លោកឧត្តមសេនីយ៍ត្រី ម៉េង ស្រ៊ុន បន្តសកម្មភាពមនុស្សធម៌ ចុះសួរសុខទុក្ខ និងជួយឧបត្ថម្ភគ្រួសារខ្វះខាត បង្ហាញពីការដឹកនាំប្រកបដោយមេត្តាធម៌ និងការយកចិត្តទុកដាក់ចំពោះប្រជាពលរដ្ឋ

(កំពង់ស្ពឺ)៖ ក្រៅពីតួនាទីដ៏សំខាន់ក្នុងការថែរក្សាសន្តិសុខ សណ្តាប់ធ្នាប់សាធារណៈ និងការពារសុខសន្តិភាពជូនប្រជាពលរដ្ឋ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺ តែងតែបង្ហាញនូវសកម្មភាពមនុស្សធម៌ដ៏គួរឱ្យកោតសរសើរ ដោយបានយកចិត្តទុកដាក់ចំពោះសុខទុក្ខ និងជីវភាពរស់នៅរបស់ប្រជាពលរដ្ឋក្រីក្រ និងងាយរងគ្រោះនៅក្នុងមូលដ្ឋានជាប្រចាំ។

ក្រោមការចង្អុលបង្ហាញដ៏ខ្ពង់ខ្ពស់របស់ ឯកឧត្តមនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ និងជាមេបញ្ជាការ កងរាជអាវុធហត្ថលើផ្ទៃប្រទេស ព្រមទាំងការណែនាំដោយផ្ទាល់ពី ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ លោកឧត្តមសេនីយ៍ត្រី ម៉េង ស្រ៊ុន បានអនុវត្តការងារមនុស្សធម៌យ៉ាងសកម្ម ស្របតាមគោលការណ៍ “មិនទុកឱ្យប្រជាពលរដ្ឋណាម្នាក់ស្ថិតនៅដោយគ្មានការយកចិត្តទុកដាក់”។

ជាក់ស្តែង នៅវេលាម៉ោង ១១ និង ១៥នាទី ព្រឹកថ្ងៃទី៤ ខែមិថុនា ឆ្នាំ២០២៦ លោកឧត្តមសេនីយ៍ត្រី ម៉េង ស្រ៊ុន បានដឹកនាំក្រុមការងារកងរាជអាវុធហត្ថខេត្តកំពង់ស្ពឺ សហការជាមួយក្រុមការងារសហភាពសហព័ន្ធយុវជនកម្ពុជាខេត្ត និងក្រុមការងារកាកបាទក្រហមកម្ពុជាសាខាខេត្តកំពង់ស្ពឺ ចុះសួរសុខទុក្ខ និងនាំយកអំណោយមនុស្សធម៌ជូនដល់គ្រួសារមួយដែលកំពុងជួបការលំបាក មានជីវភាពខ្វះខាត គឺលោកយាយ នុត ពេញ អាយុ៧២ឆ្នាំ រស់នៅភូមិកំណប់ សង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ។

ក្នុងឱកាសនោះ លោកមេបញ្ជាការ និងក្រុមការងារ បានសំណេះសំណាលយ៉ាងស្និទ្ធស្នាល សួរនាំអំពីសុខភាព ស្ថានភាពជីវភាពរស់នៅប្រចាំថ្ងៃ និងបញ្ហាប្រឈមនានារបស់គ្រួសារ ដោយបង្ហាញពីទឹកចិត្តយកអាសារ និងការគិតគូរយ៉ាងជ្រាលជ្រៅចំពោះប្រជាពលរដ្ឋដែលកំពុងជួបការលំបាក។

ជាមួយគ្នានោះ លោកឧត្តមសេនីយ៍ត្រី ម៉េង ស្រ៊ុន និងក្រុមការងារ ក៏បាននាំយកអំណោយជាសម្ភារៈប្រើប្រាស់ និងគ្រឿងឧបភោគបរិភោគជាច្រើន រួមមាន អង្ករ មី ទឹកសុទ្ធ ភេសជ្ជៈ ទឹកត្រី ទឹកស៊ីអ៊ីវ និងត្រីខ ព្រមទាំងថវិកាមួយចំនួន ដែលមានតម្លៃសរុប ៦០៤,០០០រៀល ប្រគល់ជូនដល់គ្រួសារលោកយាយ ដើម្បីជួយសម្រាលការលំបាកក្នុងជីវភាពប្រចាំថ្ងៃ។

សកម្មភាពដ៏ប្រកបដោយមនុស្សធម៌នេះ បានឆ្លុះបញ្ចាំងយ៉ាងច្បាស់ពីការដឹកនាំប្រកបដោយការទទួលខុសត្រូវ មេត្តាករុណា និងការយកចិត្តទុកដាក់ខ្ពស់របស់លោកឧត្តមសេនីយ៍ត្រី ម៉េង ស្រ៊ុន ដែលមិនត្រឹមតែដឹកនាំកម្លាំងក្នុងការបំពេញភារកិច្ចការពារសន្តិសុខប៉ុណ្ណោះទេ ប៉ុន្តែថែមទាំងចូលរួមចែករំលែកទុក្ខលំបាក និងផ្តល់ក្តីសង្ឃឹមដល់ប្រជាពលរដ្ឋដែលកំពុងខ្វះខាតផងដែរ។

ប្រជាពលរដ្ឋក្នុងខេត្តកំពង់ស្ពឺ បានសម្តែងនូវការកោតសរសើរ និងវាយតម្លៃខ្ពស់ចំពោះទឹកចិត្តដ៏ថ្លៃថ្លារបស់លោកមេបញ្ជាការ និងក្រុមការងារ ដែលតែងតែចុះដល់មូលដ្ឋានដោយផ្ទាល់ ស្វែងយល់ពីសុខទុក្ខរបស់ប្រជាពលរដ្ឋ និងផ្តល់ជំនួយទាន់ពេលវេលា ស្របតាមស្មារតីមនុស្សធម៌ និងគោលនយោបាយយកប្រជាពលរដ្ឋជាស្នូលនៃការអភិវឌ្ឍ៕