ឧបនាយករដ្ឋមន្ត្រី ស៊ុន ចាន់ថុល លើកព័ត៌មានសំខាន់៤ចំណុច ជាសូចនាករទាក់ទាញវិនិយោគលើវិស័យដឹកជញ្ជូនផ្លូវទឹកនៅកម្ពុជា

(ភ្នំពេញ)៖ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) បានលើកឡើងពីព័ត៌មានសំខាន់ៗចំនួន៤ ដែលអាចប្រើប្រាស់ជាសូចនាករសម្រាប់ការវិភាគ និងសម្រេចចិត្តវិនិយោគនៅកម្ពុជា ខណៈដែលវិស័យដឹកជញ្ជូនតាមផ្លូវទឹក និងភស្តុភារកម្ម កំពុងត្រូវបានមើលឃើញថា មានសក្តានុពលខ្លាំងសម្រាប់ការអភិវឌ្ឍនាពេលអនាគត។

ការលើកឡើងនេះ ធ្វើឡើងក្នុងឱកាសដែលឯកឧត្តម បានអនុញ្ញាតឱ្យគណៈប្រតិភូជាន់ខ្ពស់នៃ RMA Cambodia ដឹកនាំដោយលោក ងន សាំង អគ្គនាយកក្រុមហ៊ុន ចូលជួបសម្តែងការគួរសម និងពិភាក្សាការងារ នាព្រឹកថ្ងៃទី១៩ ខែឧសភា ឆ្នាំ២០២៦ ដើម្បីរាយការណ៍អំពីវឌ្ឍនភាពអាជីវកម្ម និងពិនិត្យលទ្ធភាពវិនិយោគលើវិស័យឧស្សាហកម្មផលិតមធ្យោបាយដឹកជញ្ជូនតាមផ្លូវទឹកនៅកម្ពុជា។

ក្នុងជំនួបនេះ ភាគីក្រុមហ៊ុនបានណែនាំដៃគូវិនិយោគមួយពីតំបន់អឺរ៉ុប ដែលមានជំនាញឯកទេសក្នុងវិស័យផលិតមធ្យោបាយដឹកជញ្ជូនផ្លូវទឹក និងកំពុងបង្ហាញចំណាប់អារម្មណ៍ខ្លាំងចំពោះសក្តានុពលទីផ្សារកម្ពុជា ដើម្បីសិក្សាស្វែងយល់អំពីឱកាសវិនិយោគក្នុងវិស័យយុទ្ធសាស្ត្រនេះ។

ឯកឧត្តម ស៊ុន ចាន់ថុល បានវាយតម្លៃខ្ពស់ចំពោះការជឿទុកចិត្តរបស់ក្រុមហ៊ុន RMA Cambodia និងដៃគូអឺរ៉ុប មកលើបរិយាកាសវិនិយោគនៅកម្ពុជា ពិសេសក្នុងបរិបទដែលរាជរដ្ឋាភិបាលកំពុងជំរុញការអភិវឌ្ឍហេដ្ឋារចនាសម្ព័ន្ធ និងប្រព័ន្ធភស្តុភារកម្មឱ្យកាន់តែទំនើប និងប្រកួតប្រជែងបាន។
ជាមួយគ្នានេះ ឯកឧត្តមឧបនាយករដ្ឋមន្ត្រី ក៏បានគូសបញ្ជាក់ពីព័ត៌មានសំខាន់ៗ៤ចំណុច ដែលវិនិយោគិនអាចយកទៅធ្វើជាមូលដ្ឋានសម្រាប់ការវិភាគ និងសម្រេចចិត្តវិនិយោគ រួមមាន៖
១- បច្ចុប្បន្នភាពខ្សែផ្លូវ និងសមត្ថភាពដឹកជញ្ជូនតាមផ្លូវទឹក,
២- សមត្ថភាពដឹកជញ្ជូនតាមផ្លូវសមុទ្រ និងផែនការពង្រីកកំពង់ផែទឹកជ្រៅ,
៣- វឌ្ឍនភាពគម្រោងគ្រប់គ្រងធនធានទឹកចម្រុះហ្វូណនតេជោ, និង
៤- អត្ថប្រយោជន៍នៃច្បាប់វិនិយោគនៅកម្ពុជា ដែលផ្តល់ភាពអំណោយផលខ្ពស់ដល់វិស័យឯកជន។

ឯកឧត្តម ស៊ុន ចាន់ថុល ក៏បានអះអាងថា ក្រុមប្រឹក្សាអភិវឌ្ឍន៍កម្ពុជា ត្រៀមខ្លួនរួចជាស្រេចក្នុងការផ្តល់កិច្ចសម្របសម្រួល និងគាំទ្រគ្រប់ដំណាក់កាលដល់ក្រុមហ៊ុនវិនិយោគ ដើម្បីជំរុញឱ្យគម្រោងសិក្សានេះអាចអភិវឌ្ឍទៅជាគម្រោងវិនិយោគជាក់ស្តែងនាពេលខាងមុខ។

ជំនួបនេះ បានបញ្ចប់ក្នុងបរិយាកាសស្និទ្ធស្នាល និងយោគយល់គ្នាខ្ពស់ ដោយភាគីទាំងពីរ បានបង្ហាញការប្តេជ្ញាចិត្តបន្តកិច្ចសហប្រតិបត្តិការយ៉ាងជិតស្និទ្ធ ដើម្បីរួមចំណែកអភិវឌ្ឍវិស័យឧស្សាហកម្មធុនធ្ងន់ និងប្រព័ន្ធភស្តុភារកម្មកម្ពុជា ឱ្យកាន់តែមានសមត្ថភាពប្រកួតប្រជែងនៅលើឆាកតំបន់ និងសកលលោក៕