សាលាឃុំក្រាំងធ្នង់ ស្រុកបាទី ខេត្តតាកែវ ស្ងាត់មន្ត្រីការងារ ខណៈពលរដ្ឋរង់ចាំសេវាសាធារណៈ តើជាការខ្វះទំនួលខុសត្រូវ ឬបញ្ហាការគ្រប់គ្រង?

(តាកែវ)៖ នៅវេលាម៉ោងជាង៣រសៀល ថ្ងៃទី១២ ខែឧសភា ឆ្នាំ២០២៦ ក្រុមការងារ The Mirror News បានចុះទៅដល់សាលាឃុំក្រាំងធ្នង់ ស្រុកបាទី ខេត្តតាកែវ សង្កេតឃើញថា មានតែមន្ត្រីច្រកចេញចូលតែមួយម្នាក់ប៉ុណ្ណោះកំពុងប្រចាំការ ខណៈមន្ត្រីផ្សេងៗទៀត រួមទាំងស្មៀនឃុំ និងសមាជិកក្រុមប្រឹក្សាឃុំ មិនឃើញមានវត្តមាននៅកន្លែងធ្វើការ។

បញ្ហានេះ បានធ្វើឲ្យមហាជន និងប្រជាពលរដ្ឋមួយចំនួន លើកជាចម្ងល់អំពីប្រសិទ្ធភាពការបម្រើសេវាសាធារណៈ ជាពិសេសស្មៀនឃុំដែលជាមន្ត្រីក្របខណ្ឌក្រសួងមហាផ្ទៃ តើបានបំពេញតួនាទី និងទំនួលខុសត្រូវចំពោះប្រជាពលរដ្ឋបានគ្រប់គ្រាន់ដែរឬទេ?

ប្រភពពីមន្ត្រីច្រកចេញចូល ដែលប្រចាំការតែម្នាក់ឯង បានឲ្យដឹងថា កាលពីព្រឹក ស្មៀនឃុំបានទៅចូលរួមកម្មវិធីជាមួយលោកអភិបាលស្រុក ប៉ុន្តែសម្រាប់ពេលរសៀលវិញ រូបគាត់មិនដឹងថាមន្ត្រីទាំងនោះទៅទីណានោះទេ។

ជុំវិញករណីនេះ លោក ជិន អ៊ីម មេឃុំក្រាំងធ្នង់ បានបញ្ជាក់ប្រាប់ The Mirror News ថា លោកបានជាប់ចូលរួមប្រជុំគណៈបញ្ជាការឯកភាពស្រុកតែម្នាក់ឯងប៉ុណ្ណោះ។

ទោះជាយ៉ាងណា មហាជនមើលឃើញថា ទោះមានកម្មវិធីប្រជុំ ឬបេសកកម្មការងារផ្សេងៗក៏ដោយ ក៏គួរតែមានការរៀបចំកម្លាំងមន្ត្រីប្រចាំការឲ្យបានសមរម្យ ដើម្បីធានាការផ្ដល់សេវាសាធារណៈជូនប្រជាពលរដ្ឋ មិនគួរឲ្យសាលាឃុំស្ទើរតែគ្មានមន្ត្រីបម្រើការបែបនេះឡើយ។

ក្រោមការដឹកនាំរបស់លោក សាយ វណ្ណៈ អភិបាលស្រុកបាទី មហាជនក៏ចង់ឃើញការពង្រឹងវិន័យការងារ ការទទួលខុសត្រូវ និងប្រសិទ្ធភាពការបម្រើសេវាជូនពលរដ្ឋឲ្យកាន់តែល្អប្រសើរ ជៀសវាងការរិះគន់ថា មានភាពអសកម្ម ឬខ្វះការយកចិត្តទុកដាក់ចំពោះតម្រូវការរបស់ប្រជាពលរដ្ឋនៅមូលដ្ឋាន។

អាស្រ័យហេតុនេះ The Mirror News សូមធ្វើការអំពាវនាវដល់អាជ្ញាធរពាក់ព័ន្ធ និងថ្នាក់ដឹកនាំខេត្តតាកែវ មេត្តាជួយត្រួតពិនិត្យ និងពង្រឹងការអនុវត្តការងារនៅតាមបណ្ដាសាលាឃុំឲ្យមានប្រសិទ្ធភាពខ្ពស់ ស្របតាមគោលការណ៍ “បម្រើប្រជាពលរដ្ឋដោយតម្លាភាព ទំនួលខុសត្រូវ និងប្រសិទ្ធភាព”៕