ឯកឧត្តម ហ៊ីង ប៊ុនហៀង ថ្លែងអំណរគុណឯកឧត្តម នាយឧត្តមសេនីយ៍ ឈន សារ៉ាណេ និងលោកជំទាវ សែម សម្ផស្សចំពោះការឧបត្ថម្ភស៊ីម៉ង់ត៍ ១០០តោន ដល់សមរភូមិទិសជួរមុខ

(ភ្នំពេញ)៖ ឯកឧត្តម នាយឧត្តមសេនីយ៍កិត្តិសង្គហបណ្ឌិត ហ៊ីង ប៊ុនហៀង អគ្គមេបញ្ជាការង នៃកងយោធពលខេមរភូមិន្ទ និងជាមេបញ្ជាការ បញ្ជាការដ្ឋានអង្គរក្ស នៅថ្ងៃទី៥ ខែកញ្ញា ឆ្នាំ២០២៦ បានសម្តែងនូវការដឹងគុណ និងថ្លែងអំណរគុណយ៉ាងជ្រាលជ្រៅចំពោះ ឯកឧត្តម នាយឧត្តមសេនីយ៍ ឈន សារ៉ាណេ និងលោកជំទាវ សែម សម្ផស្ស ដែលបានឧបត្ថម្ភស៊ីម៉ង់ត៍ចំនួន ១០០តោន ដើម្បីផ្តល់ជូនសមរភូមិទិសជួរមុខ សម្រាប់ប្រើប្រាស់ក្នុងកិច្ចការការពារបូរណភាពទឹកដី។

ការឧបត្ថម្ភស៊ីម៉ង់ត៍ចំនួន ១០០តោននេះ ត្រូវបានមើលឃើញថា ជាការចូលរួមចំណែកដ៏មានតម្លៃក្នុងការគាំទ្រដល់សមរភូមិទិសជួរមុខ និងជួយសម្រួលដល់តម្រូវការសម្ភារៈសម្រាប់កងកម្លាំងដែលកំពុងបំពេញភារកិច្ចការពារ និងថែរក្សាបូរណភាពទឹកដី។

ក្នុងលិខិតថ្លែងអំណរគុណ ឯកឧត្តម នាយឧត្តមសេនីយ៍កិត្តិសង្គហបណ្ឌិត ហ៊ីង ប៊ុនហៀង បានសម្តែងនូវក្តីសោមនស្សរីករាយ និងការដឹងគុណយ៉ាងជ្រាលជ្រៅ ក្នុងនាមមេបញ្ជាការ មេបញ្ជាការរង នាយទាហាន និងពលទាហាន នៃបញ្ជាការដ្ឋានអង្គរក្សទាំងមូល ចំពោះទឹកចិត្តសប្បុរសរបស់ ឯកឧត្តម នាយឧត្តមសេនីយ៍ ឈន សារ៉ាណេ និងលោកជំទាវ សែម សម្ផស្ស។

ឯកឧត្តមបានកោតសរសើរចំពោះសន្តានចិត្តដ៏ថ្លៃថ្លា និងការលះបង់ធនធានផ្ទាល់ខ្លួនរបស់ ឯកឧត្តម នាយឧត្តមសេនីយ៍ និងលោកជំទាវ ក្នុងការចូលរួមគាំទ្រដល់សមរភូមិទិសជួរមុខ។ កាយវិការនេះត្រូវបានចាត់ទុកថា ជាការបង្ហាញពីស្មារតីសាមគ្គីភាព ការចូលរួមចំណែកក្នុងបុព្វហេតុជាតិ និងការយកចិត្តទុកដាក់ចំពោះកងកម្លាំងប្រដាប់អាវុធដែលកំពុងបំពេញភារកិច្ចការពារមាតុភូមិ។

តាមរយៈការឧបត្ថម្ភនេះ ស៊ីម៉ង់ត៍ដែលទទួលបាននឹងត្រូវផ្តល់ជូនសមរភូមិទិសជួរមុខ ដើម្បីប្រើប្រាស់ទៅតាមតម្រូវការជាក់ស្តែង និងចូលរួមចំណែកក្នុងការរៀបចំហេដ្ឋារចនាសម្ព័ន្ធចាំបាច់ សម្រាប់បម្រើដល់ការបំពេញភារកិច្ចរបស់កងកម្លាំងនៅតាមតំបន់ជួរមុខ។

ជាមួយគ្នានេះ ឯកឧត្តម នាយឧត្តមសេនីយ៍កិត្តិសង្គហបណ្ឌិត ហ៊ីង ប៊ុនហៀង បានប្រសិទ្ធពរជ័យជូនចំពោះ ឯកឧត្តម នាយឧត្តមសេនីយ៍ ឈន សារ៉ាណេ និងលោកជំទាវ សែម សម្ផស្ស ព្រមទាំងក្រុមគ្រួសារ សូមប្រកបដោយសុខភាពល្អ សិរីមង្គល វិបុលសុខ និងជោគជ័យគ្រប់ភារកិច្ច ព្រមទាំងទទួលបានពុទ្ធពរទាំងឡាយ ៥ប្រការ គឺ អាយុ វណ្ណៈ សុខៈ ពលៈ និងបដិភាណៈ ជានិច្ចនិរន្តរ៍។

ការឧបត្ថម្ភសម្ភារៈជូនដល់សមរភូមិទិសជួរមុខនេះ គឺជាសក្ខីភាពមួយបង្ហាញពីការចូលរួមរបស់សប្បុរសជន និងបុគ្គលដែលមានស្មារតីស្រឡាញ់ជាតិ ក្នុងការគាំទ្រដល់កងកម្លាំងប្រដាប់អាវុធ និងបុព្វហេតុការពារជាតិ មាតុភូមិ និងបូរណភាពទឹកដី៕