លោក ហ៊ាង ប៊ុនថា ស្នើជូន «ជីប ម៉ុង» ពិចារណាវិនិយោគលើការបង្កើតសាកលវិទ្យាល័យកម្រិតពិភពលោក ដើម្បីបណ្តុះធនធានមនុស្សខ្មែរ

(ភ្នំពេញ)៖ លោក ហ៊ាង ប៊ុនថា អគ្គនាយកក្រុមហ៊ុន The Mirror News នៅព្រឹកថ្ងៃទី១៦ ខែសីហា ឆ្នាំ២០២៦នេះ បានលើកឡើងជាទស្សនៈ និងសំណើដោយស្មោះជូនដល់ថ្នាក់ដឹកនាំក្រុមហ៊ុន «ជីប ម៉ុង» ឱ្យពិចារណាលើគំនិតបង្កើតសាកលវិទ្យាល័យមួយនៅកម្ពុជា ដែលមានស្តង់ដារគុណភាពខ្ពស់ និងមានសមត្ថភាពបណ្តុះធនធានមនុស្សខ្មែរឱ្យអាចប្រកួតប្រជែងនៅលើឆាកអន្តរជាតិ។

លោក ហ៊ាង ប៊ុនថា បានស្នើជូន អ្នកឧកញ៉ា ភាព ហៀក ប្រធានក្រុមប្រឹក្សាភិបាល, អ្នកឧកញ៉ា លាង ឃុន ប្រធានអគ្គនាយកក្រុមហ៊ុន និងអ្នកឧកញ៉ា លាង ម៉េង អគ្គនាយក ដែលជាស្ថាបនិក និងសហស្ថាបនិកក្រុមហ៊ុន «ជីប ម៉ុង» ឱ្យពិចារណាបង្កើតសាកលវិទ្យាល័យមួយដែលអាចក្លាយជានិមិត្តរូបនៃឧត្តមភាពអប់រំនៅកម្ពុជា។

លោកបញ្ជាក់ថា គោលគំនិតនេះ មិនមែនមានន័យថាចង់ចម្លងសាកលវិទ្យាល័យ Harvard នោះទេ ប៉ុន្តែចង់ឱ្យកម្ពុជាមាន «Harvard របស់កម្ពុជា» ដែលមានអត្តសញ្ញាណ និងគុណតម្លៃជារបស់ខ្លួន ដោយផ្តោតលើការបណ្តុះនិស្សិតឱ្យមានចំណេះដឹងជ្រៅជ្រះ ជំនាញច្បាស់លាស់ សមត្ថភាពស្រាវជ្រាវ ការគិតវិភាគ ការច្នៃប្រឌិត ភាសាអង់គ្លេស បច្ចេកវិទ្យា AI វិន័យ និងសីលធម៌។

លោក ហ៊ាង ប៊ុនថា បានលើកឡើងថា៖ «នេះជាសម័យ AI ហើយ។ កម្ពុជាមិនគួរបណ្តុះយុវជនឱ្យរៀនដើម្បីតែសញ្ញាបត្រទៀតទេ។ យើងត្រូវបណ្តុះពួកគេឱ្យចេះគិត ចេះបង្កើត ចេះស្រាវជ្រាវ ចេះដោះស្រាយបញ្ហា និងចេះដឹកនាំ»។

តាមទស្សនៈរបស់លោក ការវិនិយោគលើវិស័យអប់រំ និងធនធានមនុស្ស គឺជាការវិនិយោគដែលមានតម្លៃយូរអង្វែងបំផុត ព្រោះសាកលវិទ្យាល័យមួយដែលមានគុណភាព មិនត្រឹមតែផលិតអ្នកកាន់សញ្ញាបត្រប៉ុណ្ណោះទេ ប៉ុន្តែអាចបង្កើតអ្នកស្រាវជ្រាវ អ្នកវិទ្យាសាស្ត្រ អ្នកបច្ចេកវិទ្យា សហគ្រិន និងអ្នកដឹកនាំជំនាន់ថ្មីសម្រាប់ប្រទេស។

លោកបន្តថា ប្រសិនបើ «ជីប ម៉ុង» អាចសម្រេចបង្កើតសាកលវិទ្យាល័យដែលមានគុណភាពពិតប្រាកដ និងអាចបណ្តុះធនធានមនុស្សកម្រិតខ្ពស់បាន នោះស្នាដៃនេះមិនមែនជាកេរដំណែលសម្រាប់ក្រុមហ៊ុនតែប៉ុណ្ណោះទេ ប៉ុន្តែអាចក្លាយជាកេរដំណែលសម្រាប់កូនខ្មែរ និងប្រទេសកម្ពុជារាប់ជំនាន់។

លោកបានសង្កត់ធ្ងន់ថា៖ «អគារអាចចាស់ ទ្រព្យសម្បត្តិអាចផ្លាស់ប្តូរ ប៉ុន្តែចំណេះដឹង និងខួរក្បាលមនុស្ស អាចបង្កើតអនាគតប្រទេសមួយបាន»។

ជាមួយគ្នានេះ លោក ហ៊ាង ប៊ុនថា ក៏បានបង្ហាញជំនឿថា ក្រុមហ៊ុន «ជីប ម៉ុង» ដែលមានសក្តានុពល និងបទពិសោធន៍ក្នុងការវិនិយោគ អាចពិចារណាលើគម្រោងដ៏មានអត្ថន័យនេះ ដើម្បីរួមចំណែកពង្រឹងវិស័យអប់រំ និងធនធានមនុស្សកម្ពុជា។

លោកបានស្នើថា៖ «សូម ជីប ម៉ុង ពិចារណា សាងសង់សាកលវិទ្យាល័យសម្រាប់ថ្ងៃនេះ ប៉ុន្តែបណ្តុះមនុស្សសម្រាប់កម្ពុជា ៥០ឆ្នាំទៅមុខ»។

លោក ហ៊ាង ប៊ុនថា បានបញ្ជាក់ថា នេះគឺជាទស្សនៈ និងសំណើដោយស្មោះពីចម្ងាយ ហើយសូមមេត្តាខន្តីអភ័យទោសដល់ស្ថាបនិក និងសហស្ថាបនិកក្រុមហ៊ុន «ជីប ម៉ុង» ប្រសិនបើសំណើនេះមានចំណុចខ្វះខាត ឬមិនសមស្រប។

សំណើនេះត្រូវបានលើកឡើង ដោយមានគោលបំណងជំរុញឱ្យមានការវិនិយោគកាន់តែច្រើនលើ «ខួរក្បាលខ្មែរ» និងការកសាងធនធានមនុស្សសម្រាប់អនាគតកម្ពុជា៕