Breaking News: វិទ្យាស្ថានបច្ចេកវិទ្យាកម្ពុជា ប្រកាសចាត់វិធានការតឹងរ៉ឹងលើករណីសញ្ញាបត្រក្លែងក្លាយ ដើម្បីការពារកិត្តិយស និងសុចរិតភាពស្ថាប័ន

(ភ្នំពេញ)៖ វិទ្យាស្ថានបច្ចេកវិទ្យាកម្ពុជា (ITC) នៅថ្ងៃទី២៤ ខែមិថុនា ឆ្នាំ២០២៦ បានចេញសេចក្តីប្រកាសព័ត៌មានជាថ្មី ដោយបញ្ជាក់ពីការប្តេជ្ញាចិត្តក្នុងការចាត់វិធានការតាមនីតិវិធីផ្ទៃក្នុង និងផ្លូវច្បាប់ ចំពោះករណីសញ្ញាបត្រមិនត្រឹមត្រូវ ដែលកំពុងទទួលការចាប់អារម្មណ៍យ៉ាងខ្លាំងពីសាធារណជន។

ស្ថាប័នបានអះអាងថា វិធានការនេះមានគោលបំណងការពារផលប្រយោជន៍ស្របច្បាប់របស់វិទ្យាស្ថាន និស្សិត អតីតនិស្សិត និយោជក និងសាធារណជន ព្រមទាំងរក្សាបាននូវសុចរិតភាព គុណភាព និងភាពជឿទុកចិត្តលើសញ្ញាបត្រដែលចេញដោយស្ថាប័ន។

បន្ទាប់ពីបានចេញសេចក្តីបំភ្លឺកាលពីថ្ងៃទី១៦ ខែមិថុនា ឆ្នាំ២០២៦ ដោយមិនទទួលស្គាល់សញ្ញាបត្ររបស់បុគ្គលឈ្មោះ ណន សីហា វិទ្យាស្ថានបានបន្តអនុវត្តការផ្ទៀងផ្ទាត់ឯកសារ និងទិន្នន័យផ្លូវការ ព្រមទាំងប្រមូលភស្តុតាងពាក់ព័ន្ធ ដើម្បីគាំទ្រដល់ដំណើរការចាត់ការតាមនីតិវិធីច្បាប់។
ប្រភពដដែលបានឱ្យដឹងថា ក្រុមការងារពិសេសមួយត្រូវបានបង្កើតឡើង ដើម្បីសហការជាមួយអាជ្ញាធរមានសមត្ថកិច្ច ក្នុងការស៊ើបអង្កេត និងអនុវត្តវិធានការផ្លូវច្បាប់ឱ្យបានត្រឹមត្រូវ និងមានប្រសិទ្ធភាព ស្របតាមច្បាប់ជាធរមាន។

ករណីនេះបានក្លាយជាប្រធានបទក្តៅក្នុងសង្គម ដោយអ្នកជំនាញមើលឃើញថា ការក្លែងបន្លំសញ្ញាបត្រ មិនត្រឹមតែប៉ះពាល់ដល់កិត្តិយសរបស់ស្ថាប័នអប់រំប៉ុណ្ណោះទេ ប៉ុន្តែថែមទាំងប៉ះពាល់ដល់គុណភាពធនធានមនុស្ស ទីផ្សារការងារ និងទំនុកចិត្តរបស់សាធារណជនលើប្រព័ន្ធអប់រំជាតិផងដែរ។

យោងតាមមាត្រា ៤៨ នៃច្បាប់ពាក់ព័ន្ធ ការផ្តល់ ឬប្រើប្រាស់វិញ្ញាបនបត្រ និងសញ្ញាបត្រមិនត្រឹមត្រូវ អាចប្រឈមនឹងការផាកពិន័យជាប្រាក់ពី ២លានរៀល ដល់ ៦លានរៀល និងទោសដាក់ពន្ធនាគារពី ១ឆ្នាំ ដល់ ៣ឆ្នាំ។

ករណីនេះកំពុងស្ថិតក្រោមការតាមដានយ៉ាងយកចិត្តទុកដាក់ពីសាធារណជន ខណៈមតិជាច្រើនទាមទារឱ្យមានការអនុវត្តច្បាប់ប្រកបដោយតម្លាភាព និងស្មើភាព ដើម្បីការពារតម្លៃពិតនៃការអប់រំ និងរក្សាកិត្តិយសសញ្ញាបត្រកម្ពុជា៕