អភិបាលខេត្តតាកែវដាក់បទបញ្ជាតឹងរ៉ឹង! មន្ត្រីច្រកព្រំដែនត្រូវពិនិត្យទំនិញនាំចូលពីវៀតណាមឱ្យបានម៉ត់ចត់

(តាកែវ)៖ លោក វ៉ី សំណាង អភិបាលខេត្តតាកែវ បានណែនាំដល់មន្ត្រីប្រចាំការតាមច្រកទ្វាព្រំដែនកម្ពុជា-វៀតណាមទាំងអស់ក្នុងខេត្ត ត្រូវពង្រឹង និងបង្កើនការត្រួតពិនិត្យមុខទំនិញនាំចូលគ្រប់ប្រភេទឱ្យបានម៉ត់ចត់ ដើម្បីធានាគុណភាព និងសុវត្ថិភាពជូនប្រជាពលរដ្ឋជាអ្នកប្រើប្រាស់។

ការណែនាំនេះ ត្រូវបានធ្វើឡើងក្នុងកិច្ចប្រជុំក្រុមប្រឹក្សាខេត្ត នាព្រឹកថ្ងៃទី៨ ខែមិថុនា ឆ្នាំ២០២៦ ដោយលោកអភិបាលខេត្តបានគូសបញ្ជាក់ថា ច្រកទ្វាអន្តរជាតិភ្នំដិន និងច្រកផ្សេងៗទៀតក្នុងខេត្ត គឺជាច្រកសេដ្ឋកិច្ចសំខាន់សម្រាប់ការដោះដូរទំនិញរវាងកម្ពុជា និងវៀតណាម ដែលមានទំនិញឆ្លងកាត់ជារៀងរាល់ថ្ងៃ។

លោក វ៉ី សំណាង បានសង្កត់ធ្ងន់ថា មន្ត្រីពាក់ព័ន្ធត្រូវអនុវត្តតួនាទីប្រកបដោយការទទួលខុសត្រូវខ្ពស់ ហើយប្រសិនបើរកឃើញមន្ត្រីណាឃុបឃិតជាមួយឈ្មួញនាំទំនិញខុសច្បាប់ចូលប្រទេស នឹងត្រូវប្រឈមមុខនឹងវិធានការផ្លូវច្បាប់យ៉ាងម៉ឺងម៉ាត់។

ជាមួយគ្នានេះ លោកអភិបាលខេត្តក៏បានជំរុញឱ្យអាជ្ញាធរមូលដ្ឋានគ្រប់លំដាប់ថ្នាក់ បន្តបង្កបរិយាកាសអំណោយផលសម្រាប់អ្នកវិនិយោគ ដើម្បីទាក់ទាញគម្រោងវិនិយោគថ្មីៗ បង្កើតការងារ និងរួមចំណែកលើកកម្ពស់ជីវភាពប្រជាពលរដ្ឋនៅក្នុងខេត្តតាកែវ៕