ឯកឧត្តម នាយឧត្តមសេនីយ៍ ឈន សារ៉ាណេ៖ «ថ្ងៃនេះ…ធ្វើឱ្យខ្ញុំនឹកឃើញអនុស្សាវរីយ៍នៃការលះបង់ ដើម្បីជាតិមាតុភូមិ និងថ្នាក់ដឹកនាំ»

(ភ្នំពេញ)៖ នៅថ្ងៃទី០២ ខែសីហា ឆ្នាំ២០២៦នេះ ឯកឧត្តម នាយឧត្តមសេនីយ៍ ឈន សារ៉ាណេ អនុរដ្ឋលេខាធិការក្រសួងមហាផ្ទៃ បានបង្ហោះរូបភាពអមដោយសាររំលឹកអនុស្សាវរីយ៍ ដែលបង្ហាញពីការលះបង់ ការបម្រើជាតិ និងភាពស្មោះត្រង់ចំពោះថ្នាក់ដឹកនាំ ដោយបានលើកឡើងថា៖ «ថ្ងៃនេះ បានធ្វើឱ្យខ្ញុំមានអារម្មណ៍នឹកឃើញយ៉ាងជ្រាលជ្រៅនូវអនុស្សាវរីយ៍ជាច្រើន ដែលបានឆ្លងកាត់ក្នុងដំណើរជីវិតបម្រើជាតិមាតុភូមិ ក្រោមម្លប់សន្តិភាព និងការដឹកនាំរបស់ថ្នាក់ដឹកនាំកំពូលនៃព្រះរាជាណាចក្រកម្ពុជា»។

តាមរយៈខ្លឹមសារដែលបានចែករំលែក ឯកឧត្តមបានរំលេចពីការដឹកនាំប្រកបដោយចក្ខុវិស័យវែងឆ្ងាយ ប្រាជ្ញា និងការប្តេជ្ញាចិត្តរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា ព្រមទាំង សម្តេចក្រឡាហោម ស ខេង អតីតឧបនាយករដ្ឋមន្ត្រី និងជាអតីតរដ្ឋមន្ត្រីក្រសួងមហាផ្ទៃ។ ជាមួយគ្នានេះ ឯកឧត្តមក៏បានបង្ហាញការគាំទ្រចំពោះការបន្តដឹកនាំប្រទេសរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដែលកំពុងបន្តថែរក្សាសន្តិភាព ស្ថិរភាព និងជំរុញការអភិវឌ្ឍប្រទេសជាតិ។

បើតាមឯកសារដែលឯកឧត្តមបានបង្ហោះ កាលណោះ ឯកឧត្ដមមានឋានៈជាឧត្តមសេនីយ៍ទោ ឈន សារ៉ាណេ នាយរងសេនាធិការចម្រុះ និងជាមេបញ្ជាការរង បញ្ជាការដ្ឋានវិស្វកម្ម អគ្គបញ្ជាការ ឯកឧត្តមបានសរសេរលិខិតដោយស្មោះអស់ពីបេះដូង គោរពស្នើសុំប្រគល់ជូនសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នូវស្ពានបេតុងមួយខ្សែ ប្រវែង៦១ម៉ែត្រ ទទឹង៧ម៉ែត្រ ដោយសូមឱ្យសម្តេចទាំងទ្វេ មេត្តាចង្អុលបង្ហាញទីតាំងសមស្រប ដើម្បីប្រើប្រាស់ជាប្រយោជន៍សាធារណៈ។

ឯកឧត្តមបានបញ្ជាក់ថា ទង្វើនេះមិនមែនជាការស្វែងរកកិត្តិយស ឬផលប្រយោជន៍ផ្ទាល់ខ្លួននោះឡើយ ប៉ុន្តែជាការបង្ហាញពីទឹកចិត្តស្មោះត្រង់របស់មន្ត្រីយោធាម្នាក់ ដែលតែងយល់ថា ការលះបង់ធនធាន កម្លាំងកាយ កម្លាំងចិត្ត និងសមត្ថភាពរបស់ខ្លួន ដើម្បីបម្រើជាតិ និងប្រជាពលរដ្ឋ គឺជាកិត្តិយសដ៏ធំបំផុតក្នុងជីវិត។

ឯកឧត្តមក៏បានរំលឹកផងដែរថា កាលពីឆ្នាំ២០០២ ឯកឧត្តម និងក្រុមគ្រួសារ បានប្រគល់ជូនសម្តេចទាំងទ្វេនូវកាណូតមួយគ្រឿងឈ្មោះ «ជ័យមង្គល» ដែលមានសមត្ថភាពផ្ទុកបាន១៥០តោន បំពាក់ដោយម៉ាស៊ីនកម្លាំង២៥០សេះ សម្រាប់បម្រើការដឹកជញ្ជូនស្បៀងអាហារ និងជួយសង្គ្រោះប្រជាពលរដ្ឋរងគ្រោះដោយទឹកជំនន់នៅតាមដងទន្លេមេគង្គ។

ឯកឧត្តមបានចាត់ទុកការទទួលលិខិតថ្លែងអំណរគុណ និងពរជ័យពីសម្តេចតេជោ និងសម្តេចកិត្តិព្រឹទ្ធបណ្ឌិត ជាកិត្តិយសដ៏ថ្លៃថ្លាបំផុតក្នុងជីវិត។ លិខិតនោះបានឆ្លុះបញ្ចាំងពីការវាយតម្លៃខ្ពស់ចំពោះទឹកចិត្តសប្បុរស និងការចូលរួមរបស់ឯកឧត្តម និងភរិយា ក្នុងបុព្វហេតុមនុស្សធម៌ និងការជួយសង្គ្រោះប្រជាពលរដ្ឋ។ សម្រាប់ឯកឧត្តម នេះគឺជាកម្លាំងចិត្តដ៏ធំធេង ដែលជំរុញឱ្យបន្តបំពេញបេសកកម្មបម្រើជាតិដោយមិនរាថយ។

ជាមួយគ្នានេះ ឯកឧត្តមក៏បានរំលឹកដល់អនុស្សាវរីយ៍មួយទៀតដែលមិនអាចបំភ្លេចបាន គឺអំឡុងពេលបានសាងផ្នួសជាភិក្ខុសាមណេរ។ ឯកឧត្តមបានលើកឡើងថា ជីវិតក្នុងព្រះពុទ្ធសាសនា បានបណ្តុះនូវគុណធម៌ ការអត់ធ្មត់ សេចក្តីមេត្តា ការលះបង់ និងការបម្រើអ្នកដទៃដោយមិនរំពឹងផលតបស្នង ដែលគុណតម្លៃទាំងនេះ បានក្លាយជាគោលការណ៍សម្រាប់ដឹកនាំជីវិត និងការបំពេញភារកិច្ចរហូតមកដល់សព្វថ្ងៃ។

ឯកឧត្តមបានបញ្ជាក់ទៀតថា រៀងរាល់ព្រឹក បន្ទាប់ពីថ្វាយបង្គំព្រះ និងសូត្រធម៌រួច ឯកឧត្តមតែងបួងសួងសុំឱ្យថ្នាក់ដឹកនាំប្រទេសជាតិ មានសុខភាពល្អ ប្រាជ្ញាវាងវៃ កម្លាំងមាំមួន និងបន្តដឹកនាំប្រទេសកម្ពុជាឱ្យរក្សាបាននូវសន្តិភាព ស្ថិរភាព និងការអភិវឌ្ឍប្រកបដោយចីរភាព។

ឯកឧត្តមបានគូសបញ្ជាក់ថា ការរំលឹកអនុស្សាវរីយ៍ទាំងនេះ មិនមែនដើម្បីបង្ហាញពីស្នាដៃរបស់ខ្លួននោះទេ ប៉ុន្តែដើម្បីរំឭកខ្លួនឯងថា តម្លៃពិតរបស់មនុស្ស មិនមែនស្ថិតនៅលើអ្វីដែលខ្លួនទទួលបានឡើយ ប៉ុន្តែស្ថិតនៅលើអ្វីដែលខ្លួនបានលះបង់ និងបានបន្សល់ទុកជាប្រយោជន៍សម្រាប់ជាតិមាតុភូមិ និងប្រជាពលរដ្ឋ។

ឯកឧត្តម នាយឧត្តមសេនីយ៍ ឈន សារ៉ាណេ បានបញ្ជាក់ពីការប្តេជ្ញាចិត្តថា នឹងបន្តរក្សាឆន្ទៈដើម បំពេញភារកិច្ចដោយស្មោះត្រង់ គោរពវិន័យ ស្រឡាញ់ជាតិ និងបម្រើប្រជាពលរដ្ឋ ដោយប្រកាន់ខ្ជាប់នូវឧត្តមគតិថា «ការលះបង់ដើម្បីជាតិ គឺជាកិត្តិយសដ៏ឧត្តុង្គឧត្តមបំផុតក្នុងជីវិត»៕