កម្លាំងប៉ូលិសព្រហ្មទណ្ឌភ្នំពេញវែកមុខក្រុមក្មេងទំនើង ៦នាក់ ករណីកាប់យុវជនម្នាក់របួសធ្ងន់នៅវាលស្រែ១០០

(ភ្នំពេញ)៖ កម្លាំងនគរបាលព្រហ្មទណ្ឌរាជធានីភ្នំពេញ សហការជាមួយអធិការដ្ឋាននគរបាលខណ្ឌព្រែកព្នៅ បានបើកប្រតិបត្តិការស្រាវជ្រាវ និងឃាត់ខ្លួនជនសង្ស័យចំនួន ០៦នាក់ ពាក់ព័ន្ធករណី ហិង្សាដោយចេតនាមានស្ថានទម្ងន់ទោស បន្ទាប់ពីធ្វើសកម្មភាពកាប់ទៅលើជនរងគ្រោះ បណ្តាលឱ្យរងរបួសធ្ងន់នៅដៃ។

ប្រតិបត្តិការនេះធ្វើឡើងក្រោមការបញ្ជាផ្ទាល់ពីលោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ដោយកម្លាំងជំនាញបានស្រាវជ្រាវរហូតឈានដល់ការចាប់ខ្លួនជនសង្ស័យទាំង ៦នាក់ នៅថ្ងៃទី៧ ខែមិថុនា ឆ្នាំ២០២៦។

សមត្ថកិច្ចបានឱ្យដឹងថា អំពើហិង្សានេះបានកើតឡើងកាលពីវេលាម៉ោងប្រមាណ ៣:៣០នាទីរសៀល ថ្ងៃទី១៤ ខែឧសភា ឆ្នាំ២០២៦ នៅចំណុចវាលស្រែ១០០ ស្ថិតក្នុងភូមិបែកបក សង្កាត់គោករកា ខណ្ឌព្រែកព្នៅ រាជធានីភ្នំពេញ។

ក្នុងប្រតិបត្តិការបង្ក្រាប សមត្ថកិច្ចបានដកហូតវត្ថុតាងជាដាវចំនួន ២ដើម ដែលត្រូវបានប្រើប្រាស់ក្នុងសកម្មភាពប្រព្រឹត្តបទល្មើស។

បច្ចុប្បន្ន ជនសង្ស័យទាំង ៦នាក់ រួមទាំងវត្ថុតាង ត្រូវបានកម្លាំងនគរបាលជំនាញកសាងសំណុំរឿង បញ្ជូនទៅចាត់ការតាមនីតិវិធីច្បាប់ជាធរមាន៕