ផ្លូវបេតុងជាង១គីឡូម៉ែត្រ បើកការដ្ឋានជួសជុលនៅឃុំជើងកើប ជួយសម្រួលការធ្វើដំណើររបស់ពលរដ្ឋ ក្រោមអធិបតីភាពលោក អ៊ូច សៅវឿន 

(កណ្ដាល)៖ រដ្ឋបាលស្រុកកណ្ដាលស្ទឹង បន្តជំរុញការអភិវឌ្ឍហេដ្ឋារចនាសម្ព័ន្ធនៅមូលដ្ឋាន ដើម្បីឆ្លើយតបតម្រូវការរបស់ប្រជាពលរដ្ឋ ខណៈនៅថ្ងៃទី១៣ ខែឧសភា ឆ្នាំ២០២៦នេះ ពិធីបើកការដ្ឋានជួសជុលផ្លូវបេតុងអារមេមួយខ្សែ ប្រវែង១,០៩២ម៉ែត្រ និងទទឹង៥ម៉ែត្រ ត្រូវបានរៀបចំឡើងនៅភូមិស្រុកធំ ឃុំជើងកើប ស្រុកកណ្ដាលស្ទឹង ខេត្តកណ្ដាល។

ពិធីនេះ ប្រព្រឹត្តទៅក្រោមអធិបតីភាពលោក អ៊ូច សៅវឿន អភិបាល នៃគណៈអភិបាលស្រុកកណ្ដាលស្ទឹង និងមានការចូលរួមពីឯកឧត្តម សាក់ ហុង តំណាងឯកឧត្តម លឹម ប៊ុនធី ប្រធានក្រុមការងាររាជរដ្ឋាភិបាលចុះមូលដ្ឋានឃុំជើងកើប ព្រមទាំងមន្ត្រីអាជ្ញាធរ ប្រជាពលរដ្ឋ និងអ្នកពាក់ព័ន្ធសរុបចំនួន៧៣នាក់ ក្នុងនោះស្រី២៥នាក់។

តាមរបាយការណ៍បានឱ្យដឹងថា គម្រោងជួសជុលផ្លូវបេតុងអារមេនេះ ប្រើប្រាស់ថវិកាពីមូលនិធិឃុំឆ្នាំ២០២៦ និងមានទីតាំងឆ្លងកាត់ភូមិក្រសាំង ភូមិពោធិស្មាត ភូមិឆ្មាពួន និងភូមិស្រុកធំ ស្ថិតក្នុងឃុំជើងកើប។

ថ្លែងក្នុងពិធី លោក អ៊ូច សៅវឿន បានលើកឡើងថា ការអភិវឌ្ឍផ្លូវថ្នល់ គឺជាកត្តាសំខាន់ក្នុងការជំរុញសេដ្ឋកិច្ចមូលដ្ឋាន សម្រួលការធ្វើដំណើរ ដឹកជញ្ជូនកសិផល និងលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរ។

អាជ្ញាធរស្រុកក៏បានអំពាវនាវដល់ប្រជាពលរដ្ឋចូលរួមថែរក្សាសមិទ្ធផលសាធារណៈដែលកើតចេញពីថវិការដ្ឋ និងការខិតខំរួមគ្នា ដើម្បីប្រើប្រាស់បានយូរអង្វែង និងមានប្រសិទ្ធភាពខ្ពស់៕