សម្តេចធិបតី៖ កាតព្វកិច្ចយោធា គឺជាការវិនិយោគលើស្មារតីស្នេហាជាតិ និងមោទនភាពជាតិរបស់យុវជន

(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសង្កត់ធ្ងន់ថា ការអនុវត្តកាតព្វកិច្ចយោធា មិនមែនជាបន្ទុកសម្រាប់យុវជននោះទេ ប៉ុន្តែជាការវិនិយោគដ៏មានតម្លៃក្នុងការបណ្ដុះស្មារតីស្នេហាជាតិ វិន័យ និងមោទនភាពជាតិ សម្រាប់យុវជនខ្មែរគ្រប់រូប។

ក្នុងឱកាសអញ្ជើញជាអធិបតីក្នុងពិធីអបអរសាទរខួបលើកទី១៩ ទិវាអតីតយុទ្ធជនកម្ពុជា នាព្រឹកថ្ងៃទី១៥ ខែឧសភា ឆ្នាំ២០២៦ នៅសាលមហោស្រពកោះពេជ្រ សម្តេចធិបតីបានមានប្រសាសន៍ថា រយៈពេល ២៤ខែ នៃការហ្វឹកហាត់ក្នុងជួរកងទ័ព នឹងជួយពង្រឹងស្មារតីរឹងមាំ ការទទួលខុសត្រូវ និងការយល់ដឹងកាន់តែស៊ីជម្រៅអំពីតម្លៃនៃការការពារជាតិ និងបម្រើមាតុភូមិ។

សម្តេចបានលើកទឹកចិត្តដល់យុវជនឱ្យចាត់ទុកការបំពេញកាតព្វកិច្ចយោធា ជាឱកាសដ៏ឧត្តុង្គឧត្តមក្នុងនាមជាកូនប្រុសម្នាក់ ដែលបានចូលរួមចំណែកបម្រើ និងការពារបូរណភាពទឹកដីជាតិ។

សូមបញ្ជាក់ថា ពិធីខួបលើកទី១៩ ទិវាអតីតយុទ្ធជនកម្ពុជា ឆ្នាំ២០២៦នេះ មានការចូលរួមពីអតីតយុទ្ធជន និវត្តជន តំណាងក្រសួង-ស្ថាប័ននានា ព្រមទាំងយុវជន ស.ស.យ.ក. និងយុវជនកាកបាទក្រហមកម្ពុជា សរុបប្រមាណ ៣,៥០០នាក់ ដើម្បីអបអរសាទរ និងរំលឹកដល់គុណូបការៈដ៏ធំធេងរបស់អ្នកដែលបានលះបង់ដើម្បីបុព្វហេតុជាតិមាតុភូមិ៕