអាជ្ញារង និងតំណាងស្ថាប័នពាក់ព័ន្ធ ចុះប្រជុំណែនាំ និងកំណត់ពេលវេលាឱ្យតំណាងកាស៊ីណូ ដាយអឺមិនស្តូន បញ្ឈប់សកម្មភាព Online Betting នៅទីតាំងស្ថិតក្នុងភូមិក្អមសំណក្រោម ឃុំក្អមសំណ ស្រុកលើកដែក ខេត្តកណ្តាល។

ក្នុងកិច្ចប្រជុំនោះ អាជ្ញាធរខេត្តបានបញ្ជាក់ពីគោលការណ៍របស់រាជរដ្ឋាភិបាលពាក់ព័ន្ធនឹងការទប់ស្កាត់ និងលុបបំបាត់ល្បែងស៊ីសងខុសច្បាប់ ជាពិសេសការភ្នាល់តាមប្រព័ន្ធអ៊ីនធឺណិតដែលមិនមានការអនុញ្ញាត ឬមិនស្របតាមលក្ខខណ្ឌដែលបានកំណត់។

តំណាងទីតាំងត្រូវបានណែនាំឱ្យបញ្ឈប់ប្រព័ន្ធប្រតិបត្តិការ Online Betting ឱ្យបានមុនចប់ខែកញ្ញា ឆ្នាំ២០២៦ និងត្រូវសហការជាមួយសមត្ថកិច្ច និងក្រុមការងារពាក់ព័ន្ធក្នុងការត្រួតពិនិត្យទីតាំងជាក់ស្តែង។

អាជ្ញាធរក៏បានព្រមានយ៉ាងច្បាស់ថា ប្រសិនបើម្ចាស់ទីតាំង ឬអ្នកគ្រប់គ្រងនៅតែបន្តលួចលាក់ដំណើរការ ឬមិនអនុវត្តតាមកាលកំណត់ដែលបានណែនាំ នឹងត្រូវប្រឈមនឹងវិធានការតាមផ្លូវច្បាប់យ៉ាងម៉ឺងម៉ាត់។

ចាប់ពីថ្ងៃទី១ ខែតុលា ឆ្នាំ២០២៦ តទៅ ក្រុមការងារពាក់ព័ន្ធ នឹងសហការជាមួយ គ.ល.ក កម្លាំងសមត្ថកិច្ច និងមានការសម្របសម្រួលពីអយ្យការអមសាលាដំបូងខេត្ត ចុះត្រួតពិនិត្យតាមបណ្តាក្រុមហ៊ុន និងកាស៊ីណូក្នុងខេត្តកណ្តាល ដើម្បីពិនិត្យ និងបញ្ជាក់ឱ្យបានច្បាស់លាស់អំពីសកម្មភាពអាជីវកម្ម Online Betting និងការអនុវត្តតាមបទបញ្ជារបស់អាជ្ញាធរ។

វិធានការនេះត្រូវបានមើលឃើញថា ជាការពង្រឹងការអនុវត្តច្បាប់ និងការគ្រប់គ្រងសកម្មភាពល្បែងស៊ីសង ដើម្បីរក្សាសន្តិសុខ សណ្តាប់ធ្នាប់សាធារណៈ និងបរិយាកាសអាជីវកម្មឱ្យស្របតាមច្បាប់៕