អភិបាលខេត្តកណ្តាល ព្រមានធ្ងន់ៗ! ម្ចាស់សំណង់អត់ច្បាប់ រំលោភដីចំណីផ្លូវ ត្រូវរុះរើជាបន្ទាន់ មិនស្តាប់អាចប្រឈមជាប់ពន្ធនាគារ
(កណ្តាល)៖ រដ្ឋបាលខេត្តកណ្តាលបានចេញសេចក្តីជូនដំណឹងលើកទី៣ ដាក់វិធានការក្តៅ និងព្រមានធ្ងន់ធ្ងរចំពោះម្ចាស់សំណង់រឹង តូបលក់ដូរ ផ្ទាំងប៉ាណូ និងស្លាកផ្សាយពាណិជ្ជកម្មគ្មានច្បាប់អនុញ្ញាត ដែលកំពុងរំលោភលើដីចំណីផ្លូវសាធារណៈនៅទូទាំងភូមិសាស្ត្រខេត្តកណ្តាល ដោយទុកពេលត្រឹម២សប្តាហ៍ប៉ុណ្ណោះ ឱ្យរុះរើដោយស្ម័គ្រចិត្ត មុនអាជ្ញាធរចុះអនុវត្តវិធានការរដ្ឋបាល និងវិធានការច្បាប់យ៉ាងម៉ឺងម៉ាត់។ នេះបើតាមសេចក្ដីជូនណឹងលើកទី៣របស់រដ្ឋបាលខេត្តកណ្ដាលដែលបណ្ដាញសារព័ត៌មាន The Mirror News ទទួលបាននៅព្រឹកថ្ងៃទី២០ ខែឧសភា ឆ្នាំ២០២៦នេះ។
ការចេញសេចក្តីជូនដំណឹងជាបន្តបន្ទាប់នេះ បង្ហាញឱ្យឃើញពីជំហរដាច់ខាតរបស់រដ្ឋបាលខេត្តកណ្តាល ក្នុងការរៀបចំសណ្តាប់ធ្នាប់សាធារណៈ និងទប់ស្កាត់ភាពអនាធិបតេយ្យតាមដងផ្លូវ ដែលកំពុងក្លាយជាបញ្ហារ៉ាំរ៉ៃនៅតាមផ្លូវជាតិ ផ្លូវខេត្ត និងតំបន់ទីប្រជុំជនមួយចំនួន។
យោងតាមសេចក្តីជូនដំណឹង រដ្ឋបាលខេត្តបានលើកឡើងថា បើទោះបីជាបានជូនដំណឹងលើកទី១ និងលើកទី២រួចមកហើយក្តី ក៏នៅតែមានបុគ្គលមួយចំនួន បន្តសាងសង់សំណង់រឹង លក់ដូរ ធ្វើអាជីវកម្ម និងដាក់ផ្ទាំងផ្សាយពាណិជ្ជកម្មដោយគ្មានច្បាប់អនុញ្ញាត រំលោភលើដីចំណីផ្លូវសាធារណៈ ដែលបង្កឱ្យបាត់បង់សោភណភាព រារាំងគម្រោងអភិវឌ្ឍន៍ បង្កការកកស្ទះចរាចរណ៍ និងប៉ះពាល់ដល់សុវត្ថិភាពសាធារណៈយ៉ាងធ្ងន់ធ្ងរ។
ជាពិសេស សំណង់ និងការទន្ទ្រានដីចំណីផ្លូវទាំងនេះ កំពុងរារាំងដល់ការធ្វើដំណើររបស់ប្រជាពលរដ្ឋ ការដឹកជញ្ជូនទំនិញ និងប្រតិបត្តិការរថយន្តសង្គ្រោះបន្ទាន់ រថយន្តពន្លត់អគ្គិភ័យ ដែលអាចបង្កគ្រោះថ្នាក់ជាយថាហេតុគ្រប់ពេលវេលា។
រដ្ឋបាលខេត្តក៏បានបញ្ជាក់យ៉ាងច្បាស់ ដោយយោងតាមច្បាប់ស្តីពីផ្លូវថ្នល់ ឆ្នាំ២០១៤ ថា ជនណាដែលសាងសង់សំណង់អចិន្ត្រៃយ៍ដោយខុសច្បាប់លើដីសម្រាប់អភិវឌ្ឍហេដ្ឋារចនាសម្ព័ន្ធផ្លូវថ្នល់ អាចប្រឈមនឹងការព្រមានជាលាយលក្ខណ៍អក្សរ បញ្ជាឱ្យរុះរើ និងក្នុងករណីរឹងទទឹង អាចត្រូវផ្តន្ទាទោសដាក់ពន្ធនាគារពី១ខែដល់១ឆ្នាំ និងពិន័យជាប្រាក់រហូតដល់២លានរៀល។
ដោយឡែក ចំពោះការទន្ទ្រាន ត្រួតត្រា ឬប្រើប្រាស់ដីផ្លូវថ្នល់ដោយខុសច្បាប់ អាចប្រឈមនឹងការផ្តន្ទាទោសធ្ងន់ធ្ងរជាងនេះ ពោលគឺអាចជាប់ពន្ធនាគារពី៦ខែដល់២ឆ្នាំ និងពិន័យជាប្រាក់រហូតដល់៤លានរៀល។
រដ្ឋបាលខេត្តកណ្តាល បានទុកឱកាសចុងក្រោយរយៈពេល២សប្តាហ៍ ឱ្យម្ចាស់សំណង់ និងអាជីវករទាំងអស់ រុះរើដោយស្ម័គ្រចិត្ត។ ផ្ទុយទៅវិញ ប្រសិនបើនៅតែរឹងទទឹង មិនព្រមអនុវត្តតាមការណែនាំ អាជ្ញាធរនឹងចុះអនុវត្តវិធានការរដ្ឋបាល និងវិធានការច្បាប់ភ្លាមៗ ដោយមិនទទួលខុសត្រូវចំពោះការខូចខាតទ្រព្យសម្បត្តិណាមួយឡើយ។
មហាជនជាច្រើន កំពុងរង់ចាំមើលចំណាត់ការជាក់ស្តែងរបស់អាជ្ញាធរ ថាតើវិធានការក្តៅនេះ អាចបញ្ចប់ភាពអនាធិបតេយ្យ និងការរំលោភដីចំណីផ្លូវ ដែលអូសបន្លាយជាច្រើនឆ្នាំមកហើយបានដែរឬទេ?៕
