ឃើញផ្ទាល់ភ្នែកប៉ុណ្ណឹងហើយ នៅហ៊ានបំភ្លឺទៀត តែហេតុអ្វីមិនហ៊ានទទួលខុសត្រូវ? រដ្ឋបាលឃុំក្រាំងធ្នង់ កំពុងបកស្រាយឬកំពុងដោះសារ!

(តាកែវ)៖ ក្រោយពីសារព័ត៌មាន The Mirror News ចុះផ្សាយអំពីស្ថានភាពស្ងាត់ជ្រងំក្នុងម៉ោងការងារនៅរដ្ឋបាលឃុំក្រាំងធ្នង់ ដោយឃើញមានតែមន្ត្រីម្នាក់ ខណៈប្រជាពលរដ្ឋកំពុងរង់ចាំទទួលសេវា ស្រាប់តែរដ្ឋបាលឃុំចេញសេចក្តីបំភ្លឺ ដោយព្យាយាមច្រានចោលការចុះផ្សាយទាំងស្រុង និងអះអាងថា «ការផ្តល់សេវានៅធម្មតា»។

ប៉ុន្តែសំណួរដែលសាធារណជនចង់សួរគឺ៖ បើការបម្រើសេវាធម្មតាមែន ហេតុអ្វីបរិយាកាសក្នុងសាលាឃុំស្ងាត់ដូចគ្មានអ្នកធ្វើការ? ហើយហេតុអ្វីប្រជាពលរដ្ឋនៅតែឈររង់ចាំ ខណៈមន្ត្រីសំខាន់ៗចាកចេញទៅប្រជុំ?

ការទៅប្រជុំគឺជាកាតព្វកិច្ចរដ្ឋបាល មិនមែនជាកំហុសទេ។ ប៉ុន្តែអ្វីដែលសង្គមមើលឃើញថាជាបញ្ហា គឺការខ្វះការរៀបចំប្រព័ន្ធការងារ និងការទទួលខុសត្រូវចំពោះសេវាសាធារណៈ។ មិនអាចយកហេតុផល “ជាប់ប្រជុំ” មកធ្វើជាខែលបិទបាំងការខ្វះមន្ត្រីបម្រើប្រជាពលរដ្ឋបានឡើយ។

អ្វីដែលគួរឲ្យភ្ញាក់ផ្អើលជាងនេះ គឺក្នុងសេចក្តីបំភ្លឺ រដ្ឋបាលឃុំមិនបានបង្ហាញការសោកស្តាយ ឬទទួលស្គាល់ចំណុចខ្វះខាតណាមួយឡើយ បែរជាចោទសារព័ត៌មានថា «ផ្សាយគ្មានមូលដ្ឋាន» ទៅវិញ។ ខណៈរូបភាព និងស្ថានភាពជាក់ស្តែងត្រូវបានអ្នកសារព័ត៌មានចុះទៅឃើញផ្ទាល់។

ការរិះគន់ក្នុងន័យស្ថាបនា មិនមែនដើម្បីបំផ្លាញកិត្តិយសអាជ្ញាធរមូលដ្ឋានទេ ប៉ុន្តែដើម្បីជំរុញឲ្យមានការកែលម្អសេវាសាធារណៈឲ្យកាន់តែប្រសើរ។ ព្រោះ “សាលាឃុំ” គឺជាកន្លែងដែលប្រជាពលរដ្ឋពឹងផ្អែករាល់ថ្ងៃ មិនមែនជាកន្លែងដែលអាចទុកឲ្យស្ងាត់ជ្រងំក្នុងម៉ោងការងារហើយចេញសេចក្តីបំភ្លឺដើម្បីដោះសារបាននោះទេ។

ប្រជាពលរដ្ឋមិនចង់បានសេចក្តីបំភ្លឺវែងឆ្ងាយទេ ពួកគេចង់បានតែ ទៅដល់សាលាឃុំ មានមន្ត្រីនៅធ្វើការ មានអ្នកទទួលពាក្យ និងមានសេវាលឿន ទាន់ពេលវេលា។

បើអាជ្ញាធរមូលដ្ឋាននៅតែគិតថា ការរិះគន់គឺជាការវាយប្រហារ មិនមែនជាកញ្ចក់ឆ្លុះបញ្ហា នោះការកែលម្អសេវាសាធារណៈនឹងនៅតែដើរយឺត ហើយអ្នកដែលរងផលប៉ះពាល់ពិតប្រាកដ គឺប្រជាពលរដ្ឋស្លូតត្រង់៕