BREAKING NEWS: សំណង់មេឃុំបែកចានអត់ច្បាប់ ត្រូវបានលោកចៅហ្វាយស្រុកអង្គស្នួលបញ្ជាឱ្យផ្អាក ក្រោយមានការរិៈគន់ព្រោងព្រាតលើបណ្ដាញសង្គម!

(កណ្តាល)៖ ការដ្ឋានសំណង់មួយកន្លែង ស្ថិតតាមបណ្តោយផ្លូវលេខ៤២ ភូមិព្រៃបឹង ឃុំបែកចាន ស្រុកអង្គស្នួល ត្រូវបានរដ្ឋបាលស្រុកអង្គស្នួល ដឹកនាំដោយលោក នូ សុវណ្ណារិទ្ធ ចេញលិខិតផ្អាកការដ្ឋានជាផ្លូវការ នៅថ្ងៃទី១០ ខែសីហា ឆ្នាំ២០២៦ បន្ទាប់ពីក្រុមការងារចុះពិនិត្យ និងរកឃើញថា មិនទាន់មានលិខិតអនុញ្ញាតសាងសង់ត្រឹមត្រូវតាមច្បាប់។

ទោះជាយ៉ាងណា មានសេចក្ដីរាយការណ៍កាលពីថ្ងៃទី០៩ ខែសីហា ឆ្នាំ២០២៦ ថា នៅតែមានសកម្មភាពសាងសង់ និងដាំបង្គោលនៅទីតាំងដដែល បើទោះបីជាមានការណែនាំពីមន្ត្រីស្រុកអង្គស្នួលរួចហើយក៏ដោយ។

ស្ថានភាពនេះបានបង្កឲ្យមហាជនលើកឡើងយ៉ាងខ្លាំងក្លា និងរិះគន់ថា បើមេឃុំ ឬអ្នកមានតួនាទីអាចធ្វើសំណង់លើដីសាធារណៈ ឬអនុវត្តមិនគោរពច្បាប់បាន ប្រជាពលរដ្ឋក៏អាចធ្វើតាមបានដែរ។ មតិជាច្រើនបានចោទសួរថា “បើខ្លួនជាអ្នកអនុវត្តច្បាប់ តែបំពានច្បាប់វិញ តើនឹងអប់រំប្រជាពលរដ្ឋឲ្យគោរពច្បាប់បានដោយរបៀបណា?”

មហាជនមួយចំនួនក៏បានបញ្ចេញមតិខ្លាំងៗថា អ្នកកាន់តួនាទីគួរតែធ្វើជាគំរូល្អ មិនមែនធ្វើផ្ទុយពីច្បាប់ ហើយបង្កឲ្យមានអារម្មណ៍ថា “អ្នកមានអំណាចអាចធ្វើអ្វីក៏បាន” នោះទេ។ ពួកគេអះអាងថា ច្បាប់ត្រូវអនុវត្តស្មើគ្នា មិនអាចមានការលើកលែងតាមឋានៈឡើយ។

ជាមួយគ្នានេះ មានការលើកឡើងថា ការដ្ឋានខាងលើពាក់ព័ន្ធនឹង លោក ស៊ិន សំអាង មេឃុំបែកចាន។

អ្នកចេះផ្នែកច្បាប់ស្ដីពីសំណង់បានលើកឡើងថា មិនថាការដ្ឋានជារបស់អ្នកណា ច្បាប់ត្រូវតែអនុវត្តស្មើគ្នា។ ច្បាប់តែមួយសម្រាប់មនុស្សគ្រប់រូប បើខុសត្រូវអនុវត្តតាមច្បាប់ បើត្រឹមត្រូវត្រូវការពារតាមច្បាប់។

ពេលនេះ ភ្នែកមហាជនកំពុងសម្លឹងមើលទៅកាន់រដ្ឋបាលស្រុកអង្គស្នួល និងរដ្ឋបាលខេត្តកណ្តាល ចំពោះវិធានការបន្ត បន្ទាប់ពីការចេញលិខិតផ្អាកជាផ្លូវការ។

ច្បាប់ត្រូវអនុវត្តស្មើគ្នា ដើម្បីធានាសណ្តាប់ធ្នាប់ និងភាពយុត្តិធម៌ក្នុងសង្គម៕