«ខ្ញុំមិនមែនមន្ត្រីអាវធំទេ គឺមន្ត្រីរើសសំរាម» សារពិតពីបេះដូងអ្នកបម្រើរាស្ត្រ របស់លោក ឡាយ សម្រិត

(កណ្ដាល)៖ «ខ្ញុំមិនមែនមន្ត្រីអាវធំទេ គឺមន្ត្រីរើសសំរាម និងសំអាតមាត់លូ» ជាសម្តីដ៏សាមញ្ញ ប៉ុន្តែឆ្លុះបញ្ចាំងពីស្មារតីទទួលខុសត្រូវ និងការលះបង់ក្នុងការបម្រើសាធារណៈរបស់លោក ឡាយ សម្រិត អភិបាលរងក្រុងតាខ្មៅ ទទួលបន្ទុកផ្នែកសំរាម និងសាធារណការ។ នេះជាសាររបស់លោក ឡាយ សម្រិត​ ដែលបណ្ដាញសារព័ត៌មាន The Mirror News ទទួលបាននៅថ្ងៃទី១៣ ខែឧសភា ឆ្នាំ២០២៦នេះ។

ការលើកឡើងរបស់លោក​ ឡាយ សម្រិត មិនត្រឹមតែជាការឆ្លើយតបទៅនឹងការរិះគន់លើបណ្ដាញសង្គមប៉ុណ្ណោះទេ ប៉ុន្តែជាការបង្ហាញឲ្យឃើញថា មន្ត្រីមួយរូបដែលចុះធ្វើការងារផ្ទាល់នៅមូលដ្ឋាន ពិតជាយល់ច្បាស់ពីការលំបាក ការនឿយហត់ និងសម្ពាធនៃការងារសាធារណការ ដែលមនុស្សជាច្រើនមើលរំលង។

ពាក្យថា «មន្ត្រីរើសសំរាម និងសំអាតមាត់លូ» មិនមែនជាការបន្ទាបតួនាទីខ្លួនឯងនោះទេ តែជាការបង្ហាញពីភាពស្មោះត្រង់ និងការយល់ថា ការងារបម្រើរាស្ត្រ មិនអាស្រ័យលើតួនាទីធំ ឬតូចឡើយ។ មន្ត្រីដែលហ៊ានចុះដល់ទីតាំង ហ៊ានទទួលការរិះគន់ ហ៊ានពន្យល់ និងបើកចំហឲ្យសាធារណជនស្គាល់ពីការងារពិត គឺជាចំណុចគួរឲ្យកោតសរសើរ។ ជាពិសេស ការលើកឡើងថា «ខ្ញុំមិនមែនម្ចាស់ពាងទេ តែខ្ញុំធ្វើការត្រឹមអ្នកយកសំរាមចេញពីពាង» គឺជាសារដ៏មានន័យ សម្រាប់រំលឹកដល់សាធារណជនថា ការរក្សាអនាម័យ និងសណ្ដាប់ធ្នាប់ទីក្រុង មិនមែនជាកាតព្វកិច្ចរបស់អាជ្ញាធរតែម្នាក់ឯងទេ ប៉ុន្តែត្រូវការការចូលរួមពីប្រជាពលរដ្ឋទាំងអស់គ្នា។ សំរាមគួរត្រូវបានបោះចូលធុងសំរាម មិនមែនចោលពាសវាលពាសកាល រួចទុកឲ្យកម្មករ និងមន្ត្រីជាអ្នកដើរប្រមូលតាមក្រោយនោះឡើយ។

ក្នុងសង្គមប្រជាធិបតេយ្យ ការរិះគន់គឺជារឿងធម្មតា ប៉ុន្តែការរិះគន់គួរឈរលើមូលដ្ឋានព័ត៌មានច្បាស់លាស់ និងមានសុជីវធម៌។ មន្ត្រីសាធារណៈក៏មានសិទ្ធិបកស្រាយ និងឆ្លើយតបចំពោះការចោទប្រកាន់ ឬការយល់ច្រឡំផងដែរ។ ការទទួលយកការរិះគន់ត្រឹមត្រូវ និងការបដិសេធការវាយប្រហារដែលខ្វះព័ត៌មាន គឺជាសិទ្ធិស្របច្បាប់ និងជាវប្បធម៌នៃការទំនាក់ទំនងសាធារណៈដ៏ត្រឹមត្រូវ។

ក្នុងនាមអ្នកតាមដានសង្គម សូមលើកទឹកចិត្តដល់ លោក ឡាយ សម្រិត បន្តខិតខំបំពេញការងារដោយស្មារតីទទួលខុសត្រូវ ភាពក្លាហាន និងការបម្រើប្រជាពលរដ្ឋដោយស្មោះត្រង់។ ទន្ទឹមនឹងនេះ ក៏សូមអំពាវនាវដល់ប្រជាពលរដ្ឋ ចូលរួមថែរក្សាបរិស្ថាន អនាម័យ និងគោរពការងាររបស់អ្នកសំអាតទីក្រុង ព្រោះទីក្រុងស្អាត មិនអាចកើតឡើងដោយកម្លាំងមនុស្សមួយក្រុមតូចបានឡើយ៕