អភិបាលខេត្តកំពង់ស្ពឺដាក់បទបញ្ជាថ្មី! អភិបាលស្រុកភ្នំស្រួចដែលទើបតែងតាំង ត្រូវបម្រើពលរដ្ឋឱ្យមានប្រសិទ្ធភាព បង្ក្រាបបទល្មើសគ្រប់ប្រភេទ និងលុបបំបាត់ Scams Online

(កំពង់ស្ពឺ)៖ លោកបណ្ឌិត ជាម ចន្ទ័សោភ័ណ អភិបាលខេត្តកំពង់ស្ពឺ បានដាក់ការណែនាំយ៉ាងម៉ឺងម៉ាត់ដល់លោក អ៊ុំ សំអឿន អភិបាលស្រុកភ្នំស្រួច ដែលទើបទទួលការតែងតាំងថ្មី ឱ្យយកចិត្តទុកដាក់ខ្ពស់លើការផ្តល់សេវាសាធារណៈប្រកបដោយប្រសិទ្ធភាព និងតម្លាភាព ឆ្លើយតបទាន់ពេលវេលាចំពោះសំណើ សំណូមពរ និងបញ្ហារបស់ប្រជាពលរដ្ឋ ព្រមទាំងត្រូវពង្រឹងការបង្ក្រាប និងលុបបំបាត់បទល្មើសគ្រប់ប្រភេទ ជាពិសេសបទល្មើសឆបោកតាមប្រព័ន្ធអនឡាញ (Scams Online) នៅក្នុងមូលដ្ឋាន។

ការណែនាំនេះ ធ្វើឡើងក្នុងពិធីប្រកាសចូលកាន់មុខតំណែងអភិបាលស្រុកភ្នំស្រួច នាថ្ងៃទី១៧ ខែកក្កដា ឆ្នាំ២០២៦ ដោយជំនួសអភិបាលស្រុកចាស់ដែលបានចូលនិវត្តន៍។

លោកអភិបាលខេត្តបានបញ្ជាក់ថា មន្ត្រី និងអាជ្ញាធរមូលដ្ឋាន ត្រូវចុះជាប់ជាមួយប្រជាពលរដ្ឋ ស្តាប់បញ្ហា និងដោះស្រាយឱ្យបានឆាប់រហ័ស។ ក្នុងករណីហួសសមត្ថភាព ត្រូវបញ្ជូនសំណើមករដ្ឋបាលខេត្ត ដើម្បីពិនិត្យ និងដោះស្រាយបន្ត ដោយមិនត្រូវទុកឱ្យបញ្ហារបស់ប្រជាពលរដ្ឋអូសបន្លាយឡើយ។

ជាមួយគ្នានេះ លោកបណ្ឌិត ជាម ចន្ទ័សោភ័ណ ក៏បានព្រមានធ្ងន់ៗថា នឹងចាត់វិធានការយ៉ាងម៉ឺងម៉ាត់ចំពោះមន្ត្រី ឬអភិបាលស្រុកណា ដែលបំពេញការងារអសកម្ម ខ្វះការទទួលខុសត្រូវ ឬអាងខ្នង អាងខ្សែ មិនបម្រើផលប្រយោជន៍ប្រជាពលរដ្ឋ។ លោកបានសង្កត់ធ្ងន់ថា “មន្ត្រីសាធារណៈ គឺជាអ្នកបម្រើរាស្ត្រ មិនមែនជាចៅហ្វាយនៃរាស្ត្រនោះទេ” ដោយទាមទារឱ្យមន្ត្រីគ្រប់រូបប្រកាន់ខ្ជាប់នូវការទទួលខុសត្រូវ សុចរិតភាព និងគណនេយ្យភាព ក្នុងការបំពេញភារកិច្ចបម្រើប្រជាពលរដ្ឋ៕