ជំទាវ មុន្នី កុសម៉ា លើកឡើងបញ្ហាអគ្គិសនី ខណៈប្រជាពលរដ្ឋនៅខេត្តព្រះវិហារនាំគ្នាត្អូញត្អែររឿងដាច់ភ្លើងញឹកញាប់ និងខូចសម្ភារៈប្រើប្រាស់

(ព្រះវិហារ)៖ បញ្ហាអគ្គិសនីនៅក្នុងខេត្តព្រះវិហារ កំពុងទទួលការចាប់អារម្មណ៍ពីមហាជន បន្ទាប់ពីលោកជំទាវ មុន្នី កុសម៉ា សមាជិកក្រុមប្រឹក្សាខេត្តព្រះវិហារ បានបង្ហោះសារលើបណ្ដាញសង្គមហ្វេសប៊ុក បង្ហាញពីក្តីបារម្ភចំពោះការផ្គត់ផ្គង់អគ្គិសនី ដែលកំពុងបង្កផលប៉ះពាល់ដល់ជីវភាពរស់នៅរបស់ប្រជាពលរដ្ឋ។

ក្រោយការបង្ហោះនេះ មានប្រជាពលរដ្ឋជាច្រើនបានចូលទៅបញ្ចេញមតិ និងលើកឡើងពីបញ្ហាដែលពួកគេកំពុងជួបប្រទះ ដោយអះអាងថា ការដាច់ភ្លើងញឹកញាប់ និងការប្រែប្រួលតង់ស្យុងអគ្គិសនី បានធ្វើឱ្យឧបករណ៍អគ្គិសនី និងសម្ភារៈប្រើប្រាស់ក្នុងផ្ទះមួយចំនួនរងការខូចខាតជាបន្តបន្ទាប់។

ប្រជាពលរដ្ឋមួយចំនួនថែមទាំងបានលើកឡើងថា គ្រាន់តែមេឃចាប់ផ្តើមងងឹត ឬមានសញ្ញាភ្លៀងធ្លាក់ ការផ្គត់ផ្គង់អគ្គិសនីក៏ត្រូវបានផ្អាកភ្លាមៗ ដែលបង្កការលំបាកដល់ការរស់នៅ ការសិក្សា និងការប្រកបអាជីវកម្មប្រចាំថ្ងៃ។

ជុំវិញបញ្ហានេះ លោកស្រី មុន្នី កុសម៉ា បានបញ្ជាក់ថា នឹងបន្តនាំយកកង្វល់ និងសំណូមពររបស់ប្រជាពលរដ្ឋទៅជម្រាបជូនស្ថាប័នពាក់ព័ន្ធ ដើម្បីជំរុញឱ្យមានការពិនិត្យ និងដោះស្រាយឱ្យបានសមស្រប និងមានប្រសិទ្ធភាព។

ការលើកឡើងរបស់លោកស្រី បានក្លាយជាសំឡេងតំណាងឱ្យកង្វល់របស់ប្រជាពលរដ្ឋជាច្រើន ដែលកំពុងរង់ចាំដំណោះស្រាយជាក់ស្តែង ដើម្បីធានាបាននូវសេវាអគ្គិសនីមានស្ថិរភាព គុណភាពល្អ និងអាចឆ្លើយតបទៅនឹងតម្រូវការរស់នៅប្រចាំថ្ងៃបានប្រសើរជាងមុន៕