សេចក្តីបំភ្លឺជុំវិញព័ត៌មាន «ប្លន់កណ្ដាលយប់» នៅស្រុកអង្គស្នួល ក្រោយស្រាវជ្រាវរកឃើញជាករណីប្រឌិតរឿង

(កណ្ដាល)៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានចេញសេចក្តីបំភ្លឺជាផ្លូវការ ដើម្បីឆ្លើយតបទៅនឹងការផ្សព្វផ្សាយរបស់គេហទំព័រហ្វេសប៊ុកឈ្មោះ «ពូសកម្មជនហ្វេសប៊ុក» ដែលបានបង្ហោះខ្លឹមសារថា មានករណី «ប្លន់កណ្ដាលយប់នៅស្រុកអង្គស្នួល» បង្កការភ័យខ្លាចដល់ប្រជាពលរដ្ឋ និងលើកឡើងថា ជាភាពខ្សោយក្នុងការអនុវត្តការងាររបស់អធិការដ្ឋាននគរបាលស្រុកអង្គស្នួល។

ក្រោយទទួលបានព័ត៌មានភ្លាម ដោយអនុវត្តតាមបទបញ្ជាដ៏ម៉ឺងម៉ាត់របស់ លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាល លោកវរសេនីយ៍ឯក មាន សំណាង អធិការនគរបាលស្រុកអង្គស្នួល បានដឹកនាំកម្លាំងជំនាញចុះស្រាវជ្រាវយ៉ាងយកចិត្តទុកដាក់ និងឆាប់រហ័សលើករណីខាងលើ។

តាមលទ្ធផលស្រាវជ្រាវ សមត្ថកិច្ចបានបញ្ជាក់ថា ករណីនេះមិនមែនជាអំពើប្លន់ប្រដាប់អាវុធឡើយ ប៉ុន្តែជាករណីបុរសម្នាក់ប្រឌិតរឿងថា ត្រូវចោរប្លន់ ដើម្បីកុហកប្រពន្ធ បន្ទាប់ពីបានយកលុយទៅលេងល្បែងចាញ់អស់។

ជនដែលបង្កការភាន់ច្រឡំឈ្មោះ នុត សំណាង ភេទប្រុស អាយុ៣៦ឆ្នាំ មុខរបរកសិករ មានទីលំនៅខេត្តកំពង់ឆ្នាំង។ ជននេះបានសារភាពថា ខ្លួនបានយកប្រាក់ទៅលេងល្បែងអស់ ហើយដោយខ្លាចប្រពន្ធខឹង ក៏បានប្រឌិតរឿងថា ត្រូវចោរវាយប្លន់យកទ្រព្យសម្បត្តិ រួមមាន ខ្សែក ខ្សែដៃ លុយជាង៤លានរៀល និងទូរសព្ទដៃ២គ្រឿង។

ក្រោយការសួរនាំយ៉ាងលម្អិតពីសំណាក់សមត្ថកិច្ច ឈ្មោះ នុត សំណាង បានទទួលស្គាល់កំហុស និងរួមជាមួយភរិយា ធ្វើការសំពះសុំទោសចំពោះសមត្ថកិច្ច ដែលបានបង្កការភាន់ច្រឡំ និងធ្វើឱ្យសាធារណជនមានការភ័យខ្លាចដោយសារព័ត៌មានមិនពិត។

ជាមួយគ្នានេះ ស្នងការដ្ឋាននគរបាលខេត្តកណ្តាល ក៏បានអំពាវនាវដល់ម្ចាស់គណនី «ពូសកម្មជនហ្វេសប៊ុក» ឱ្យធ្វើការកែតម្រូវខ្លឹមសារដែលបានផ្សព្វផ្សាយជាបន្ទាន់ ដើម្បីចៀសវាងការបន្តបង្កផលប៉ះពាល់ដល់សន្តិសុខសង្គម និងកិត្តិយសរបស់សមត្ថកិច្ច។

សមត្ថកិច្ចក៏សូមអំពាវនាវដល់សាធារណជន មេត្តាប្រើប្រាស់បណ្តាញសង្គមដោយការទទួលខុសត្រូវ ពិនិត្យប្រភពព័ត៌មានឱ្យបានច្បាស់លាស់ មុនធ្វើការចែករំលែក ដើម្បីជៀសវាងការភាន់ច្រឡំ និងការបង្កភាពអសន្តិសុខក្នុងសង្គម៕