អ្នកស្រុកកណ្ដាលស្ទឹង សម្ដែងការសាទរ ចំពោះគម្រោងដើមឈើ១លានដើម និងវាយតម្លៃខ្ពស់លើការដឹកនាំរបស់លោក អ៊ូច សៅវឿន

(កណ្ដាល)៖ ប្រជាពលរដ្ឋនៅស្រុកកណ្ដាលស្ទឹង ខេត្តកណ្ដាល បានសម្ដែងនូវក្ដីរីករាយ និងមោទនភាពយ៉ាងខ្លាំង ចំពោះការជ្រើសរើសយកមូលដ្ឋានស្រុកកណ្ដាលស្ទឹង ជាទីតាំងអនុវត្តគម្រោង «ដើមឈើ១លានដើម» ដែលជាគម្រោងមានសារៈសំខាន់ក្នុងការចូលរួមការពារ និងលើកកម្ពស់បរិស្ថានឱ្យកាន់តែបៃតង ស្រស់ស្អាត និងប្រកបដោយនិរន្តរភាព។

ប្រជាពលរដ្ឋបានលើកឡើងថា ការទទួលបានគម្រោងដ៏មានអត្ថន័យនេះ មិនមែនជារឿងចៃដន្យនោះទេ ប៉ុន្តែជាផ្លែផ្កានៃការដឹកនាំប្រកបដោយចក្ខុវិស័យ ភាពឈ្លាសវៃ និងការយកចិត្តទុកដាក់ខ្ពស់របស់លោក អ៊ូច សៅវឿន អភិបាលស្រុកកណ្ដាលស្ទឹង ដែលបានខិតខំបំពេញការងារអភិវឌ្ឍន៍មូលដ្ឋានជាបន្តបន្ទាប់ រហូតទទួលបានការជឿទុកចិត្តពីក្រសួង ស្ថាប័ន និងដៃគូអភិវឌ្ឍន៍នានា។

ក្រោមការដឹកនាំដ៏ប៉ិនប្រសប់របស់លោក អ៊ូច សៅវឿន រដ្ឋបាលស្រុកកណ្ដាលស្ទឹង បានបង្ហាញពីសមត្ថភាពក្នុងការសម្របសម្រួល និងកៀរគរធនធានពីគ្រប់ភាគី ដើម្បីបម្រើផលប្រយោជន៍សាធារណៈ និងលើកកម្ពស់គុណភាពជីវិតរបស់ប្រជាពលរដ្ឋ។ ជាក់ស្ដែង ការចុះអនុស្សរណៈយោគយល់រវាងមន្ទីរបរិស្ថានខេត្តកណ្ដាល និងមូលនិធិ ខេ អឹម អេច លើគម្រោងដើមឈើ១លានដើម គឺជាសក្ខីភាពមួយបង្ហាញពីទំនុកចិត្ត និងការជឿជាក់ដែលដៃគូអភិវឌ្ឍន៍បានផ្ដល់ជូនដល់ថ្នាក់ដឹកនាំ និងរដ្ឋបាលស្រុកកណ្ដាលស្ទឹង។

ប្រជាពលរដ្ឋបានចាត់ទុកថា គម្រោងនេះនឹងមិនត្រឹមតែជួយបង្កើនគម្របពណ៌បៃតង និងកាត់បន្ថយផលប៉ះពាល់ពីបម្រែបម្រួលអាកាសធាតុប៉ុណ្ណោះទេ ប៉ុន្តែថែមទាំងរួមចំណែកលើកកម្ពស់សោភ័ណភាព បរិស្ថាន និងសុខុមាលភាពរបស់សហគមន៍ទាំងមូលផងដែរ។

ជាមួយគ្នានេះ ប្រជាពលរដ្ឋបានសម្ដែងនូវការគាំទ្រ និងប្ដេជ្ញាចិត្តចូលរួមថែរក្សា ដាំដុះ និងអភិរក្សដើមឈើឱ្យបានល្អ ដើម្បីរួមគ្នាប្រែក្លាយស្រុកកណ្ដាលស្ទឹងឱ្យក្លាយជាតំបន់បៃតង គួរឱ្យរស់នៅ និងជាគំរូដ៏ល្អក្នុងការអភិរក្សបរិស្ថាន ស្របតាមគោលនយោបាយអភិវឌ្ឍន៍ប្រកបដោយចីរភាពរបស់រាជរដ្ឋាភិបាលកម្ពុជា៕