ផ្ទុះការរិះគន់លើការផ្តល់សេវាព្យាបាល! ពលរដ្ឋម្នាក់ត្អូញត្អែរ ក្រោយនាំភរិយាប្រើប័ណ្ណ ប.ស.ស ទៅពិនិត្យជំងឺនៅមន្ទីរពេទ្យខេត្តបាត់ដំបង

(បាត់ដំបង)៖ ការបង្ហោះសាររបស់គណនីហ្វេសប៊ុកឈ្មោះ Vinh Som Oun កាលពីថ្ងៃទី២០ ខែមិថុនា ឆ្នាំ២០២៦ បានក្លាយជាប្រធានបទចាប់អារម្មណ៍នៅលើបណ្ដាញសង្គម បន្ទាប់ពីម្ចាស់គណនីបានរៀបរាប់ពីបទពិសោធន៍មិនល្អក្នុងការទទួលសេវាព្យាបាលនៅមន្ទីរពេទ្យខេត្តបាត់ដំបង ខណៈនាំភរិយាដែលជាគ្រូបង្រៀន ទៅពិគ្រោះ និងព្យាបាលជំងឺដោយប្រើប្រាស់ប័ណ្ណ ប.ស.ស។

តាមការរៀបរាប់របស់ម្ចាស់គណនី បានឱ្យដឹងថា បន្ទាប់ពីដាក់ឯកសារនៅផ្នែកទទួលអ្នកជំងឺ បុគ្គលិកបានបញ្ជូនភរិយារបស់លោកទៅពិនិត្យនៅផ្នែករោគស្ត្រី។ ក្រោយពេលពិនិត្យរួចប្រហែល១០នាទី និងយកឯកសារមកកាន់ផ្នែកទទួលវិញ បុគ្គលិកបានប្រាប់ថា មិនទាន់មានការធ្វើរោគវិនិច្ឆ័យ និងគ្មានហត្ថលេខារបស់គ្រូពេទ្យ ទើបតម្រូវឱ្យត្រឡប់ទៅជួបគ្រូពេទ្យម្តងទៀត។

ប្រភពដដែលបានអះអាងថា អ្វីដែលធ្វើឱ្យលោកមានការហួសចិត្តនោះ គឺគ្រូពេទ្យដែលបានពិនិត្យដំបូង មិនមែនជាគ្រូពេទ្យឯកទេសប្រចាំផ្នែករោគស្ត្រីនោះទេ ប៉ុន្តែជាគ្រូពេទ្យប្រចាំការ ខណៈលោកអះអាងថា មន្ទីរពេទ្យមិនបានជូនដំណឹងជាមុនថា គ្រូពេទ្យឯកទេសកំពុងសម្រាកឡើយ។

ម្ចាស់គណនីបានបន្តថា រូបលោក និងភរិយាបានរង់ចាំអស់រយៈពេលជាង២ម៉ោង ទើបដឹងថា គ្រូពេទ្យឯកទេសមិនមានវត្តមាន។ លោកក៏បានលើកជាសំណួរថា ប្រសិនបើគ្មានគ្រូពេទ្យឯកទេសប្រចាំការនៅពេលនោះ ហេតុអ្វីបានជាមន្ទីរពេទ្យនៅតែទទួលឯកសារ និងបញ្ជូនអ្នកជំងឺឱ្យចូលពិនិត្យដោយមិនផ្តល់ព័ត៌មានជាមុន។

ជាមួយគ្នានេះ លោកបានសម្តែងការមិនពេញចិត្តចំពោះការទំនាក់ទំនង និងការសម្របសម្រួលការងាររវាងបុគ្គលិកមួយចំនួន ដែលត្រូវបានអះអាងថា មិនបានផ្តល់ព័ត៌មានច្បាស់លាស់ដល់អ្នកជំងឺ និងអ្នកអមដំណើរ។
តាមរយៈការបង្ហោះនេះ ម្ចាស់គណនីបានអំពាវនាវដល់ថ្នាក់ដឹកនាំ និងស្ថាប័នពាក់ព័ន្ធ ឱ្យជួយពិនិត្យ និងពង្រឹងគុណភាពសេវាសាធារណៈ ពិសេសការផ្តល់សេវាសុខាភិបាល ដើម្បីធានាថា ប្រជាពលរដ្ឋទទួលបានសេវាកម្មប្រកបដោយវិជ្ជាជីវៈ តម្លាភាព និងការទទួលខុសត្រូវខ្ពស់។

គួរបញ្ជាក់ថា ខ្លឹមសារខាងលើគឺជាការលើកឡើងរបស់ម្ចាស់គណនីហ្វេសប៊ុក Vinh Som Oun ដែលបណ្ដាញសារព័ត៌មាន The Mirror News ទទួលបាននៅថ្ងៃទី២១ ខែមិថុនា ឆ្នាំ២០២៦។ រហូតមកដល់ពេលនេះ មិនទាន់មានការបកស្រាយ ឬការបំភ្លឺជាផ្លូវការពីសំណាក់មន្ទីរពេទ្យពាក់ព័ន្ធជុំវិញការលើកឡើងខាងលើនៅឡើយទេ៕

#TheMirrorNews #ព័ត៌មានក្ដៅ #បាត់ដំបង #មន្ទីរពេទ្យរដ្ឋ #បសស #សេវាសុខាភិបាល #កម្ពុជា