ផលចំណេញរបស់ដេប៉ូខ្សាច់ មិនអាចដូរនឹងសុវត្ថិភាពសាធារណៈបានទេ

(កណ្ដាល)៖ បញ្ហាខ្សាច់ជ្រុះរាយប៉ាយពេញផ្លូវពីសកម្មភាពដឹកជញ្ជូនរបស់ដេប៉ូខ្សាច់មួយកន្លែងជាប់គល់ស្ពានលេខ៥ ស្ថិតក្នុងសង្កាត់រការខ្ពស់ ក្រុងតាខ្មៅ កំពុងក្លាយជាក្តីកង្វល់យ៉ាងខ្លាំងសម្រាប់ប្រជាពលរដ្ឋដែលធ្វើដំណើរតាមផ្លូវលេខ២១ និងផ្លូវលេខ២១បេជារៀងរាល់ថ្ងៃ។ បញ្ហានេះមិនមែនជារឿងតូចតាច ឬកើតឡើងមួយពេលមួយគ្រានោះទេ ប៉ុន្តែជាបញ្ហាដែលបានបន្តអូសបន្លាយជាយូរមកហើយ និងទាមទារឱ្យមានការយកចិត្តទុកដាក់ជាបន្ទាន់ពីភាគីពាក់ព័ន្ធ។

ក្នុងនាមជាអាជីវកម្ម ដេប៉ូខ្សាច់មានសិទ្ធិប្រកបរបរដោយស្របច្បាប់ និងស្វែងរកប្រាក់ចំណេញ។ ប៉ុន្តែការស្វែងរកផលចំណេញមិនអាចធ្វើឡើងដោយការមិនគោរពសុវត្ថិភាពសាធារណៈ និងមិនទទួលខុសត្រូវចំពោះផលប៉ះពាល់ដែលកើតមានចំពោះសង្គមនោះឡើយ។ ការអនុញ្ញាតឱ្យរថយន្តដឹកខ្សាច់ចេញចូលដោយមិនមានវិធានការការពារខ្សាច់ធ្លាក់ជ្រុះ ការមិនសម្អាតផ្លូវជាប្រចាំ និងការមិនគ្រប់គ្រងការដឹកជញ្ជូនឱ្យបានត្រឹមត្រូវ គឺជាការធ្វេសប្រហែសដែលអាចនាំឱ្យមានគ្រោះថ្នាក់ធ្ងន់ធ្ងរដល់អ្នកប្រើប្រាស់ផ្លូវ។

ជាក់ស្តែង ខ្សាច់ដែលជ្រុះកកស្ទះនៅលើចិញ្ចើមផ្លូវ ទ្រូងផ្លូវ និងលើស្ពានលេខ៥ អាចបង្កឱ្យអ្នកជិះម៉ូតូរអិលកង់ បាត់បង់លំនឹង និងដួលបានគ្រប់ពេល។ ក្នុងស្ថានភាពចរាចរណ៍មមាញឹក ប្រសិនបើមានរថយន្តធុនធំ ឬរថយន្តល្បឿនលឿនធ្វើដំណើរពីក្រោយ នោះផលវិបាកអាចឈានដល់ការបាត់បង់អាយុជីវិតបាន។ បញ្ហានេះមិនគួរត្រូវរង់ចាំឱ្យមានមនុស្សរងរបួស ឬស្លាប់សិន ទើបចាប់ផ្តើមចាត់វិធានការនោះទេ។

អ្វីដែលគួរឱ្យព្រួយបារម្ភបន្ថែមទៀតនោះ គឺបញ្ហានេះហាក់កើតមានជារៀងរាល់ថ្ងៃ ប៉ុន្តែមិនទាន់ឃើញមានវិធានការម៉ឺងម៉ាត់ណាមួយ ដើម្បីបញ្ឈប់ ឬកាត់បន្ថយហានិភ័យនោះឡើយ។ ប្រជាពលរដ្ឋជាច្រើនកំពុងចោទជាសំណួរថា តើម្ចាស់ដេប៉ូបានអនុវត្តតាមលក្ខខណ្ឌបច្ចេកទេស និងការការពារបរិស្ថានដែរឬទេ? ហើយតើអាជ្ញាធរមូលដ្ឋាន និងមន្ទីរជំនាញបានតាមដានត្រួតពិនិត្យជាប្រចាំដែរឬទេ?

គួររំលឹកផងដែរថា រដ្ឋបាលខេត្តកណ្ដាលធ្លាប់បានចេញសេចក្តីជូនដំណឹង និងណែនាំជាច្រើនលើកមកហើយ ដោយតម្រូវឱ្យម្ចាស់អាជីវកម្មដឹកជញ្ជូនសម្ភារៈសំណង់ ដី ខ្សាច់ និងថ្ម ត្រូវអនុវត្តវិធានការបច្ចេកទេសឱ្យបានត្រឹមត្រូវ ដូចជាគ្របរថយន្តឱ្យជិត មិនឱ្យធ្លាក់ជ្រុះលើផ្លូវ រក្សាអនាម័យបរិស្ថាន និងមិនបង្កគ្រោះថ្នាក់ដល់សាធារណជន។ ការមិនអនុវត្តតាមការណែនាំទាំងនេះ គឺជាការមិនគោរពចំពោះសេចក្តីណែនាំរបស់អាជ្ញាធរ និងជាកត្តាដែលប៉ះពាល់ដោយផ្ទាល់ដល់សណ្តាប់ធ្នាប់សាធារណៈ។

មហាជន សូមអំពាវនាវដល់ម្ចាស់ដេប៉ូខ្សាច់ខាងលើ ឱ្យបង្ហាញការទទួលខុសត្រូវសង្គមឱ្យបានខ្ពស់ជាងនេះ ដោយត្រូវរៀបចំការដឹកជញ្ជូនឱ្យមានស្តង់ដារ សម្អាតផ្លូវជាប្រចាំ និងទប់ស្កាត់ការជ្រុះខ្សាច់ឱ្យមានប្រសិទ្ធភាព។ ជាមួយគ្នានេះ សូមសំណូមពរដល់រដ្ឋបាលខេត្តកណ្ដាល រដ្ឋបាលក្រុងតាខ្មៅ រដ្ឋបាលសង្កាត់រការខ្ពស់ និងមន្ទីរជំនាញពាក់ព័ន្ធ មេត្តាចុះពិនិត្យជាក់ស្តែង និងអនុវត្តវិធានការតាមផ្លូវច្បាប់ចំពោះករណីដែលរកឃើញថាមានការធ្វេសប្រហែស ឬរំលោភលើលក្ខខណ្ឌបច្ចេកទេស។

សុវត្ថិភាពប្រជាពលរដ្ឋត្រូវតែជាអាទិភាពទីមួយ។ ផ្លូវសាធារណៈជាទ្រព្យសម្បត្តិរួមរបស់ជាតិ មិនគួរត្រូវបានទុកឱ្យក្លាយជាកន្លែងប្រមូលផ្តុំខ្សាច់ ឬប្រភពគ្រោះថ្នាក់ប្រចាំថ្ងៃនោះឡើយ។ ការទប់ស្កាត់បញ្ហាមុនពេលកើតមានសោកនាដកម្ម គឺប្រសើរជាងការសោកស្តាយក្រោយពេលមានគ្រោះថ្នាក់កើតឡើងរួចទៅហើយ៕