ក្រសួងយុត្តិធម៌កំពុងតាមដាន និងចាត់ការផ្ទៃក្នុងករណីពាក់ព័ន្ធសាលាដំបូងខេត្តស្ទឹងត្រែង ដើម្បីធានាភាពយុត្តិធម៌

(ភ្នំពេញ)៖ ឯកឧត្តម ឯម ច័ន្ទមករា រដ្ឋលេខាធិការ និងជាអ្នកនាំពាក្យក្រសួងយុត្តិធម៌ នៅថ្ងៃទី៣ ខែកញ្ញា ឆ្នាំ២០២៦ បានបញ្ជាក់ថា ក្រសួងយុត្តិធម៌បានទទួលជ្រាប និងកំពុងយកចិត្តទុកដាក់តាមដានយ៉ាងដិតដល់ ចំពោះករណីដែលកើតឡើងនៅសាលាដំបូងខេត្តស្ទឹងត្រែង ពាក់ព័ន្ធនឹងការផ្សព្វផ្សាយថា «តុលាការចាប់ខ្លួនឈ្មោះ ស្លេះ វ៉ើត ដាក់គុករយៈពេលជិត ១ឆ្នាំ ដោយសារចាប់ច្រឡំ»។

ឯកឧត្តម ឯម ច័ន្ទមករា បានឱ្យដឹងថា ក្រសួងយុត្តិធម៌បានឃើញសេចក្តីប្រកាសព័ត៌មានបំភ្លឺរបស់អ្នកនាំពាក្យសាលាដំបូងខេត្តស្ទឹងត្រែង ចុះថ្ងៃទី១ ខែកញ្ញា ឆ្នាំ២០២៦ ព្រមទាំងបានទទួល និងពិនិត្យពាក្យបណ្តឹងតវ៉ារបស់ប្រជាពលរដ្ឋ ដែលបានដាក់ចូលមកកាន់ក្រសួងយុត្តិធម៌។

ចំពោះករណីនេះ ក្រសួងយុត្តិធម៌កំពុងធ្វើចំណាត់ការផ្ទៃក្នុងតាមនីតិវិធី និងក្នុងក្របខណ្ឌសមត្ថកិច្ច ដើម្បីធានាឱ្យមានការពិនិត្យ និងស្វែងរកភាពយុត្តិធម៌ពិតប្រាកដ។

អ្នកនាំពាក្យក្រសួងយុត្តិធម៌បានបញ្ជាក់ថា រាល់ករណីពាក់ព័ន្ធនឹងការអនុវត្តនីតិវិធីតុលាការ ចាំបាច់ត្រូវឆ្លងកាត់ការស្រាវជ្រាវ និងពិនិត្យយ៉ាងល្អិតល្អន់ ដោយយន្តការមានសមត្ថកិច្ច ដើម្បីវាយតម្លៃភាពត្រឹមត្រូវ ឬភាពមិនប្រក្រតីដែលអាចកើតមានក្នុងការអនុវត្តនីតិវិធីរបស់ចៅក្រម និងព្រះរាជអាជ្ញា។

ជាមួយគ្នានេះ រាល់ពាក្យបណ្តឹង ឬពាក្យសុំអន្តរាគមន៍របស់ប្រជាពលរដ្ឋ តែងត្រូវបានក្រសួងយុត្តិធម៌ទទួលយកមកពិនិត្យ និងចាត់ការតាមនីតិវិធីរដ្ឋបាលដោយយកចិត្តទុកដាក់។ ក្រសួងនឹងធ្វើការឆ្លើយតប និងដោះស្រាយក្នុងក្របខណ្ឌសមត្ថកិច្ចតាមច្បាប់ បន្ទាប់ពីមន្ត្រីជំនាញបានធ្វើការត្រួតពិនិត្យ និងសិក្សាស្រាវជ្រាវយ៉ាងហ្មត់ចត់។

ឯកឧត្តម ឯម ច័ន្ទមករា ក៏បានលើកទឹកចិត្តដល់ប្រជាពលរដ្ឋឱ្យប្រើប្រាស់សិទ្ធិតវ៉ាតាមផ្លូវច្បាប់ ឬដាក់លិខិតស្នើសុំអន្តរាគមន៍មកកាន់ក្រសួងយុត្តិធម៌ ដើម្បីឱ្យករណីពាក់ព័ន្ធអាចត្រូវបានពិនិត្យ និងដោះស្រាយតាមនីតិវិធី និងក្របខណ្ឌច្បាប់ជាធរមាន។

ក្រសួងយុត្តិធម៌បញ្ជាក់ថា ករណីនេះកំពុងស្ថិតក្រោមការតាមដាន និងចាត់ការផ្ទៃក្នុង ហើយការសន្និដ្ឋានចុងក្រោយត្រូវរង់ចាំលទ្ធផលនៃការត្រួតពិនិត្យ និងស្រាវជ្រាវរបស់យន្តការមានសមត្ថកិច្ច៕