អាជ្ញាធរឥណ្ឌូនេស៊ីចាប់បានគ្រឿងញៀនជាង១តោន ច្រកក្នុងបាវអង្ករមានអក្សរខ្មែរ គឺមិនមែននាំចេញពីប្រទេសកម្ពុជាទេ!

(ភ្នំពេញ)៖ មន្ត្រីនគរបាលជាន់ខ្ពស់កម្ពុជា បានអះអាងថា គ្រឿងញៀនប្រភេទកេតាមីន ទម្ងន់សរុបជាង ១.៣តោន ដែលអាជ្ញាធរឥណ្ឌូនេស៊ីចាប់បានក្នុងបាវអង្ករមានអក្សរខ្មែរ គឺ មិនមែនជាគ្រឿងញៀនដែលនាំចេញពីប្រទេសកម្ពុជានោះទេ។

ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន បានបញ្ជាក់ថា តាមការស្រាវជ្រាវរបស់សមត្ថកិច្ចជំនាញកម្ពុជា គ្រឿងញៀននេះមានប្រភពចេញពី តំបន់ត្រីកោណមាស ហើយត្រូវបានដឹកជញ្ជូនតាមផ្លូវសមុទ្រឆ្លងកាត់ប្រទេសថៃ មុនបន្តដំណើរទៅកាន់ប្រទេសឥណ្ឌូនេស៊ី។

ចំពោះការប្រើប្រាស់ បាវអង្ករដែលមានអក្សរខ្មែរ មន្ត្រីជំនាញកម្ពុជាបានលើកឡើងថា ឧក្រិដ្ឋជនអាចទិញបាវទាំងនោះនៅតំបន់ព្រំដែនកម្ពុជា-ថៃ ឬអាចបោះពុម្ពនៅក្នុងប្រទេសថៃ ហើយយកមកប្រើប្រាស់ដើម្បី បំភាន់ប្រភព និងបង្វែរការសង្ស័យមកលើប្រទេសកម្ពុជា។

គួរបញ្ជាក់ថា អាជ្ញាធរឥណ្ឌូនេស៊ីបានស្ទាក់ចាប់នាវា MV King Sun កាលពីថ្ងៃទី ៦ ខែសីហា ឆ្នាំ២០២៦ ក្នុងដែនទឹកឥណ្ឌូនេស៊ី បន្ទាប់ពីធ្វើការតាមដានអស់រយៈពេលជាច្រើនខែ។ ក្នុងប្រតិបត្តិការនោះ សមត្ថកិច្ចបានរកឃើញកេតាមីនប្រមាណ ១.៣តោន ដែលច្រកក្នុងបាវចំនួន ៦៥ និងបានឃាត់ខ្លួននាវិកចំនួន ៨នាក់ ក្នុងនោះមានជនជាតិមីយ៉ាន់ម៉ា ៧នាក់ និងតៃវ៉ាន់ម្នាក់។

តាមព័ត៌មានដែលបានចុះផ្សាយ គ្រឿងញៀននេះត្រូវបានដឹកចេញពីប្រទេសថៃតាំងពីខែកុម្ភៈ មុននឹងធ្វើដំណើរឆ្ពោះទៅកាន់ឥណ្ឌូនេស៊ី។ អាជ្ញាធរឥណ្ឌូនេស៊ីបានប៉ាន់ប្រមាណថា គ្រឿងញៀនដែលរឹបអូសបាននេះមានតម្លៃប្រមាណ ១១៦.៤៩លានដុល្លារអាមេរិក។

ការបញ្ជាក់របស់សមត្ថកិច្ចកម្ពុជា គឺជាការឆ្លើយតបចំពោះការយល់ច្រឡំដែលអាចកើតឡើងពីការឃើញបាវអង្ករមានអក្សរខ្មែរ ដោយសមត្ថកិច្ចកម្ពុជាអះអាងថា សញ្ញាសម្គាល់លើវេចខ្ចប់ មិនមែនជាភស្តុតាងបញ្ជាក់ថា គ្រឿងញៀននោះមានប្រភពពីកម្ពុជាឡើយ៕