ទឹកចិត្តមនុស្សធម៌ដ៏ថ្លៃថ្លា! លោកឧត្តមសេនីយ៍ត្រី ម៉េង ស្រ៊ុន បន្តជួយសង្គ្រោះជីវិតពលរដ្ឋកំពុងប្រឈមជំងឺធ្ងន់ធ្ងរ

(កំពង់ស្ពឺ)៖  ក្នុងស្មារតីមនុស្សធម៌ និងការចែករំលែកក្ដីស្រឡាញ់ចំពោះប្រជាពលរដ្ឋ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ តែងតែចំណាយថវិកាផ្ទាល់ខ្លួន និងចូលរួមយ៉ាងសកម្មក្នុងសកម្មភាពសប្បុរសធម៌ ដើម្បីជួយដល់ប្រជាពលរដ្ឋជួបការលំបាក ក្រីក្រ ខ្វះខាត និងអ្នកដែលកំពុងប្រឈមបញ្ហាសុខភាពធ្ងន់ធ្ងរ។ ជាពិសេស លោកតែងយកចិត្តទុកដាក់ចំពោះនាយទាហាន នាយទាហានរង និងប្រជាពលរដ្ឋ ដោយចុះសួរសុខទុក្ខផ្ទាល់ និងផ្ដល់ជំនួយជាថវិកា សម្ភារៈ និងគ្រឿងឧបភោគបរិភោគជាបន្តបន្ទាប់។

ជាក់ស្ដែង ក្រោយទទួលបានព័ត៌មានថា ប្អូនស្រី ឃួន សារី អាយុ២៤ឆ្នាំ កំពុងមានជំងឺធ្ងន់ធ្ងរ រួមមានជំងឺមហារីកគ្រាប់ឈាម និងត្រូវការឈាមជាបន្ទាន់ដើម្បីសង្គ្រោះជីវិត ខណៈកំពុងសម្រាកព្យាបាលនៅមន្ទីរពេទ្យកាល់ម៉ែត លោកឧត្តមសេនីយ៍ត្រី ម៉េង ស្រ៊ុន បានបង្ហាញនូវទឹកចិត្តអាណិតអាសូរយ៉ាងជ្រាលជ្រៅ ដោយចាត់ឱ្យលោកអនុសេនីយ៍ឯក ស្រេង លីហួរ សម្របសម្រួលជាបន្ទាន់ជាមួយមជ្ឈមណ្ឌលជាតិផ្ដល់ឈាម ដើម្បីផ្ដល់ឈាមចំនួន ៣សាក់ សម្រាប់បញ្ចូលឈាមជួយសង្គ្រោះជីវិតអ្នកជំងឺ។

ទង្វើដ៏ប្រពៃនេះ បានឆ្លុះបញ្ចាំងពីស្មារតី «ខ្មែរស្រឡាញ់ខ្មែរ ខ្មែរជួយខ្មែរ» និងការលះបង់ដ៏មានតម្លៃក្នុងការជួយសង្គ្រោះអាយុជីវិតមនុស្ស។ ជាមួយគ្នានេះ លោកឧត្តមសេនីយ៍ត្រី ម៉េង ស្រ៊ុន ក៏បានចាត់ឱ្យក្រុមការងារបន្តសហការជាមួយមជ្ឈមណ្ឌលជាតិផ្ដល់ឈាម ដើម្បីផ្គត់ផ្គង់ឈាមបន្ថែមតាមតម្រូវការចាំបាច់ សម្រាប់ការព្យាបាល និងបន្តជីវិតរបស់ប្អូនស្រី ឃួន សារី ផងដែរ។

សកម្មភាពមនុស្សធម៌នេះ គឺជាគំរូដ៏ល្អប្រសើរមួយនៃការចែករំលែក ការយកចិត្តទុកដាក់ និងការរួមចំណែកជួយសង្គម ដែលគួរឱ្យកោតសរសើរ និងលើកទឹកចិត្តឱ្យសាធារណជនចូលរួមធ្វើអំពើល្អជាមួយគ្នា៕