ឯកឧត្ដមឧបនាយករដ្ឋមន្ត្រី ស៊ុន ចាន់ថុល បន្តទាក់ទាញវិនិយោគកូរ៉េ ខណៈទស្សនកិច្ចក្រុមហ៊ុន Kyungshin ពង្រឹងទំនុកចិត្តលើវិស័យឧស្សាហកម្មយានយន្តនៅកម្ពុជា

(កូរ៉េខាងត្បូង)៖ នាល្ងាចថ្ងៃទី១៦ ខែមិថុនា ឆ្នាំ២០២៦ (ម៉ោងក្នុងតំបន់) ឯកឧត្ដមឧបនាយករដ្ឋមន្ត្រី ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) បានបន្តដឹកនាំគណៈប្រតិភូជាន់ខ្ពស់កម្ពុជា អញ្ជើញធ្វើទស្សនកិច្ចការងារនៅក្រុមហ៊ុន Kyungshin Co., Ltd. ដែលជាក្រុមហ៊ុនឈានមុខរបស់សាធារណរដ្ឋកូរ៉េក្នុងវិស័យផលិតគ្រឿងបង្គុំអេឡិចត្រូនិកយានយន្ត និងខ្សែភ្លើងរថយន្ត។

ដំណើរទស្សនកិច្ចនេះ ត្រូវបានទទួលស្វាគមន៍យ៉ាងកក់ក្តៅពីលោក Geum Woo Youn នាយកក្រុមហ៊ុន ព្រមទាំងថ្នាក់ដឹកនាំ និងបុគ្គលិកក្រុមហ៊ុន ដែលបានបង្ហាញពីសក្ដានុពល បច្ចេកវិទ្យាទំនើប និងផែនការពង្រីកអាជីវកម្មនាពេលអនាគត។

អមដំណើរឯកឧត្ដមឧបនាយករដ្ឋមន្ត្រី មានលោក Park Joo-bong ប្រធានសភាពាណិជ្ជកម្ម និងឧស្សាហកម្មទីក្រុងអ៉ីនឆ័ន (ICCI) រួមជាមួយថ្នាក់ដឹកនាំ និងមន្ត្រីពាក់ព័ន្ធពី ក.អ.ក. ក្រសួងពាណិជ្ជកម្ម សភាពាណិជ្ជកម្មកូរ៉េនៅកម្ពុជា (KOCHAM) សមាគមឧកញ៉ាកម្ពុជា និងសភាពាណិជ្ជកម្មកម្ពុជា។

សូមបញ្ជាក់ថា ក្រុមហ៊ុន Kyungshin Corporation ត្រូវបានបង្កើតឡើងក្នុងឆ្នាំ១៩៧៤ និងមានជំនាញក្នុងការផលិតខ្សែភ្លើងរថយន្ត (Wiring Harnesses), ឧបករណ៍ភ្ជាប់ចរន្ត (Connectors), ប្រអប់បំបែកចរន្ត (Junction Blocks), ខ្សែកាប និងប្រព័ន្ធអគ្គិសនីសម្រាប់រថយន្តអគ្គិសនី (EV)។ បច្ចុប្បន្ន ក្រុមហ៊ុនកំពុងជំរុញការអភិវឌ្ឍបច្ចេកវិទ្យាទំនើបសម្រាប់វិស័យរថយន្តអគ្គិសនី និងដំណោះស្រាយការធ្វើដំណើរនាពេលអនាគត។

គួររំលឹកថា Kyungshin បានវិនិយោគនៅកម្ពុជាតាំងពីឆ្នាំ២០១២ ដោយបង្កើតរោងចក្រផលិតខ្សែភ្លើងរថយន្តនៅឃុំវិហារសួគ៌ ស្រុកខ្សាច់កណ្តាល ខេត្តកណ្តាល ជាមួយទុនវិនិយោគប្រមាណ ២០លានដុល្លារអាមេរិក និងបានផ្តល់ការងារដល់កម្មករ-និយោជិតចំនួន ១.៤៦៧នាក់ ដែលជាការរួមចំណែកដ៏សំខាន់ក្នុងការអភិវឌ្ឍវិស័យឧស្សាហកម្ម និងបង្កើតការងារជូនប្រជាពលរដ្ឋកម្ពុជា៕