ឯកឧត្តម នាយឧត្តមសេនីយ៍ ឈន សារ៉ាណេ៖ «ស្មារតីកត្តញ្ញូ ការដឹងគុណ និងសាមគ្គីភាពគ្រួសារ ជាគុណតម្លៃដ៏ថ្លៃថ្លាដែលគួរឱ្យគោរព»

(ភ្នំពេញ)៖ ការគោរពស្រឡាញ់ និងដឹងគុណចំពោះមាតាបិតា គឺជាគុណធម៌ដ៏ប្រពៃដែលត្រូវបានចាត់ទុកថា ជាមូលដ្ឋានដ៏សំខាន់នៃវប្បធម៌ ប្រពៃណី និងសីលធម៌ខ្មែរ។ ការតបស្នងសងគុណចំពោះអ្នកមានគុណ មិនត្រឹមតែបង្ហាញពីសេចក្តីកត្តញ្ញូរបស់កូនចំពោះមាតាបិតាប៉ុណ្ណោះទេ ប៉ុន្តែថែមទាំងឆ្លុះបញ្ចាំងពីភាពរឹងមាំនៃចំណងគ្រួសារ សាមគ្គីភាព និងការចូលរួមថែរក្សាតម្លៃល្អក្នុងសង្គមផងដែរ។

ជាក់ស្តែង កាលពីថ្ងៃទី៨ ខែសីហា ឆ្នាំ២០២៦ តាមរយៈការរៀបចំពិធីបុណ្យចម្រើនអាយុ វឌ្ឍនមង្គល ជូនមហាឧបាសិកាពុទ្ធសាសនូបត្ថម្ភក៍ ទិព្វ ញាណ គម្រប់៨១ ឈានចូល៨២ឆ្នាំ ព្រមទាំង ពិធីបុណ្យទក្ខិណានុប្បទាន ឧទ្ទិសកុសលជូនញាតិការទាំង៧សន្តាន បានបង្ហាញយ៉ាងច្បាស់ពីស្មារតីកត្តញ្ញូ ការដឹងគុណ និងការតបស្នងសងគុណរបស់ឯកឧត្តម នាយឧត្តមសេនីយ៍ ឈន សារ៉ាណេ អនុរដ្ឋលេខាធិការក្រសួងមហាផ្ទៃ និងលោកជំទាវ សែម សម្ផស្ស ព្រមទាំងក្រុមគ្រួសារ និងសាច់ញាតិ ចំពោះមាតាបិតា និងបុព្វការីជន។

ពិធីដ៏មានអត្ថន័យនេះ ក៏ជាការបង្ហាញពីការរួបរួមគ្នារបស់សមាជិកគ្រួសារ ក្នុងការលើកតម្កើងគុណូបការៈរបស់មាតាបិតា និងបុព្វការីជន ព្រមទាំងជាការរក្សាប្រពៃណីទំនៀមទម្លាប់ដ៏ល្អប្រពៃរបស់ជាតិខ្មែរ។ ស្មារតីនេះ គឺជាគំរូដ៏ល្អមួយសម្រាប់កូនចៅជំនាន់ក្រោយ ឱ្យយល់ពីតម្លៃនៃពាក្យថា «កត្តញ្ញូ កតវេទិតា» ដែលជាគុណធម៌សំខាន់ក្នុងការកសាងគ្រួសារដែលមានសេចក្តីស្រឡាញ់ សាមគ្គីភាព និងការគោរពគ្នាទៅវិញទៅមក។

ក្នុងឱកាសដ៏វិសេសវិសាលនេះ ឯកឧត្តម នាយឧត្តមសេនីយ៍ ឈន សារ៉ាណេ និងលោកជំទាវ សែម សម្ផស្ស ព្រមទាំងក្រុមគ្រួសារ បានសម្តែងនូវសេចក្តីរីករាយ និងក្តីគោរពដ៏ជ្រាលជ្រៅ ចំពោះវត្តមានរបស់ព្រះសង្ឃគ្រប់ព្រះអង្គ ព្រមទាំងថ្នាក់ដឹកនាំ មន្ត្រីជាន់ខ្ពស់ និងឥស្សរជនជាច្រើន ដែលបានអញ្ជើញចូលរួមជាភ្ញៀវកិត្តិយសយ៉ាងច្រើនកុះករ។

ក្នុងនោះមាន សម្តេចព្រះពោធិវ័ង្ស កិត្តិបណ្ឌិត ណយ ច្រឹក, សម្តេចព្រះឧត្តមវង្សា បណ្ឌិត គូ សុភាព ព្រមទាំងព្រះធម្មវិស្សនា ព្រះបញ្ញាសំវរ ព្រះអគ្គញាណ ព្រះមេត្តានុរ័ក្ខ ព្រះចរណាភិរ័ត ព្រះវិមលសរណញាណ ព្រះភិក្ខុសង្ឃរក្ខិតោ និងព្រះសង្ឃគ្រប់ព្រះអង្គ។

ជាមួយគ្នានេះ ក៏មានវត្តមាន សម្ដេចកិត្តិសង្គហបណ្ឌិត ម៉ែន សំអន, លោកជំទាវ ញ៉ែម សាខន ស ខេង, លោកជំទាវ អ៊ូ សាន សាយ ឈុំ, លោកជំទាវ ម៉ៅ ម៉ាល័យ កែ គឹមយ៉ាន, ឯកឧត្តមអភិសន្តិបណ្ឌិត ស សុខា និងលោកជំទាវ កែ សួនសុភី, ឯកឧត្តមកិត្តិឧន្ទេសបណ្ឌិត ប៉ុល សារឿន និងលោកជំទាវ ព្រមទាំងឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី អ្នកនាងកញ្ញា និងបងប្អូន ញាតិមិត្តជិតឆ្ងាយជាច្រើនរូប។

វត្តមានដ៏ថ្លៃថ្លារបស់ព្រះសង្ឃ ថ្នាក់ដឹកនាំ និងភ្ញៀវកិត្តិយសទាំងអស់ មិនត្រឹមតែជាការចូលរួមអបអរសាទរនូវវឌ្ឍនមង្គលរបស់មហាឧបាសិកា ទិព្វ ញាណ ប៉ុណ្ណោះទេ ប៉ុន្តែថែមទាំងជាសក្ខីភាពនៃចំណងមិត្តភាព ការគោរពរាប់អាន និងសាមគ្គីភាពដ៏ល្អប្រពៃរវាងក្រុមគ្រួសារ សាច់ញាតិ មិត្តភក្តិ និងអ្នកមានគុណចំពោះគ្នាទៅវិញទៅមក។

តាមរយៈសកម្មភាពនេះ អាចចាត់ទុកថា ជាការបន្តផ្សព្វផ្សាយនូវវប្បធម៌ «ដឹងគុណ និងតបស្នងសងគុណ» ដែលជាគុណតម្លៃដ៏ល្អរបស់សង្គមខ្មែរ ព្រោះការរស់នៅប្រកបដោយការគោរពមាតាបិតា គោរពអ្នកមានគុណ និងចេះរួមសាមគ្គីគ្នា គឺជាកម្លាំងសំខាន់ក្នុងការរក្សាសុខដុមរមនា និងភាពរឹងមាំរបស់គ្រួសារ និងសង្គមជាតិ។

ក្នុងនាមខ្លួន ឯកឧត្តម នាយឧត្តមសេនីយ៍ ឈន សារ៉ាណេ ព្រមទាំងលោកជំទាវ និងក្រុមគ្រួសារ បានសម្តែងនូវ អំណរគុណយ៉ាងជ្រាលជ្រៅបំផុត ចំពោះព្រះសង្ឃគ្រប់ព្រះអង្គ សម្តេច ឯកឧត្តម លោកជំទាវ លោកអ្នកឧកញ៉ា អ្នកឧកញ៉ា ឧកញ៉ា លោក លោកស្រី អ្នកនាងកញ្ញា និងបងប្អូនញាតិមិត្តជិតឆ្ងាយទាំងអស់ ដែលបានចំណាយពេលវេលាដ៏មានតម្លៃ អញ្ជើញចូលរួមក្នុងពិធីដ៏មានអត្ថន័យនេះ។

ឯកឧត្តម និងលោកជំទាវ ព្រមទាំងក្រុមគ្រួសារ សូមប្រសិទ្ធពរប្រគេន ជូនចំពោះព្រះសង្ឃគ្រប់ព្រះអង្គ និងភ្ញៀវកិត្តិយសទាំងអស់ សូមទទួលបាននូវសុខសុភមង្គល សុខភាពល្អ កម្លាំងមាំមួន ប្រាជ្ញាឈ្លាសវៃ និងសិរីសួស្តីគ្រប់ប្រការ ព្រមទាំងទទួលបាននូវពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

ទន្ទឹមនោះ ឯកឧត្តម នាយឧត្តមសេនីយ៍ ឈន សារ៉ាណេ និងលោកជំទាវ សែម សម្ផស្ស ព្រមទាំងក្រុមគ្រួសារ សូមអភ័យទោសដោយអនុគ្រោះចំពោះរាល់ការខ្វះខាត ឬកំហុសឆ្គងដោយប្រការណាមួយ ដែលអាចកើតមានឡើងក្នុងអំឡុងពេលរៀបចំកម្មវិធី និងពិធីបុណ្យខាងលើ។

ដោយសេចក្តីគោរព និងរាប់អានដ៏ជ្រាលជ្រៅបំផុត សូមថ្លែងអំណរគុណ និងអរព្រះគុណចំពោះព្រះសង្ឃគ្រប់ព្រះអង្គ ព្រមទាំងសម្តេច ឯកឧត្តម លោកជំទាវ និងភ្ញៀវកិត្តិយសទាំងអស់ ដែលបានផ្តល់កិត្តិយស និងក្តីស្រឡាញ់ដ៏ថ្លៃថ្លាចំពោះក្រុមគ្រួសារ។

«ស្មារតីកត្តញ្ញូ គឺជាគុណធម៌របស់កូនចំពោះមាតាបិតា។
ការតបស្នងសងគុណ គឺជាកេរដំណែលដ៏ល្អសម្រាប់កូនចៅជំនាន់ក្រោយ។
សាមគ្គីភាពគ្រួសារ គឺជាមូលដ្ឋាននៃសុខដុមរមនា និងភាពរឹងមាំក្នុងសង្គម»៕