អ្នកនាំពាក្យក្រសួងយុត្តិធម៌៖ លិខិតស្នើសុំអន្តរាគមន៍របស់លោក រ៉ុង ឈុន ត្រូវបានទទួល និងកំពុងស្ថិតក្នុងដំណាក់កាលពិនិត្យស្រាវជ្រាវតាមនីតិវិធី

(ភ្នំពេញ)៖ ឯកឧត្តម ឯម ច័ន្ទមករា រដ្ឋលេខាធិការ និងជាអ្នកនាំពាក្យក្រសួងយុត្តិធម៌ នៅព្រឹកថ្ងៃទី៧ ខែសីហា ឆ្នាំ២០២៦ បានចេញសេចក្តីបញ្ជាក់ជាផ្លូវការ ដើម្បីឆ្លើយតបនឹងការលើកឡើងពាក់ព័ន្ធនឹងលិខិតស្នើសុំអន្តរាគមន៍របស់លោក រ៉ុង ឈុន។

តាមការបញ្ជាក់របស់អ្នកនាំពាក្យ ក្រសួងយុត្តិធម៌ ក្នុងនាមជាស្ថាប័នសាធារណៈរបស់រដ្ឋ តែងតែបើកទ្វារទទួលរាល់ពាក្យបណ្ដឹង និងពាក្យស្នើសុំអន្តរាគមន៍ពីប្រជាពលរដ្ឋ និងគ្រប់ភាគីពាក់ព័ន្ធ ដោយមិនមានការរើសអើងឡើយ។ រាល់សំណើទាំងអស់ត្រូវបានពិនិត្យ និងចាត់ការតាមនីតិវិធីរដ្ឋបាល និងក្នុងក្របខណ្ឌច្បាប់ ដោយមានការសិក្សាស្រាវជ្រាវយ៉ាងហ្មត់ចត់ពីមន្ត្រីជំនាញ មុននឹងឈានទៅដល់ការឆ្លើយតបជាផ្លូវការ។

អ្នកនាំពាក្យបានបញ្ជាក់ថា លិខិតស្នើសុំអន្តរាគមន៍របស់លោក រ៉ុង ឈុន ដែលបានដាក់ជូនក្រសួងយុត្តិធម៌ កាលពីថ្ងៃទី១ ខែកក្កដា ឆ្នាំ២០២៦ ត្រូវបានទទួលរួចហើយ ហើយបច្ចុប្បន្នកំពុងស្ថិតក្នុងដំណាក់កាលពិនិត្យ និងស្រាវជ្រាវដោយមន្ត្រីជំនាញ ដើម្បីអនុវត្តតាមនីតិវិធីច្បាប់ជាធរមាន ដូចគ្នានឹងពាក្យបណ្ដឹង និងលិខិតស្នើសុំអន្តរាគមន៍ផ្សេងៗរបស់ប្រជាពលរដ្ឋទូទៅ។

ជាមួយគ្នានេះ អ្នកនាំពាក្យបានអះអាងថា ក្រសួងនឹងធ្វើការឆ្លើយតប បន្ទាប់ពីដំណើរការពិនិត្យ និងស្រាវជ្រាវត្រូវបានបញ្ចប់ ដោយបានគូសបញ្ជាក់ថា នេះជានីតិវិធីការងារធម្មតា ដែលអនុវត្តដោយប្រុងប្រយ័ត្នសម្រាប់រាល់សំណុំរឿងដែលស្ថិតក្រោមសមត្ថកិច្ចរបស់ក្រសួង។

ពាក់ព័ន្ធនឹងការលើកឡើងថា សហការីរបស់លោក រ៉ុង ឈុន បានយកលិខិតទៅដាក់ជូនក្រសួង ប៉ុន្តែត្រូវបានមន្ត្រីរដ្ឋបាលបដិសេធមិនទទួលនោះ ឯកឧត្តម ឯម ច័ន្ទមករា បានច្រានចោលការអះអាងនេះ ដោយបញ្ជាក់ថា ព័ត៌មានបែបនេះមិនត្រឹមត្រូវតាមការបញ្ជាក់របស់ក្រសួង។

ជាមួយនឹងការបដិសេធនេះ អ្នកនាំពាក្យក្រសួងយុត្តិធម៌ ឯកឧត្ដម ឯម ច័ន្ទមករា ក៏បានអំពាវនាវឱ្យភាគីពាក់ព័ន្ធ និងសាធារណជន ផ្ទៀងផ្ទាត់ព័ត៌មានជាមួយក្រសួងដោយផ្ទាល់ ក្នុងម៉ោងធ្វើការ ប្រសិនបើមានចម្ងល់ ឬត្រូវការព័ត៌មានបន្ថែម ដើម្បីធានាបាននូវភាពត្រឹមត្រូវ និងជៀសវាងការយល់ច្រឡំ៕