អភិបាលស្រុកស្អាងចាត់ការភ្លាមៗ! មហាជនកោតសរសើរលោក ជឺ គឹមហៃ ចំពោះការឆ្លើយតបរហ័សលើបញ្ហាសំរាម ខណៈពលរដ្ឋស្នើឱ្យក្រុមហ៊ុន ប៉ោសេង បង្កើនប្រសិទ្ធភាពប្រមូលសំរាម

(កណ្ដាល)៖ មហាជន និងប្រជាពលរដ្ឋជាច្រើនបានសម្ដែងការកោតសរសើរចំពោះលោក ជឺ គឹមហៃ អភិបាលស្រុកស្អាង ដែលបានបង្ហាញពីការយកចិត្តទុកដាក់ខ្ពស់ និងចាត់វិធានការយ៉ាងឆាប់រហ័ស បន្ទាប់ពីទទួលបានព័ត៌មានរាយការណ៍ពីប្រជាពលរដ្ឋជុំវិញបញ្ហាសំរាមកកស្ទះនៅក្នុងប្រឡាយមួយជាប់ហាងខារ៉ាអូខេ «ស្អាង អារម្មណ៍ថ្មី» ស្ថិតក្នុងភូមិព្រែកស្នង ឃុំព្រែកគយ ស្រុកស្អាង ខេត្តកណ្ដាល។ នេះបើតាមប្រភពដែលបណ្ដាញសារព័ត៌មាន The Mirror News ទទួលបាននៅថ្ងៃទី១៧ ខែមិថុនា ឆ្នាំ២០២៦នេះ។

ប្រភពបានបញ្ជាក់ឲ្យដឹងថា ចំណាត់ការទាន់ពេលវេលារបស់លោកអភិបាលស្រុក បានរួមចំណែកដោះស្រាយបញ្ហាបរិស្ថាន សោភ័ណភាព និងសុខភាពសាធារណៈរបស់ប្រជាពលរដ្ឋក្នុងមូលដ្ឋាន ព្រមទាំងបង្ហាញពីភាពជាអ្នកដឹកនាំដែលស្ដាប់សំណូមពររបស់ប្រជាពលរដ្ឋ និងឆ្លើយតបដោយមានប្រសិទ្ធភាព។

ទោះជាយ៉ាងណា មហាជននៅតែសំណូមពរឱ្យក្រុមហ៊ុន ប៉ោសេង ដែលទទួលបន្ទុកប្រមូល និងដឹកជញ្ជូនសំរាម បង្កើនការទទួលខុសត្រូវ និងពង្រឹងប្រសិទ្ធភាពការងារឱ្យកាន់តែប្រសើរឡើង តាមរយៈការប្រមូលសំរាមឱ្យបានទៀងទាត់ សកម្ម និងបន្ថែមចំនួនជើងរថយន្តប្រមូលសំរាមឱ្យសមស្របនឹងតម្រូវការជាក់ស្ដែងរបស់ប្រជាពលរដ្ឋ។

ការលើកកម្ពស់គុណភាពសេវាប្រមូលសំរាម គឺជាកត្តាសំខាន់ក្នុងការរក្សាបរិស្ថានស្អាត អនាម័យល្អ និងគុណភាពជីវិតរបស់ប្រជាពលរដ្ឋ។ ដូច្នេះ មហាជនសង្ឃឹមថា ក្រុមហ៊ុននឹងទទួលយកសំណូមពរនេះទៅពិចារណា និងកែលម្អសេវាកម្មរបស់ខ្លួនឱ្យកាន់តែមានប្រសិទ្ធភាព ស្របតាមការរំពឹងទុករបស់ប្រជាពលរដ្ឋ និងការខិតខំរបស់អាជ្ញាធរមូលដ្ឋាន៕