សំណង់សង្ស័យគ្មានច្បាប់ និងរំលោភដីចំណីទន្លេបាសាក់ កំពុងសាងសង់យ៉ាងសកម្មនៅក្រុងតាខ្មៅ ខណៈមហាជនទទូចឲ្យអាជ្ញាធរចុះពិនិត្យជាបន្ទាន់

(កណ្ដាល)៖ ប្រជាពលរដ្ឋ និងមហាជនជាច្រើនបានសម្ដែងការព្រួយបារម្ភ និងរិះគន់ចំពោះម្ចាស់សំណង់មួយកន្លែង ដែលសង្ស័យថាគ្មានច្បាប់អនុញ្ញាតត្រឹមត្រូវ និងកំពុងសាងសង់រំលោភយកដីចំណីទន្លេបាសាក់ ស្ថិតនៅក្បែរក្រុមហ៊ុនដឹកជញ្ជូនវីរៈ ប៊ុនថាំ ជាប់ការ៉ាស់សាំតេលា លើផ្លូវលេខ ២១A ភូមិស្វាយរលំ១ សង្កាត់ស្វាយរលំ ក្រុងតាខ្មៅ ខេត្តកណ្ដាល។

បើតាមប្រភពព័ត៌មាន និងការចុះដល់ទីតាំងជាក់ស្ដែងរបស់ក្រុមអ្នកសារព័ត៌មាន នៅថ្ងៃទី១៩ ខែមិថុនា ឆ្នាំ២០២៦ បានសង្កេតឃើញថា សំណង់ខាងលើកំពុងដំណើរការសាងសង់យ៉ាងសកម្ម ខណៈពុំឃើញមានការបិទបង្ហាញលិខិតអនុញ្ញាតសាងសង់ ឬឯកសារពាក់ព័ន្ធណាមួយនៅមុខការដ្ឋាន ដូចដែលច្បាប់ និងបទប្បញ្ញត្តិជាធរមានបានកំណត់ឡើយ។

ប្រជាពលរដ្ឋបានលើកឡើងថា ប្រសិនបើការសាងសង់នេះពិតជារំលោភលើដីចំណីទន្លេបាសាក់មែន នោះគឺជាទង្វើដែលមិនអាចទទួលយកបាន ព្រោះជាការប៉ះពាល់ដល់សម្បត្តិសាធារណៈរបស់រដ្ឋ បរិស្ថាន និងអាចបង្កផលប៉ះពាល់ដល់លំហូរទឹកនាពេលអនាគត។ ម្យ៉ាងវិញទៀត ការអនុញ្ញាតឲ្យសំណង់បែបនេះបន្តកើតមាន អាចបង្កឲ្យមានគំរូអាក្រក់ និងជំរុញឲ្យមានការរំលោភយកដីសាធារណៈកាន់តែច្រើនឡើង។

មហាជនបានស្នើសុំឲ្យអាជ្ញាធរមូលដ្ឋានសង្កាត់ស្វាយរលំ ជាពិសេសលោក ឃឹម សំភារៈ អភិបាលក្រុងតាខ្មៅ មេត្តាចាត់តាំងមន្ត្រីជំនាញ និងដឹកនាំកម្លាំងចុះពិនិត្យទីតាំងជាក់ស្ដែងឲ្យបានច្បាស់លាស់ ដើម្បីផ្ទៀងផ្ទាត់ថា សំណង់នេះមានច្បាប់ត្រឹមត្រូវដែរឬទេ និងមានការរំលោភលើដីចំណីទន្លេបាសាក់ដូចការលើកឡើងរបស់ប្រជាពលរដ្ឋឬយ៉ាងណា។ក្នុងករណីរកឃើញថា មានការសាងសង់ខុសច្បាប់ ឬរំលោភលើដីសាធារណៈរបស់រដ្ឋពិតប្រាកដ អាជ្ញាធរគួរមានវិធានការផ្អាកការដ្ឋាន និងអនុវត្តតាមនីតិវិធីច្បាប់ឲ្យបានតឹងរ៉ឹង ដោយមិនគួរទុកឲ្យបញ្ហានេះអូសបន្លាយរហូតដល់សំណង់សាងសង់រួចរាល់នោះឡើយ។

គិតត្រឹមម៉ោងផ្សាយចេញនេះ បណ្ដាញសារព័ត៌មាន The Mirror News ពុំអាចសុំការបំភ្លឺពីមន្ត្រីជំនាញនិងលោក ឃឹម សំភារ ចៅហ្វាយក្រុងតាខ្មៅបានទេ ដោយទូរស័ព្ទខលចូលតែគ្មានមនុស្សលើក។

ប្រជាពលរដ្ឋសង្ឃឹមថា អាជ្ញាធរពាក់ព័ន្ធនឹងចាត់វិធានការប្រកបដោយតម្លាភាព ស្មើភាព និងគោរពតាមគោលការណ៍នីតិរដ្ឋ ដើម្បីការពារផលប្រយោជន៍សាធារណៈ និងទប់ស្កាត់ការរំលោភយកដីចំណីទន្លេ ដែលជាសម្បត្តិរួមរបស់ជាតិ៕