ឧត្តមសេនីយ៍ត្រី ម៉េង ស្រ៊ុន ណែនាំមន្ត្រីក្រោមឱវាទឲ្យពង្រឹងសាមគ្គីភាពផ្ទៃក្នុង ដើម្បីរួមគ្នាកសាងអង្គភាពឱ្យកាន់តែរឹងមាំ

(កំពង់ស្ពឺ)៖ នៅថ្ងៃទី១៦ ខែមិថុនា ឆ្នាំ២០២៦ លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ បានអញ្ជើញជាអធិបតីដឹកនាំកិច្ចប្រជុំបូកសរុបលទ្ធផលការងារប្រចាំខែមិថុនា និងរបាយការណ៍ឆមាសទី១ ឆ្នាំ២០២៦ ព្រមទាំងលើកទិសដៅការងារបន្ត ស្ថិតនៅសាលប្រជុំបញ្ជាការដ្ឋានកងរាជអាវុធហត្ថខេត្តកំពង់ស្ពឺ។

កិច្ចប្រជុំនេះមានការចូលរួមពីលោកមេបញ្ជាការរង សេនាធិការរង ប្រធាន-អនុប្រធានមន្ទីរ នាយ-នាយរងការិយាល័យ មេបញ្ជាការកងអនុសេនាធំ មេបញ្ជាការក្រុង-ស្រុក ប្រធានស្នាក់ការ និងនាយទាហាន នាយទាហានរងជាច្រើនរូប។

ក្នុងឱកាសនោះ លោកមេបញ្ជាការបានអនុញ្ញាតឱ្យលោកមេបញ្ជាការរងទទួលជំនាញសម្ភារបច្ចេកទេស ធ្វើរបាយការណ៍បូកសរុបលទ្ធផលការងារដែលសម្រេចបាន និងលើកឡើងពីចំណុចវិជ្ជមាននានា ព្រមទាំងដាក់ចេញវិធានការបន្ត ដើម្បីពង្រឹងប្រសិទ្ធភាពការងាររបស់មន្ទីរជំនាញឱ្យកាន់តែល្អប្រសើរ។

ថ្លែងទៅកាន់អង្គប្រជុំ លោកឧត្តមសេនីយ៍ត្រី ម៉េង ស្រ៊ុន បានកោតសរសើរចំពោះការខិតខំប្រឹងប្រែង ការលះបង់ និងស្មារតីទទួលខុសត្រូវរបស់នាយទាហាន និងនាយទាហានរងគ្រប់រូប ដែលបានបំពេញភារកិច្ចការពារសន្តិសុខ សណ្តាប់ធ្នាប់សាធារណៈ និងបម្រើប្រជាពលរដ្ឋប្រកបដោយប្រសិទ្ធភាពកន្លងមក។

ជាមួយគ្នានេះ លោកមេបញ្ជាការបានដាក់ចេញទិសដៅសំខាន់ៗសម្រាប់អនុវត្តបន្ត រួមមាន ការពង្រឹងការងារស្រាវជ្រាវ និងបង្ក្រាបបទល្មើសគ្រប់ប្រភេទឱ្យកាន់តែមានប្រសិទ្ធភាព ការពង្រឹងប្រព័ន្ធព័ត៌មានសន្តិសុខ ការផ្សព្វផ្សាយលេខទូរស័ព្ទអន្តរាគមន៍បន្ទាន់ Hotline 1292 ឱ្យកាន់តែទូលំទូលាយ ព្រមទាំងជំរុញឱ្យកម្លាំងជំនាញទាំងអស់គោរពវិន័យ ក្រមសីលធម៌ និងវិជ្ជាជីវៈការងារឱ្យបានម៉ឺងម៉ាត់ ស្របតាមបទបញ្ជាផ្ទៃក្នុងរបស់អង្គភាព។

លោកក៏បានសង្កត់ធ្ងន់លើការពង្រឹងសាមគ្គីភាពផ្ទៃក្នុង ការគោរព និងឱ្យតម្លៃគ្នាទៅវិញទៅមក ដើម្បីរួមគ្នាកសាងអង្គភាពឱ្យកាន់តែរឹងមាំ និងសម្រេចបាននូវសមិទ្ធផលថ្មីៗបន្ថែមទៀត។

លោកឧត្តមសេនីយ៍ត្រី ម៉េង ស្រ៊ុន បានថ្លែងអំណរគុណដល់នាយទាហាន និងនាយទាហានរងទាំងអស់ ដែលបានលះបង់កម្លាំងកាយចិត្ត និងពេលវេលាផ្ទាល់ខ្លួន ដើម្បីបំពេញភារកិច្ចជូនអង្គភាព និងសង្គមជាតិ ព្រមទាំងបានជូនពរឱ្យកងកម្លាំងទាំងអស់ និងក្រុមគ្រួសារ មានសុខភាពល្អ សុភមង្គល និងទទួលបានជោគជ័យគ្រប់ភារកិច្ច៕