ប្រជាពលរដ្ឋព្រួយបារម្ភពីបទល្មើសឆ្នោតវៀតណាមខុសច្បាប់ និងសន្តិសុខសង្គមនៅក្រុងកំពង់ចាម

(កំពង់ចាម)៖ តាមប្រភពពីប្រជាពលរដ្ឋបានលើកឡើងថា មានការសង្ស័យថា សកម្មភាពឆ្នោតមួយកន្លែងដែលគេហៅថា «យាយរិន» នៅភូមិព្រែកជីក សង្កាត់សំបួរមាស ក្រុងកំពង់ចាម ខេត្តកំពង់ចាម អាចនៅតែបន្តដំណើរការ ដោយពុំទាន់ឃើញមានវិធានការបង្ក្រាបជាក់លាក់ពីសមត្ថកិច្ចពាក់ព័ន្ធនៅឡើយ។ នេះបើតាមប្រភពដែលបណ្ដាញសារព័ត៌មាន The Mirror News ទទួលបាននៅថ្ងៃទី១១ ខែសីហា ឆ្នាំ២០២៦។

ប្រភពបានបន្តថា បញ្ហានេះគួរត្រូវបាន ស៊ើបអង្កេតឱ្យបានច្បាស់លាស់ និងមានតម្លាភាព ព្រោះសកម្មភាពឆ្នោតខុសច្បាប់អាចជះឥទ្ធិពលដល់ជីវភាពគ្រួសារ បង្កបញ្ហាបំណុល និងអាចពាក់ព័ន្ធនឹងហានិភ័យបទល្មើសផ្សេងៗក្នុងសហគមន៍។

ជាពិសេស ក្នុងពេលដែលប្រជាពលរដ្ឋមានការព្រួយបារម្ភពីបញ្ហា ចោរកម្ម ឆក់ និងប្លន់ កើតមាននៅតាមមូលដ្ឋាន ការពង្រឹងគោលនយោបាយ «ភូមិ-ឃុំមានសុវត្ថិភាព» គួរត្រូវបានយកចិត្តទុកដាក់ជាបន្ទាន់។

មហាជនស្នើសុំ លោក អ៊ុន ចាន់ដា អភិបាលខេត្តកំពង់ចាម ជំរុញឱ្យសមត្ថកិច្ចជំនាញ និងអាជ្ញាធរមូលដ្ឋានចុះស៊ើបអង្កេត ពិនិត្យ និងចាត់វិធានការតាមច្បាប់ ប្រសិនបើរកឃើញមានបទល្មើសពិតប្រាកដ។

មហាជន​ទទូចស្នើសុំឱ្យមានការត្រួតពិនិត្យជាក់ស្តែង ដើម្បីរក្សាសន្តិសុខ សណ្តាប់ធ្នាប់ និងសុវត្ថិភាពជូនប្រជាពលរដ្ឋ៕