ច្បាប់សំណង់នៅក្រុងតាខ្មៅ កំពុងខ្សោយ ឬការដឹកនាំរបស់លោក ឃឹម សំភារ មិនមានប្រសិទ្ធភាព? សំណង់អត់ច្បាប់នៅតែហោះមុនច្បាប់ជារៀងរាល់ថ្ងៃ!

(កណ្ដាល)៖ បញ្ហាសំណង់អត់ច្បាប់នៅក្នុងក្រុងតាខ្មៅ ហាក់បីដូចជាកំពុងក្លាយទៅជាជំងឺរ៉ាំរ៉ៃមួយ ដែលអាជ្ញាធរមានសមត្ថកិច្ចពាក់ព័ន្ធមិនទាន់អាចទប់ស្កាត់បានប្រកបដោយប្រសិទ្ធភាព។ ប្រជាពលរដ្ឋជាច្រើនកំពុងចោទជាសំណួរថា តើច្បាប់សំណង់នៅកម្ពុជា គ្មានប្រសិទ្ធភាពមែនឬ? ឬក៏ការដឹកនាំ និងការអនុវត្តច្បាប់របស់លោក ឃឹម សំភារ ចៅហ្វាយក្រុងតាខ្មៅ នៅមានភាពទន់ខ្សោយ ទើបធ្វើឱ្យសំណង់ជាច្រើននៅតែអាចសាងសង់បានទាំងគ្មានលិខិតអនុញ្ញាត?

ជាក់ស្តែង នៅថ្ងៃទី១៦ ខែមិថុនា ឆ្នាំ២០២៦នេះ គេសង្កេតឃើញមានសំណង់មួយកំពុងសាងសង់យ៉ាងសកម្មនៅតាមបណ្ដោយផ្លូវជាតិលេខ២១A ស្ថិតក្នុងភូមិលេខ២ សង្កាត់ស្វាយរលំ ក្រុងតាខ្មៅ ខេត្តកណ្ដាល។ អ្វីដែលគួរឱ្យភ្ញាក់ផ្អើលនោះ គឺមានការលើកឡើងពីប្រភពក្នុងមូលដ្ឋានថា សំណង់នេះមិនទាន់មានច្បាប់អនុញ្ញាតសាងសង់នៅឡើយទេ។

ប្រភពបានបញ្ជាក់ថា សូម្បីមេភូមិក៏មិនហ៊ានចុះទៅសាកសួរព័ត៌មានពីម្ចាស់សំណង់ដែរ។ ចំណែកចៅសង្កាត់វិញ ក៏បានអះអាងថា ម្ចាស់សំណង់មិនបានដាក់ពាក្យសុំការអនុញ្ញាតនៅសង្កាត់ឡើយ ដោយសារនីតិវិធីបច្ចុប្បន្នត្រូវឆ្លងកាត់រដ្ឋបាលក្រុងតាមប្រព័ន្ធច្រកចេញចូលតែមួយ។

អ្វីដែលធ្វើឱ្យមហាជនកាន់តែមានការសង្ស័យនោះ គឺប្រភពខ្លះបានអះអាងថា សំណង់នេះអាចជាកម្មសិទ្ធិរបស់បុគ្គលមានឥទ្ធិពល ឬមានឋានៈខ្ពស់ ហើយមូលហេតុដែលមិនអាចទទួលបានច្បាប់សាងសង់ គឺដោយសារតែអាចមានការរំលោភលើដីចំណីផ្លូវសាធារណៈ។ ប្រសិនបើការអះអាងនេះជាការពិត នោះវាជាបញ្ហាធ្ងន់ធ្ងរដែលអាជ្ញាធរមិនអាចមើលរំលងបានឡើយ។

មហាជនកំពុងរង់ចាំមើលថា តើលោក ឃឹម សំភារ ចៅហ្វាយក្រុងតាខ្មៅ នឹងមានវិធានការយ៉ាងណាចំពោះសំណង់ដែលរងការចោទប្រកាន់ថាគ្មានច្បាប់នេះ? ឬមួយក៏ច្បាប់អនុវត្តបានតែចំពោះប្រជាពលរដ្ឋទូទៅ ខណៈអ្នកមានអំណាច និងអ្នកមានឥទ្ធិពលអាចសាងសង់អ្វីក៏បានដោយគ្មានអ្នកហ៊ានប៉ះពាល់?

ដើម្បីរក្សាសណ្តាប់ធ្នាប់ សោភ័ណភាពទីក្រុង និងគោលការណ៍នីតិរដ្ឋ អាជ្ញាធរខេត្តកណ្ដាល និងមន្ទីររៀបចំដែនដី នគរូបនីយកម្ម និងសំណង់ គួរចុះពិនិត្យជាបន្ទាន់ និងបង្ហាញលទ្ធផលឱ្យសាធារណជនបានដឹងច្បាស់។ ប្រសិនបើសំណង់នេះគ្មានច្បាប់ពិតមែន ត្រូវអនុវត្តច្បាប់ឱ្យបានស្មើភាពគ្នា ដោយមិនគិតថាម្ចាស់ជាអ្នកធម្មតា ឬជាបុគ្គលមានឥទ្ធិពលនោះឡើយ។ នេះទើបជាការបង្ហាញពីអភិបាលកិច្ចល្អ និងការគោរពច្បាប់ពិតប្រាកដ។

ជាមួយគ្នានេះដែរ ប្រជាពលរដ្ឋ និងមហាជន សូមស្នើដល់ឯកឧត្តម គួច ចំរើន អភិបាលខេត្តកណ្ដាល ដែលកន្លងមកតែងតែបង្ហាញឆន្ទៈមុតមាំក្នុងការពង្រឹងការអនុវត្តច្បាប់ និងការរៀបចំសណ្ដាប់ធ្នាប់សាធារណៈ មេត្តាចាត់តាំងមន្ត្រីជំនាញពាក់ព័ន្ធចុះស្រាវជ្រាវ និងពិនិត្យឱ្យបានស៊ីជម្រៅចំពោះករណីសំណង់ខាងលើ ដើម្បីបញ្ជាក់ឱ្យបានច្បាស់ថា តើសំណង់នោះមានលិខិតអនុញ្ញាតត្រឹមត្រូវដែរឬទេ? ហើយតើមានការរំលោភលើដីចំណីផ្លូវ ឬទ្រព្យសម្បត្តិសាធារណៈដូចការលើកឡើងរបស់ប្រភពព័ត៌មានដែរឬយ៉ាងណា?

ប្រសិនបើការស៊ើបអង្កេតរកឃើញថា មានការសាងសង់ដោយគ្មានច្បាប់ ឬមានការរំលោភលើដីសាធារណៈពិតប្រាកដ គួរតែចាត់វិធានការតាមផ្លូវច្បាប់ឱ្យបានតឹងរ៉ឹង និងម៉ឺងម៉ាត់ ដោយមិនត្រូវមានការលើកលែងចំពោះបុគ្គលណាម្នាក់ឡើយ ទោះបីជាមានឋានៈ តួនាទី ឬឥទ្ធិពលយ៉ាងណាក៏ដោយ។ ការអនុវត្តច្បាប់ដោយស្មើភាព គឺជាមូលដ្ឋានគ្រឹះនៃនីតិរដ្ឋ និងជាកត្តាសំខាន់ក្នុងការកសាងទំនុកចិត្តរបស់ប្រជាពលរដ្ឋចំពោះអាជ្ញាធរ។

មហាជនជឿជាក់ថា ក្រោមការដឹកនាំរបស់ឯកឧត្តម គួច ចំរើន អាជ្ញាធរខេត្តកណ្ដាលនឹងមិនអនុញ្ញាតឱ្យមានការប្រើប្រាស់អំណាច ឬឥទ្ធិពលដើម្បីរំលោភច្បាប់ និងប៉ះពាល់ដល់ផលប្រយោជន៍សាធារណៈនោះឡើយ។ ផ្ទុយទៅវិញ ករណីនេះគួរត្រូវបានធ្វើជាគំរូ ដើម្បីបញ្ជាក់ឱ្យសង្គមបានឃើញថា ច្បាប់មានតម្លៃស្មើគ្នាចំពោះមនុស្សគ្រប់រូប ហើយគ្មាននរណាម្នាក់អាចស្ថិតនៅពីលើច្បាប់បានឡើយ៕