អភិបាលក្រុងអរិយក្សត្រ ដឹកនាំកិច្ចប្រជុំគណៈបញ្ជាការឯកភាព ដាក់ចេញវិធានការពង្រឹងសន្តិសុខ និងទប់ស្កាត់បទល្មើស Scam Online

(កណ្ដាល)៖ លោក ចាន់ តារា អភិបាលក្រុងអរិយក្សត្រ នៅថ្ងៃទី២៤ ខែមិថុនា ឆ្នាំ២០២៦ បានដឹកនាំកិច្ចប្រជុំគណៈបញ្ជាការឯកភាពរដ្ឋបាលក្រុងប្រចាំខែមិថុនា ដោយផ្តោតសំខាន់លើការបង្ការ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Scam Online) និងការពង្រឹងសន្តិសុខ សណ្តាប់ធ្នាប់សាធារណៈក្នុងមូលដ្ឋាន។

ក្នុងកិច្ចប្រជុំនេះ អង្គប្រជុំបានពិនិត្យ និងវាយតម្លៃលទ្ធផលការងារប្រចាំខែ ព្រមទាំងស្តាប់របាយការណ៍វឌ្ឍនភាពលើការងារសំខាន់ៗជាច្រើន រួមមានការចែកប័ណ្ណកម្មសិទ្ធិ (ពន្ធសូន្យ) ការអប់រំ យុវជន និងកីឡា ការរៀបចំវេទិកាផ្សព្វផ្សាយរបស់ក្រុមប្រឹក្សាក្រុង ការទប់ស្កាត់បទល្មើសនេសាទ ការស្ថាបនាផ្លូវ និងប្រព័ន្ធលូរំដោះទឹក ព្រមទាំងការគ្រប់គ្រងជនបរទេសស្នាក់នៅក្នុងមូលដ្ឋាន។

លោកអភិបាលក្រុងបានកោតសរសើរចំពោះកងកម្លាំងប្រដាប់អាវុធ អាជ្ញាធរសង្កាត់ និងភាគីពាក់ព័ន្ធទាំងអស់ ដែលបានខិតខំអនុវត្តភារកិច្ចប្រកបដោយការទទួលខុសត្រូវខ្ពស់ ជាពិសេសការទប់ស្កាត់មិនឱ្យមូលដ្ឋានក្រុងអរិយក្សត្រក្លាយជាទីតាំងប្រព្រឹត្តបទល្មើសឆបោកតាមអនឡាញ។

ជាមួយគ្នានេះ គណៈបញ្ជាការឯកភាពរដ្ឋបាលក្រុងបានដាក់ចេញទិសដៅការងារសំខាន់ៗ ដោយជំរុញការចុះត្រួតពិនិត្យ និងទប់ស្កាត់បទល្មើស Scam Online តាមគោលដៅយុទ្ធសាស្ត្រ ពង្រឹងការអនុវត្តគោលនយោបាយ «ភូមិ-ឃុំ-សង្កាត់មានសុវត្ថិភាព» បន្តរៀបចំសណ្តាប់ធ្នាប់សាធារណៈ និងការគ្រប់គ្រងបរិស្ថាន ត្រៀមកម្លាំងអន្តរាគមន៍គ្រោះមហន្តរាយក្នុងរដូវវស្សា ព្រមទាំងលើកកម្ពស់គុណភាពសេវាសាធារណៈជូនប្រជាពលរដ្ឋឱ្យកាន់តែមានប្រសិទ្ធភាព តម្លាភាព និងឆាប់រហ័ស។

កិច្ចប្រជុំនេះបានឆ្លុះបញ្ចាំងពីការប្តេជ្ញាចិត្តរបស់រដ្ឋបាលក្រុងអរិយក្សត្រ ក្នុងការពង្រឹងការគ្រប់គ្រងមូលដ្ឋាន ថែរក្សាសន្តិសុខ សណ្តាប់ធ្នាប់ និងជំរុញការអភិវឌ្ឍមូលដ្ឋានឱ្យកាន់តែមានប្រសិទ្ធភាព និងចីរភាព៕